നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • kerala
    • »
    • നെയ്യാറ്റിൻകര ആത്മഹത്യ: ഒഴിവാക്കാമായിരുന്ന ദുരന്തം; കുറ്റക്കാർക്കെതിരെ കർശന നടപടിയെന്ന് മന്ത്രി തോമസ് ഐസക്

    നെയ്യാറ്റിൻകര ആത്മഹത്യ: ഒഴിവാക്കാമായിരുന്ന ദുരന്തം; കുറ്റക്കാർക്കെതിരെ കർശന നടപടിയെന്ന് മന്ത്രി തോമസ് ഐസക്

    ലോൺ എഴുതിത്തള്ളണമെന്നാവശ്യപ്പെട്ടൊന്നും ആ കുടുംബം ബാങ്കിനെ സമീപിച്ചിട്ടില്ല. അവരാകെ ആവശ്യപ്പെട്ടത് അൽപം സാവകാശമാണ്

    ധനമന്ത്രി തോമസ് ഐസക്

    ധനമന്ത്രി തോമസ് ഐസക്

    • News18
    • Last Updated :
    • Share this:
      തിരുവനന്തപുരം: നെയ്യാറ്റിൻകരയിൽ അമ്മയും മകളും ആത്മഹത്യ ചെയ്ത സംഭവം ഞെട്ടൽ ഉണ്ടാക്കിയെന്ന് മന്ത്രി തോമസ് ഐസക്. സർക്കാരിനോട് സമ്മതിച്ച മൊറട്ടോറിയം കാലത്ത് കർശനമായ ജപ്തി നടപടികളിലേയ്ക്ക് നീങ്ങാൻ ബാങ്ക് ഉദ്യോഗസ്ഥർ നിർബന്ധിതരായിട്ടുണ്ടെങ്കിൽ അതിനുള്ള സാഹചര്യമെന്തെന്നതാണ് അതിഗൗരവതരമായ പ്രശ്നമാണ്.

      കിടപ്പാടം ജപ്തി ചെയ്യാൻ ബാങ്ക് ശ്രമിച്ചതാണ് ഈ ദൗർഭാഗ്യകരമായ സാഹചര്യം സൃഷ്ടിച്ചതെന്നതാണ് ആക്ഷേപം. അത് വിശദമായി പരിശോധിച്ച് കുറ്റക്കാരായവർക്കെതിരെ കർശന നിയമനടപടിയും ഉണ്ടാകുമെന്നാണ് മന്ത്രി ഫേസ്ബുക്ക് പോസ്റ്റിലൂടെ അറിയിച്ചത്.

      Also Read-പതിനാലാം തീയതി കടം തീർക്കാമെന്ന് ഒപ്പിട്ടു നൽകി: അമ്മയും മകളും മരണം തെരഞ്ഞെടുത്തത് അതേ ദിവസം

      സ്ഥലത്തെ ജനപ്രതിനിധി കൂടി സാവകാശം ആവശ്യപ്പെട്ട് ഇടപെട്ടിരുന്നു. ആ അഭ്യർഥന ബാങ്ക് മാനിച്ചിരുന്നുവെങ്കിൽ ദുരന്തം ഒഴിവാകുമായിരുന്നുവെന്നും ഐസക് പറയുന്നു.

      തോമസ് ഐസകിന്റെ എഫ് ബി പോസ്റ്റിന്റെ പൂർണ്ണരൂപം

      നെയ്യാറ്റിൻകര മാരായമുട്ടത്ത് ഒരമ്മയും മകളും ജീവനൊടുക്കിയ വാർത്ത ഞെട്ടൽ ഉണ്ടാക്കുന്നതാണ്. പ്രളയത്തിന്റെ പശ്ചാത്തലത്തിൽ കാർഷിക കടങ്ങൾ മാത്രമല്ല, മറ്റു കടങ്ങൾക്കും ഒക്ടോബർ വരെ മൊറോട്ടോറിയത്തിന് ബാങ്കുകൾ സമ്മതിച്ചിരുന്നു. എസ്എൽബിസിയിൽ സർക്കാരിനു നൽകിയ ഉറപ്പ് ലംഘിച്ച് ബാങ്ക് അധികൃതർ കടുത്ത നടപടികളെടുത്തോ എന്നത് അതീവ ഗൗരവതരമായ പ്രശ്നമാണ്. ഇത് വിശദമായിത്തന്നെ പരിശോധിക്കും.

      വായ്പയെടുത്ത് ഒരു തുകയും തിരിച്ചടയ്ക്കാതെ ബാങ്കിനെ കബളിപ്പിക്കുന്ന സമീപനം സ്വീകരിച്ച ഒരു കുടുംബമല്ല എന്നതാണ് മനസിലാക്കേണ്ടത്. തിരിച്ചടവിന് ബാക്കിയുള്ള തുക ആകെയുള്ള സമ്പാദ്യം വിറ്റ് വീട്ടാൻ നെട്ടോട്ടമോടുകയായിരുന്നു അവർ. അതിനുള്ള സാവകാശം ലഭിക്കില്ലെന്ന തോന്നൽ ആ അമ്മയ്ക്കും മകൾക്കും ഉണ്ടായത് എങ്ങനെയെന്നത് വിശദമായിത്തന്നെ പരിശോധിക്കണം. പ്രത്യേകിച്ച് അവിടുത്തെ എംഎൽഎ അവർക്കൊരു സാവകാശം കൊടുക്കണമെന്ന് ആവശ്യപ്പെട്ട പശ്ചാത്തലം കൂടിയുണ്ട്.

      വായ്പത്തുക തിരികെ ലഭിക്കാൻ ധനകാര്യസ്ഥാപനങ്ങൾ ശ്രമിക്കുമ്പോൾ എല്ലാ സാഹചര്യങ്ങളും കരുണയോടെ പരിശോധിക്കണം. എന്തു ജപ്തി ചെയ്യേണ്ടി വന്നാലും താമസിക്കുന്ന വീട് ജപ്തി ചെയ്യാൻ പാടില്ല എന്നാണ് എൽഡിഎഫ് സർക്കാരിന്റെ നിലപാട്. ഇവിടെ കിടപ്പാടം ജപ്തി ചെയ്യാൻ ബാങ്ക് ശ്രമിച്ചതാണ് ഈ ദൗർഭാഗ്യകരമായ സാഹചര്യം സൃഷ്ടിച്ചതെന്നതാണ് ആക്ഷേപം. അത് വിശദമായി പരിശോധിക്കും. കുറ്റക്കാരായവർക്കെതിരെ കർശന നിയമനടപടിയും ഉണ്ടാകും.

      ഇത്തരം ദുരന്തങ്ങൾ ആവർത്തിക്കില്ലെന്ന് ഉറപ്പുവരുത്താൻ അടിയന്തര നടപടികൾ സ്വീകരിക്കണമെന്ന് ബാങ്ക് മേധാവികളോട് ആവശ്യപ്പെടുകയാണ്. സർക്കാരിനു നൽകിയ ഉറപ്പ് പാലിക്കപ്പെടുക തന്നെ വേണം. മറ്റു കാര്യങ്ങൾ അടുത്ത എസ്എൽബിസി യോഗത്തിൽ തീരുമാനിക്കാം.

      കോടാനുകോടികൾ കട്ടുമുടിച്ച് നാടുവിടാൻ കാട്ടുകള്ളന്മാർക്ക് പഴുതും സംരക്ഷണവും നൽകിയവരാണ് കേന്ദ്രസർക്കാർ. ആ കൊള്ള മുതൽ തിരിച്ചു പിടിക്കാൻ വഴിയില്ലാതായതിന്റെ പ്രതിസന്ധിയും സമ്മർദ്ദവും ബാങ്കുകളുടെ മേലുണ്ട്. പക്ഷേ, പ്രളയക്കെടുതിയിൽ നടുവൊടിഞ്ഞു കിടക്കുന്നവരെ ഊറ്റിപ്പിഴിഞ്ഞല്ല, കിട്ടാക്കടം നികത്തേണ്ടത്.

      ലോൺ എഴുതിത്തള്ളണമെന്നാവശ്യപ്പെട്ടൊന്നും ആ കുടുംബം ബാങ്കിനെ സമീപിച്ചിട്ടില്ല. അവരാകെ ആവശ്യപ്പെട്ടത് അൽപം സാവകാശമാണ്. വീടും പറമ്പും വിറ്റ് ബാങ്കിന്റെ കടംവീട്ടാൻ അവർ നടത്തിയ ശ്രമം ആ നാട്ടുകാർക്കറിയാം.

      എംഎൽഎ ആവശ്യപ്പെട്ട സാവകാശം ആ കുടുംബത്തിനു നൽകിയിരുന്നെങ്കിൽ ഈ ദുരന്തം ഒഴിവാക്കാനാകുമായിരുന്നു. സർക്കാരിനോട് സമ്മതിച്ച മൊറട്ടോറിയം കാലത്ത് കർശനമായ ജപ്തി നടപടികളിലേയ്ക്ക് നീങ്ങാൻ ബാങ്ക് ഉദ്യോഗസ്ഥർ നിർബന്ധിതരായിട്ടുണ്ടെങ്കിൽ അതിനുള്ള സാഹചര്യമെന്തെന്നതാണ് അതിഗൗരവതരമായ പ്രശ്നം

      First published:
      )}