കോഴിക്കോട് കലോത്സവത്തിൽ ഒന്നാം സ്ഥാനം കരസ്ഥമാക്കി കോക്കല്ലൂർ ഹയർ സെക്കൻഡറിയുടെ നാടകം 'കുരിശ്'
Last Updated:
ഹൈസ്കൂൾ വിഭാഗത്തിൻ്റെ 10 നാടകങ്ങളും ഹയർ സെക്കൻഡറി വിഭാഗത്തിൻ്റെ 12 നാടകങ്ങളുമാണ് വേദിയിലെത്തിയത്.
കോഴിക്കോട് ജില്ലാ സ്കൂൾ കലാമേളയിൽ എച്ച്.എസ്.എസ്. വിഭാഗം അവതരിപ്പിച്ച നാടകങ്ങൾ വർത്തമാനകാല ജീവിതത്തിൻ്റെ നേർചിത്രങ്ങളായി. അഴിമതിയും അന്ധവിശ്വാസങ്ങളും അസ്തിത്വ പ്രശ്നങ്ങളും ലഹരിമരുന്നുകളുടെ ദുരുപയോഗവും വൈകാരിക ചൂഷണങ്ങളും വിവിധ നാടകങ്ങളിൽ മറനീങ്ങിയത് ആസ്വാദകരുടെ കൈയ്യടി നേടി. വേദി ഏഴ് നവഖാലി കാലത്തു മുതൽ വൈകിട്ടു വരെ സദസ് ആസ്വാദകരെ കൊണ്ട് സമ്പന്നമായിരുന്നു. അവതരിക്കപ്പെട്ട നാടകങ്ങളത്രയും പ്രമേയങ്ങളിൽ വൈവിധ്യം പുലർത്തിയത് ശ്രദ്ധേയമായി മാറി.
ഹൈസ്കൂൾ വിഭാഗത്തിൻ്റെ 10 നാടകങ്ങളും ഹയർ സെക്കൻഡറി വിഭാഗത്തിൻ്റെ 12 നാടകങ്ങളുമാണ് വേദിയിലെത്തിയത്. നീതിക്കുവേണ്ടിയുള്ള നിലവിളിയും സത്യം തേടിയുള്ള ജീവിതാന്വേഷണങ്ങളും മികച്ച രംഗാവതരണവും അഭിനയത്തിലെ തൻമയീഭാവവും ആസ്വാദകരുടെ ഹൃദയം കീഴടക്കി. പാത്രം, പാലം, മോർച്ചറി, കുരിശ് തുടങ്ങിയ സൂചക ശബ്ദങ്ങൾ ജീവിത കാഴ്ചപ്പാടിൻ്റെ നേർകാഴ്ചകളായി മാറി.
എച്ച്.എസ്.എസ്. വിഭാഗത്തിൽ കോക്കല്ലൂർ ഹയർ സെക്കൻഡറിയുടെ നാടകം 'കുരിശ്' ഒന്നാം സ്ഥാനം നേടി. 'കല്ലെറിഞ്ഞാലും കുരിശിലേറ്റിയാലും സത്യവും നന്മയും സ്നേഹവും ഉയർത്തെഴുന്നേൽക്കും' എന്ന സന്ദേശം സമൂഹത്തിന് കൈമാറി നാടകത്തിൻ്റെ പ്രമേയം ശ്രദ്ധേയമായി. തുടർച്ചയായി പത്താം തവണയാണ് ജില്ലയിൽ കോക്കല്ലൂർ സ്കൂൾ നാടക മത്സരത്തിൽ ഒന്നാം സ്ഥാനം നേടുന്നത്.
advertisement
നാടകത്തിലെ പ്ലസ് വൺ വിദ്യാർഥിനി ജെ.എസ്. വൈഷ്ണവി മികച്ച നടിയായി തെരഞ്ഞെടുക്കപ്പെട്ടു. എൽ.എസ്. സുമന, എ.എസ്. അശ്വിനി, ഗൗതം ആദിത്യൻ, എസ്.ജി. ഗൗരി പാർവ്വതി, ജെ.എസ്. വൈഷ്ണവി, ആർ.പി. ഘനശ്യാം, സഹജ് വിനോദ്, ശ്രിയാ ലക്ഷ്മി ശ്രീജിത്ത്, ജെ.എസ്. വേദിക, എസ്. വേദ രാജീവ് എന്നിവരാണ് നാടകത്തിൽ വേഷമിട്ടത്. വിനോയ് തോമസിൻ്റെ വിശുദ്ധ മഗ്ദലന മറിയത്തിൻ്റെ പള്ളി എന്ന കഥയുടെ സ്വതന്ത്ര ആവിഷ്ക്കാരമാണ് നാടകം. എച്ച് .എസ്.എസ്. വിഭാഗത്തിൽ നാല് നാടകങ്ങൾക്ക് എ ഗ്രേഡ് ലഭിച്ചു.
ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Kozhikode [Calicut],Kozhikode,Kerala
First Published :
November 29, 2025 2:04 PM IST
മലയാളം വാർത്തകൾ/ വാർത്ത/Kozhikkod/
കോഴിക്കോട് കലോത്സവത്തിൽ ഒന്നാം സ്ഥാനം കരസ്ഥമാക്കി കോക്കല്ലൂർ ഹയർ സെക്കൻഡറിയുടെ നാടകം 'കുരിശ്'


