ഇനി മൈസൂരുവിലേക്ക് കേരളത്തിൽ നിന്നും നേരേ ട്രെയിനിൽ പോകാം; ആദ്യ യാത്ര 26ന്

തിരുവനന്തപുരം: കൊച്ചുവേളിയില്‍ നിന്ന് മൈസൂരുവിലേക്ക് പ്രതിദിന ട്രെയിന്‍ സര്‍വീസ് ആരംഭിക്കുന്നു. ആദ്യയാത്ര ഈമാസം 26ന്. നിലവിലെ കൊച്ചുവേളി- ബംഗളൂരു ട്രെയിന്‍ മൈസൂരുവിലേക്ക് നീട്ടുന്നതോടെയാണ് ഇത് സാധ്യമാകുക. ഇപ്പോൾ കേരളത്തിൽ നിന്നും മൈസൂരുവിലേക്കു പോകണമെങ്കില്‍ ബസില്‍ യാത്രചെയ്യണം. അല്ലെങ്കില്‍ ബംഗളൂരുവില്‍ ട്രെയിനിറങ്ങി പാസഞ്ചര്‍ ട്രെയിനിനെ ആശ്രയിക്കണം. ഈ അവസ്ഥയ്ക്കാണ് 26 മുതല്‍ മാറ്റം വരുന്നത്.

കൊച്ചുവേളി-ബംഗളൂരു പ്രതിദിന ട്രെയിനിന്റെ സമയക്രമം മാറ്റാതെയാണ് 139 കിലോമീറ്റർ അകലെയുളള മൈസൂരുവിലേക്കു നീട്ടുന്നത്. ബംഗളൂരുവിനും മൈസൂരുവിനുമിടയില്‍ മാണ്ഡ്യയില്‍ സ്‌റ്റോപ്പുണ്ടാകും.

• Pala By Election LIVE: വോട്ടെടുപ്പ് തുടങ്ങി; പോളിങ് വൈകിട്ട് ആറുവരെ

വൈകിട്ട് 4.45ന് കൊച്ചുവേളിയില്‍ നിന്നും പുറപ്പെടുന്ന ട്രെയിന്‍ പിറ്റേന്നു രാവിലെ 8.35നു ബംഗളൂരുവിലും 11.20നു മൈസൂരുവിലും എത്തും. 12.50നു മൈസൂരുവില്‍ നിന്നും പുറപ്പെട്ട് വൈകിട്ട് 4.35നു ബംഗളൂരുവിലെത്തും. പിറ്റേന്നു രാവിലെ 9.35ന് കൊച്ചുവേളിയിലെത്തും.