'സമരസമയത്ത് നേതാക്കളുടെ മക്കൾ തിരിഞ്ഞുനോക്കിയില്ല'; വിമർശനവുമായി KSU സംസ്ഥാന പ്രസിഡന്റ് കെ എം അഭിജിത്ത്

തിരുവനന്തപുരം: കോൺഗ്രസ് നേതാക്കൾക്കെതിരെ വിമർശനവുമായി കെ.എസ്.യു സംസ്ഥാന പ്രസിഡന്റ് കെ എം അഭിജിത്ത്. പി.എസ്.സിയുടെയും സർവകലാശാലയുടെയും പരീക്ഷാ ക്രമക്കേടിനെതിരെ തിരുവനന്തപുരത്ത് സമരം നടന്നപ്പോൾ ചില കോൺഗ്രസ് നേതാക്കളുടെ മക്കൾ തിരിഞ്ഞുനോക്കിയില്ലെന്ന് അഭിജിത്ത് പറഞ്ഞു. സമരവേദിയിലേക്ക് മക്കളെ പറഞ്ഞയക്കാൻ നേതാക്കൾ തയാറായതുമില്ല. ഇത്തരം നിലപാടാണ് കോൺഗ്രസിന്റെ അപചയത്തിന് കാരണമെന്നും അഭിജിത്ത് പറഞ്ഞു. രാജീവ് ഗാന്ധി അനുസ്മരണ ചടങ്ങിലായിരുന്നു കെ.എസ്.യു നേതാവിന്റെ വിമർശനം.

• Also Read- PSC പരീക്ഷാ കോപ്പിയടിക്ക് പ്രതികൾ ഉപയോഗിച്ചത് ബ്ലൂടൂത്ത് വാച്ച്

നേതാക്കൾക്കെതിരെ ഫേസ്ബുക്കിൽ വിമർശനം എഴുതാനേ യുവാക്കൾക്ക് അറിയൂ. അതെളുപ്പമുള്ള ജോലിയാണ്. അല്ലാതൊരു പണിയും നേതാക്കൾ പഠിപ്പിച്ചില്ല. പൊതുവിഷയങ്ങളിൽ നിന്ന് മുഖംതിരിക്കരുത്. 'ഞാൻ, എന്റെ കുടുംബം' എന്ന ചെറിയ ചിന്താഗതിയിലേക്ക് കോണ്‍ഗ്രസുകാർ ചുരുങ്ങരുതെന്നും അഭിജിത്ത് പറഞ്ഞു. മുതിർന്ന നേതാവ് എ കെ ആന്റണി, കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ എന്നിവരുടെ സാന്നിധ്യത്തിലായിരുന്നു അഭിജിത്ത് വിമർശനം നടത്തിയത്.