രണ്ട് പേരുടെ മരണത്തിനിടയാക്കിയ മലയാറ്റൂർ പാറമട സ്ഫോടനം; ഉടമ അറസ്റ്റിൽ

എറണാകുളം:  മലയാറ്റൂരിൽ വെടിമരുന്ന് പൊട്ടിത്തെറിച്ച് 2 പേർ മരിച്ച സംഭവത്തിൽ പാറമട ഉടമ അറസ്റ്റിൽ. വിജയ പാറമട  ഉടമ ബെന്നി പുത്തേൻ ആണ് അറസ്റ്റിൽ ആയത്. പ്രത്യേക അന്വേഷണ സംഘം ബംഗളൂരുവിൽ നിന്ന് ഇയാളെ പിടികൂടുകയായിരുന്നു.

ഒരാഴ്ച്ച നീണ്ടു നിന്ന തിരച്ചിലിനൊടുവിലാണ് ബെന്നിയെ പോലീസ് പിടികൂടിയത്.  ബംഗ്ലൂരിൽ നിന്നും ആന്ധ്രയിലേക്ക് കടക്കാൻ ശ്രമിക്കുന്നതിനിടെയാണ്  അറസ്റ്റ്.  ഇന്നലെ പാറമടയുടെ  മാനേജർ കാലടി സ്വദേശി രഞ്ജിത്ത് രവിയെയും ജീവനക്കാരനായ മലയാറ്റൂർ സ്വദേശി അജേഷ് ശ്രീധറിനെയും അറസ്റ്റ് ചെയ്തിരുന്നു. ഇവരിൽ നിന്നാണ് പ്രതി ഒളിവിൽ കഴിയുന്ന സ്ഥലത്തെക്കുറിച്ച് വിവരം ലഭിച്ചത്. തുടർന്ന് പോലീസ് എത്തി അറസ്റ്റ് ചെയ്യുക ആയിരുന്നു.

Also Read-അശ്ലീല വീഡിയോ; യൂട്യൂബറെ മർദ്ദിച്ച സംഭവത്തിൽ ഭാഗ്യലക്ഷ്മി ഉൾപ്പെടെ മൂന്നു പേർക്കെതിരെ ജാമ്യമില്ലാ കേസ്

പാറമട അപകടം നടന്ന തിങ്കളാഴ്ച തന്നെ ഉടമയായ ബെന്നി മലയാറ്റൂർ നിന്നും കടന്നിരുന്നു. ബാംഗ്ലൂരിലേക്ക് ആണ് പോയതെന്ന് പോലീസിന് വിവരം ലഭിച്ചിരുന്നു. ഇതിനെത്തുടർന്നാണ് പോലീസ് ബംഗലൂരു കേന്ദ്രീകരിച്ച് അന്വേഷണം നടത്തിയതും പ്രതിയെ പിടി കൂടിയതും. പാറമട ഉടകളിൽ ഒരാളായ റോബിൻസിനെ കൂടി പിടികൂടാൻ ഉണ്ട്. ഇയാൾക്കായുള്ള തിരച്ചിൽ പോലീസ് ഊർജിതമാക്കിയിട്ടുണ്ട്.

Also Read-'ഞാൻ തലയിൽ മുണ്ടിട്ട് ജയിലിൽ പോകില്ല; ജാമ്യമില്ലാ വകുപ്പ് പ്രകാരം കേസെടുത്താൽ നേരിടും': ഭാഗ്യലക്ഷ്മി


പാറമടയ്ക്ക് ലൈസൻസ് ഉണ്ടായിരുന്നെങ്കിലും ഇത് സൂക്ഷിച്ചിരുന്ന കെട്ടിടത്തിന് അനുമതി ഉണ്ടായിരുന്നില്ല. മാത്രമല്ല അനുവദനീയമായതിലും കൂടുതൽ സ്ഫോടക വസ്തുക്കൾ സൂക്ഷിച്ചിരുന്നതായും അന്വേഷണത്തിൽ കണ്ടെത്തിയിരുന്നു. ഇതിനെത്തുടർന്നാണ് പോലീസ് കേസെടുത്തു അന്വേഷണം നടത്തിയത്. സംഭവത്തിൽ മജിസ്റ്റീരിയൽ അന്വേഷണം ജില്ല കളക്ടർ പ്രഖ്യാപിച്ചിരുന്നു.