'പത്തനാപുരം ഡിപ്പോ അടച്ചുപൂട്ടാനുള്ള ഉത്തരവിനു പിന്നിൽ പഞ്ചായത്ത് സെക്രട്ടറിയുടെ ധാർഷ്ട്യം': ഗണേഷ് കുമാർ

കൊല്ലം: പത്തനാപുരം കെഎസ്ആർടിസി ഡിപ്പോ അടച്ചു പൂട്ടാൻ ഉത്തരവ്. ഡിപ്പോയിലെ ബസുകൾ റൂട്ടുകളുടെ സൗകര്യാർത്ഥം സമീപ ഡിപ്പോകളിലേക്ക് മാറ്റാനാണ് എക്സിക്യൂട്ടീവ് ഡയറക്ടറുടെ ഉത്തരവ്. ഡിപ്പോ പ്രവർത്തിക്കുന്ന ഭൂമി തിരികെ നൽകണമെന്ന് പഞ്ചായത്ത് ആവശ്യപ്പെട്ടതാണ് കാരണമെന്നണ് ഉത്തരവിൽ സൂചിപ്പിക്കുന്നത്. സംഭവത്തിൽ പ്രതികരണവുമായി കെ ബി ഗണേഷ് കുമാർ എംഎൽഎ രംഗത്ത് വന്നു, ഡിപ്പോ അടച്ചുപൂട്ടാനുള്ള ഉത്തരവിന് പിന്നിൽ പ‍ഞ്ചായത്ത് സെക്രട്ടറിയുടെ ധാർഷ്ട്യമെന്ന് എംഎൽഎ ന്യൂസ് 18നോട് പറഞ്ഞു.

”കെഎസ്ആർടിസി ലാഭകരമാക്കുന്നതിന്റെ ഭാഗമായി ബസ് ടീ ഷോപ്പിന് വേണ്ടി വാടകയ്ക്ക് കൊടുത്തു. ഇതു അഴിമതിയാണെന്ന് കോൺഗ്രസ് പഞ്ചായത്തംഗം ബഹളമുണ്ടാക്കി. പഞ്ചായത്ത് പ്രസിഡന്റിന്റെ നിർദേശപ്രകാരം പഞ്ചായത്ത് സെക്രട്ടറി അതി രൂക്ഷമായ ഭാഷയിൽ കെഎസ്ആർടിസി എംഡിക്ക് കത്തെഴുതി. ലീസിന്റെ കാലാവധി കഴിഞ്ഞാൽ അതു പുതുക്കണമെന്ന് ആവശ്യപ്പെടുന്നതിന് പകരം ഒഴിഞ്ഞുപോകണമെന്നാണ് കത്തിൽ ആവശ്യപ്പെട്ടത്. ധാർഷ്ട്യം നിറഞ്ഞ വാക്കുകളാണ് കത്തിൽ ഉപയോഗിച്ചിരിക്കുന്നത്. വകുപ്പ് മന്ത്രി ഇക്കാര്യം അറിഞ്ഞിട്ടില്ല. പഞ്ചായത്തും എംഡിയും തമ്മിലുള്ള തർക്കമാണ് പുതിയ ഉത്തരവിന് പിന്നിൽ”- കെ ബി ഗണേഷ് കുമാർ എംഎൽഎ പറഞ്ഞു.

”പഞ്ചായത്ത് സിഎംഡിയെ കണ്ട് ചർച്ച ചെയ്യട്ടെ. അവിടെ തീർന്നില്ലെങ്കിൽ ഞാൻ ഇടപെടാം. ആന്റണി രാജു ഇക്കാര്യം അറിഞ്ഞിട്ടില്ല. ഫേസ്ബുക്കിൽ എയർ കണ്ടീഷനിൽ ഇരുന്ന് കുത്തിക്കുറിക്കുന്നവർക്ക് എന്തും എഴുതാമല്ലോ”- ഗണേഷ് കുമാർ പറഞ്ഞു.

Also Read- ഭൂമി തിരികെ ചോദിച്ച് പഞ്ചായത്ത്; പത്തനാപുരം കെഎസ്ആർടിസി ഡിപ്പോ അടച്ചു പൂട്ടാൻ ഉത്തരവ്

പതിറ്റാണ്ടുകൾ നീളുന്ന സമരങ്ങൾക്കൊടുവിൽ 2001ലാണ് ഡിപ്പോ പ്രവർത്തനം തുടങ്ങിയത്. പാട്ട വ്യവസ്ഥയിൽ പഞ്ചായത്ത് നൽകിയ ഒരേക്കർ ഭൂമിയിലാണ് പത്തനാപുരം ഡിപ്പോ ഇപ്പോൾ പ്രവർത്തിക്കുന്നത്. കോവിഡിന് മുൻപ് 50 ഓളം സർവീസുകൾ ഉണ്ടായിരുന്ന ഡിപ്പോയിൽ നേരത്തെ തന്നെ പകുതിയോളം ബസുകൾ മറ്റു ഡിപ്പോകളിലേക്ക് മാറ്റിയിരുന്നു. ഇതിൽ പ്രതിഷേധം ശക്തമായതിനെ തുടർന്നു കുറച്ചു ബസുകൾ തിരികെയെത്തിച്ചു. നിലവിൽ 33 ബസുകളാണ് സർവീസ് നടത്തുന്നത്. മലയോര മേഖലയിൽ കുറഞ്ഞ ദൂരം ഓടി കൂടുതൽ വരുമാനം നേടുന്ന ഡിപ്പോയാണ് ഇതോടെ ഇല്ലാതാകുന്നത്.

റൂട്ടുകളുടെ സൗകര്യം അനുസരിച്ച് ഡിപ്പോയിലെ ബസുകൾ കോന്നി, അടൂർ, പുനലൂർ, കൊട്ടാരക്കര ഡിപ്പോകളിലേക്ക് മാറ്റുന്നതിനാണ് നിർദേശം. ഏതൊക്കെ ഡിപ്പോകളിലേക്ക് ബസുകൾ മാറ്റണമെന്ന് യൂണിറ്റ് തലത്തിൽ യോഗം ചേർന്ന് തീരുമാനമെടുത്ത് അറിയിക്കണമെന്നും ഉത്തരവിൽ പറയുന്നു.