• News
  • Mission Paani
  • Sports
  • Films
  • Gulf
  • Life
  • Career
  • Crime
  • Photos
  • Video
  • Buzz
  • Live TV

പ്രളയ ബാധിതർക്ക് കൈത്താങ്ങാവാൻ കൃത്രിമക്കാലും ഡയാലിസിസ് അഡാപ്റ്ററും ശ്യാം കുമാറിന് തടസ്സമല്ല; യുവാവിനെ പ്രകീർത്തിച്ച് മന്ത്രി തോമസ് ഐസക്

Meet Shyam Kumar, a flood relief worker who surpasses physical difficulties to be a helping hand for others | തിരുവനന്തപുരം നഗരസഭയുടെ കളക്ഷൻ പോയിന്റിൽ നിന്നാണ് ധനമന്ത്രി തോമസ് ഐസക് ശ്യാമിനെ പരിചയപ്പെടുന്നത്. മറ്റുള്ളവർക്ക് മാതൃകയാണ് ഈ യുവാവിന്റെ ജീവിത പുസ്തകം

news18-malayalam
Updated: August 15, 2019, 11:29 AM IST
പ്രളയ ബാധിതർക്ക് കൈത്താങ്ങാവാൻ കൃത്രിമക്കാലും ഡയാലിസിസ് അഡാപ്റ്ററും ശ്യാം കുമാറിന് തടസ്സമല്ല; യുവാവിനെ പ്രകീർത്തിച്ച് മന്ത്രി തോമസ് ഐസക്
മന്ത്രി തോമസ് ഐസക്ക് ശ്യാമിനൊപ്പം; ശ്യാം കുമാർ സൈക്കിൾ സവാരിയിൽ
  • Share this:
ഇന്ന് സ്വാതന്ത്ര്യ ദിനം. ശ്യാമിനെ വിളിക്കുമ്പോൾ കേൾക്കുന്ന റിങ്ടോൺ 'മാ തുജേ സലാം'. അധികം വൈകാതെ മറുതലക്കൽ ശ്യാം സംസാരിക്കുന്നു. ശ്യാം തിരക്കിലാണോ? "അതെ." പ്രളയ ദുരിത ബാധിതർക്ക് കൈതാങ്ങാവാൻ ഇറങ്ങിത്തിരിച്ച ഈ യുവാവിന് എന്തിനേക്കാളും ഇപ്പോൾ മുഖ്യം അവരുടെ വിശപ്പും ദാഹവും അകറ്റലും ജീവിതം കരുപ്പിടിപ്പിക്കാനുള്ള സഹായം ആവുകയാണെന്നതുമാണ്.

ചോദ്യം: എത്ര ലോഡ് സാധനം കയറ്റി?

ഉത്തരം: അത് കൃത്യമായി അറിയില്ല.

ചെയ്യുന്നതിന്റെ അളവും, തൂക്കവും, എണ്ണവും ഒന്നും ശ്യാമിന്റെ മനസ്സിലെ കണക്കു പുസ്തകത്തിൽ കുറിച്ചിട്ടില്ല. തിരക്കിലാണ് ഈ യുവാവ്. ഇനിയും ശ്യാമിന്റെ ജോലിയെ തടസ്സപ്പെടുത്താൻ ആവില്ല.

ഒട്ടനവധി ചെറുപ്പക്കാർ ദുരിതാശ്വാസ പ്രവർത്തനത്തിന് ഏർപ്പെടുമ്പോൾ എന്തിനു ശ്യാം കുമാർ എന്ന ഈ ബിരുദ വിദ്യാർത്ഥിയെപ്പറ്റി മാത്രം പറയണം എന്ന് ചിന്തിച്ചോ? കാരണം ഇതാണ്. ശ്യാമിനെ കണ്ടെത്തുന്നത് ധനമന്ത്രി തോമസ് ഐസക്കാണ്. തിരുവനന്തപുരം നഗരസഭയുടെ കളക്ഷൻ പോയിന്റിൽ നിന്നാണ് അദ്ദേഹം ശ്യാമിനെ പരിചയപ്പെടുന്നത്. ഇനി ആ പോസ്റ്റ് സംസാരിക്കും, ഇതാണ് ശ്യാം, ഇങ്ങനെയാണ് ആ ജീവിതം.

തിരുവനന്തപുരം കോർപറേഷനിൽ പരിചയപ്പെട്ട ശ്യാം കുമാർ എന്ന സന്നദ്ധപ്രവർത്തകനെ കേരളമറിയണം. എംജി കോളജിലെ സൈക്കോളജി വിദ്യാർത്ഥിയാണ്. മുറിച്ചു കളഞ്ഞ വലതുകാലിനുപകരം കൃത്രിമകാലുപയോഗിച്ചാണ് നടക്കുന്നത്. ശരീരത്തിൽ ഡയാലിസിസിനാവശ്യമായ അഡാപ്റ്റർ ഘടിപ്പിച്ചിട്ടുണ്ട്. രണ്ടു മണിക്കൂർ‍ ഇടവിട്ട് ട്യൂബിട്ട് മൂത്രം എടുക്കണം. ഇതിനോടകം കഴിഞ്ഞത് പതിനാലു ശസ്ത്രക്രിയകൾ. എന്നാൽ ശരീരത്തിൻ്റെ ഈ പരിമിതികളൊന്നും വകവെയ്ക്കാതെ പ്രളയദുരിതാശ്വാസത്തിനുള്ള കളക്ഷൻ ക്യാമ്പിൽ തന്നാലാവുംവിധം കൈമെയ് മറന്ന് അധ്വാനിക്കുകയാണ് ശ്യാം. ശ്യാമിനെപ്പോലുള്ള നന്മയുടെ തുടിപ്പുകളാണ് അതിജീവനത്തിന്റെ തോണി തുഴയുന്നത്. അതു ലക്ഷ്യം കാണുകതന്നെ ചെയ്യും.ഞാൻ ചെല്ലുമ്പോൾ വിവിധ സ്ഥലത്തേക്കു കൊണ്ടുപോകാനായി ദുരിതാശ്വാസ സാമഗ്രികൾ‍ പായ്ക്കു ചെയ്യുകയാണ് ശ്യാം കുമാർ. വലതു കാലിനുപകരം കൃത്രിമ കാലുപയോഗിച്ചു നടക്കുന്നു എന്ന കൗതുകത്തിലാണ് ശ്യാമിനോട് സംസാരിച്ചത്. ഈ കൃത്രിമ കാലുപയോഗിച്ച് അടുത്തകാലം വരെ സൈക്കിൾ ചവിട്ടുകയും നീന്തുകയുമൊക്കെ ചെയ്യുമെന്നറിയുമ്പോൾ സ്വാഭാവികമായും ആദരവും വിസ്മയവും തോന്നുമല്ലോ. കാട്ടാക്കടയിലെ വീട്ടിൽ‍ നിന്ന് തിരുവനന്തപുരം നഗരത്തിലേക്കു മാത്രമല്ല, പുറം ജില്ലകളിലേക്കു വരെ ശ്യാം സൈക്കിൾ‍ ചവിട്ടി പോയിട്ടുണ്ട്. ഈ അവസ്ഥയിലും തെങ്ങു കയറാനും ഫുട്ബോൾ‍ കളിക്കാനുമൊക്കെ ശ്യാമിന് ആവേശമായിരുന്നു.

പക്ഷേ, കൂടുതൽ സംസാരിച്ചപ്പോൾ കൌതുകം, അമ്പരപ്പും സങ്കടവും വേദനയും അത്ഭുതവുമൊക്കെയായി കൂടിക്കുഴഞ്ഞു. ശ്യാമിൻ്റെ ശരീരത്തിൽ‍ മൂന്നു വൃക്കകളുണ്ട്. ഡ്യൂപ്ലെക്സ് സിസ്റ്റം എന്ന് വൈദ്യശാസ്ത്ര വിദഗ്ധർ പറയും. വലതുവശത്ത് രണ്ടുവൃക്കകൾ‍ ഒന്നിനു മുകളിൽ‍ ഒന്നായി സ്ഥിതി ചെയ്യുന്നു. അതുകൊണ്ടുതന്നെ ഇവയുടെ പ്രവർ‍ത്തനം സാധാരണനിലയ്ക്കല്ല.



ശ്യാമിൻ്റെ മൂത്രസഞ്ചിക്കാകട്ടെ മൂന്നു വയസ്സുകാരൻ്റെ മൂത്രസഞ്ചിയുടെ വലുപ്പമേയുള്ളു. അതിനാൽ വൃക്കകളിൽ‍ നിന്ന് മൂത്രസഞ്ചിയിലെത്തുന്ന മൂത്രം കവിഞ്ഞ് തിരികെ വൃക്കകളിലേക്കു പടരും. റിഫ്ലെക്ട് ആക്ഷൻ‍ എന്നാണ് ഇതിനു പറയുന്നതെന്ന് ശ്യാം തന്നെ വിശദീകരിച്ചു തന്നു. ഇതുമൂലം മൂന്നാമത്തെ വൃക്കയും തകരാറിലായി. ട്യൂബ് ഉപയോഗിച്ചാണ് ഇപ്പോൾ‍ മൂത്രം പുറത്തേക്കെടുക്കുന്നത്.

ശ്യാമിൻ്റെ വലതുകാൽ‍ ജന്മനാ മടങ്ങിയ സ്ഥിതിയിലായിരുന്നു. കാല്‍ നിവർ‍ത്താനാകാതെ വന്നപ്പോൾ‍ ശസ്ത്രക്രിയ ചെയ്ത് നീക്കം ചെയ്തു. പത്താമത്തെ വയസ്സിലായിരുന്നു കാല്‍ മുറിച്ചുമാറ്റിയത്.

ഇതിനോടകം പതിനാല് ശസ്ത്രക്രിയകൾ‍ നടത്തിക്കഴിഞ്ഞു. ആദ്യത്തെ പന്ത്രണ്ടെണ്ണത്തിനും ആരുടേയും സഹായം തേടിയില്ല. പക്ഷേ, പണച്ചെലവുണ്ടായ പതിമൂന്നും പതിനാലും ശസ്ത്രക്രിയകൾ‍ക്ക് മറ്റുള്ളവരുടെ സഹായം തേടേണ്ടി വന്നു. അച്ഛൻ ശ്രീകുമാർ കൂലിപ്പണിക്കാരനാണ്. കഴിഞ്ഞ മൂന്നുമാസമായി കോളജിൽ‍ പോകുമ്പോഴും മറ്റും മൂത്രം പോകാനുള്ള ട്യൂബും സഞ്ചിയുമൊക്കെ ശരീരത്തിലുണ്ടാകും.

ഇപ്പോൾ‍ കഠിനമായ പ്രവൃത്തികളൊന്നും ചെയ്യാൻ‍ ശ്യാമിനാകില്ല. ഭാരമൊന്നും ഉയർ‍‍ത്താനാകില്ല. കളക്ഷൻ‍ സെൻ്ററിൽ പായ്ക്കിംഗും കോർഡിനേഷനുമായി ശ്യാം ഓടിനടക്കുന്നു. കഴിഞ്ഞ രണ്ടുമൂന്നു ദിവസമായി ഉറക്കമിളച്ചുള്ള പണി.

രോഗത്തിൻ്റെ മൂർ‍ധന്യാവസ്ഥ കാരണം ഇപ്പോൾ‍ സൈക്ലിംഗ് ഒന്നും ചെയ്യാനാകുന്നില്ലെന്നു പറയുമ്പോൾ‍ ശ്യാമിൻ്റെ കണ്ണു നിറയുകയും വാക്കുകൾ‍ ഇടറുകയും ചെയ്യുന്നുണ്ട്. രണ്ടാഴ്ച ഒരേ കിടപ്പായിരുന്നു. ഇനി ചെയ്യേണ്ട ശസ്ത്രക്രിയക്ക് വളരെ വലിയ തുക വേണം. അത് സങ്കീർ‍ണമാണ്. വൃക്കകളുടെ പ്രവർ‍ത്തനം ഇപ്പോൾ‍ 23 ശതമാനം മാത്രമാണ്. 20 ശതമാനത്തിലേക്കു താഴ്ന്നാൽ‍ ഡയാലിസിസ് വേണ്ടിവരും. പല രോഗങ്ങൾക്കായി 30 ഗുളികയോളം ശ്യാം കഴിക്കുന്നുണ്ട്. എന്നിട്ടും തളരാതെയാണ് ട്യൂബ് ഘടിപ്പിച്ച ശരീരവുമായി ശ്യാം ദുരിതാശ്വാസ ക്യാംപിൽ‍ ഓടി നടക്കുന്നത്. 
ആ മനക്കരുത്തിനു മുന്നിൽ വിസ്മയം പൂകാനേ കഴിയൂ. ഇതുപോലുള്ള മനുഷ്യരുടെ ആത്മബലത്തോടെ കേരളം കരകയറുക തന്നെ ചെയ്യും.

Follow Malayalam.News18.com on Facebook, Youtube, Helo, Sharechat, Twitter and Instagram

First published: August 15, 2019
കൂടുതൽ കാണുക
അടുത്തത് വാര്‍ത്തകള്‍