ലൈഫ് മിഷൻ കോഴക്കേസ്; പദ്ധതി രേഖ തയ്യാറാക്കിയത് ശിവശങ്കറെന്ന് മുൻ സിഇഒ യു.വി ജോസ്

തിരുവനന്തപുരം: ലൈഫ് മിഷൻ കോഴക്കേസിൽ എം ശിവശങ്കറിനെ വെട്ടിലാക്കി ലൈഫ് മിഷൻ മുൻ സിഇഒ യു വി ജോസിന്‍റെ മൊഴി. ലൈഫ് മിഷൻ ഭവന പദ്ധതിയുടെ രേഖകൾ തയ്യാറക്കിയത് എം ശിവശങ്കർ ആണെന്ന് യുവി ജോസ് എൻഫോഴ്സ്മെന്റ് ഡയറക്ട്രേറ്റിന് മൊഴി നൽകി. സാമ്പത്തിക ഇടപാടുകളിൽ പങ്കില്ലെന്നും യു.വി ജോസ് വ്യക്തമാക്കി.

ലൈഫ് മിഷൻ കോഴക്കേസിൽ ചോദ്യം ചെയ്യലിനോട് നിസ്സഹകരണം തുടരുമ്പോഴും എം ശിവശങ്കറിനെ കുരുക്കുന്നതാണ് എൻഫോഴ്സ്മെന്റ് ഡയറക്ട്രേറ്റിന് പുതിയതായി ലഭിക്കുന്ന ഓരോ മൊഴികളും. നിർമാണ കമ്പനിയായ യുണിടാക്കിന് കരാർ ലഭിക്കാൻ ശിവശങ്കർ ഇടപെടൽ നടത്തിയെന്നാണ് ലൈഫ് മിഷൻ മുൻ സി ഇ ഒ യു വി ജോസിന്റെ മൊഴി.

Also Read- എംവി ഗോവിന്ദൻ നയിക്കുന്ന സിപിഎമ്മിന്റെ ജനകീയ പ്രതിരോധ യാത്ര; മുഖ്യമന്ത്രി പിണറായി വിജയന്‍ ഞായറാഴ്ച്ച ഉദ്ഘാടനം ചെയ്യും

ഭവന പദ്ധതിയുടെ രേഖകൾ എല്ലാം തയ്യാറാക്കി നൽകിയത് ശിവശങ്കറാണ്. കരാറിൽ ഒപ്പിടുക മാത്രമേ താൻ ചെയ്തിട്ടുള്ളൂ. സാമ്പത്തിക ഇടപാടിൽ പങ്കില്ലെന്നും പദ്ധതിക്ക് പിന്നിൽ കോഴ ഇടപാട് നടന്നിട്ടുണ്ടോ എന്ന് അറിയില്ലെന്നുമാണ് യു വി ജോസ് നൽകിയ മൊഴി. യൂണിടാക്കുമായി ഉണ്ടാക്കിയ കരാറിന്റെ രേഖകൾ ഹാജരാക്കാനും യു വി ജോസിനോട് അന്വേഷണ സംഘം നിർദ്ദേശിച്ചിരുന്നു.

Also Read- ‘ജനം വായ്പയെടുത്ത് തുടങ്ങിയ സംരംഭങ്ങള്‍ സര്‍ക്കാരിന്റേതെന്ന് പറയാന്‍ നാണമില്ലേ? ക്രിമിനലുകളെ രക്ഷിക്കാന്‍ ഖജനാവില്‍ നിന്നും കോടികള്‍ ചെലവഴിച്ചതെന്തിന്?’: വി.ഡി.സതീശൻ

കരാർ രേഖകൾ യു വി ജോസിന് ഹാജരാക്കാനായില്ല. വിരമിച്ചിട്ട് രണ്ട് വർഷമായെന്നും തന്റെ കൈശം രേഖകൾ ഇല്ലെന്നുമാണ് മറുപടി. അതേസമയം ഭവന പദ്ധതിയുടെ കരാർ രേഖകൾ ലഭിയ്ക്കാത്തത് അന്വേഷണ സംഘത്തെ വലയ്ക്കുന്നുണ്ട്.

ലൈഫ് മിഷൻ പദ്ധതിയിൽ ആരോപണം ഉണ്ടായപ്പോൾ സംസ്ഥാന സർക്കാർ വിജിലൻസ് അന്വേഷണത്തിന് ഉത്തരവിട്ടിരുന്നു. രേഖകൾ വിജിലൻസിന്റെ കെെവശമാണ് ഇപ്പോഴുള്ളത്. അതേസമയം ശിവശങ്കറിന്റെ ചോദ്യം ചെയ്യൽ നാലാം ദിവസവും തുടരുകയാണ്.