നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • kerala
    • »
    • 67 KSRTC ബസ് സ്റ്റേഷനുകളോട് ചേർന്ന് പെട്രോൾ- ഡീസൽ പമ്പുകൾ വരുന്നു; പൊതുജനങ്ങൾക്കും ഇന്ധനം നിറയ്ക്കാം

    67 KSRTC ബസ് സ്റ്റേഷനുകളോട് ചേർന്ന് പെട്രോൾ- ഡീസൽ പമ്പുകൾ വരുന്നു; പൊതുജനങ്ങൾക്കും ഇന്ധനം നിറയ്ക്കാം

    കൂടാതെ ഓരോ ബസ് സ്റ്റേഷനുകളിലും ഐഒസി യാത്രക്കാർക്കായി മികച്ച ടോയിലറ്റ് സൗകര്യവും, കഫ്റ്റേരിയ സൗകര്യവും ഒരുക്കും.

    ksrtc petrol pump

    ksrtc petrol pump

    • Share this:
      തിരുവനന്തപുരം; കെഎസ്ആർടിസി പുനരുദ്ധാരണ പദ്ധതിയുടെ ഭാ​ഗമായി ടിക്കറ്റേതര വരുമാനം വർദ്ധിപ്പിക്കുന്നതിന് വേണ്ടി വിവിധ പദ്ധതികൾ നടപ്പിലാക്കുന്നതിന്റെ ഭാ​ഗമായി, കെഎസ്ആർടിസിയുടെ ബസ് സ്റ്റേഷനുകളിൽ പൊതു ജനങ്ങൾക്ക് കൂടി പ്രയോജനപ്പെടുത്തുന്ന രീതിയിൽ പെട്രോൾ- ഡീസൽ പമ്പുകൾ സ്ഥാപിക്കുന്നതിന് വേണ്ടി ഇന്ത്യൻ ഓയിൽ കോർപ്പറേഷനുമായി കെഎസ്ആർടിസി ധാരണാ പത്രം ഒപ്പിടുന്നു. ഫെബ്രുവരി 15 ന് ( തിങ്കളാഴ്ച) വൈകുന്നേരം 5 മണിക്ക് മസ്കറ്റ് ഹോട്ടലിൽ വച്ച് നടക്കുന്ന ചടങ്ങ് ​ഗതാ​ഗത വകുപ്പ് മന്ത്രി എ. കെ ശശീന്ദ്രൻ ഉദ്ഘാടനം (ഓൺലൈൻ) ചെയ്യും. കെഎസ്ആർടിസി സിഎംഡി ബിജുപ്രഭാകർ ഐഎഎസും, ഇന്ത്യൻ ഓയിൽ കോർപ്പറേഷൻ ചീഫ് ജനറൽ മാനേജർ എസ്. ധനപാണ്ഡ്യൻ ചേർന്നാണ് ധാരണാ പത്രം ഒപ്പിടുന്നത്. ​ഗതാ​ഗത പ്രിൻസിപ്പൽ സെക്രട്ടറി കെ. ആർ ജ്യോതിലാൽ അധ്യക്ഷത വഹിക്കുന്ന ചടങ്ങിൽ ഐഒസി ജനറൽ മാനേജർ ഇൻ ചാർജ് ദീപക് ദാസ്, ഡിജിഎം വിപിൻ ഓസ്റ്റിൻ തുടങ്ങിയവരും പങ്കെടുക്കും.

      കെഎസ്ആർടിസിയുടെ എല്ലാ ഡിപ്പോകളും വാണിജ്യപ്രാധാന്യമുള്ള സ്ഥലങ്ങളിലാണ് പ്രവർത്തിക്കുന്നത്. നിലവിൽ ഇവിടെ നിന്നും കെഎസ്ആർടിസി ബസുകൾക്ക് മാത്രമാണ് കൺസ്യൂമർ പമ്പിൽ നിന്നും ഡീസൽ നൽകുന്നത്. ഇവയോട് പെട്രോൾ യൂണിറ്റും ചേർത്ത് ഓരോ ഡിപ്പോയുടേയും മുൻവശത്ത് ആധുനിക ഓൺലൈൻ ഫ്യുവൽ മോണിറ്ററിം​ഗ് സംവിധാനമുള്ള റീട്ടെൽ ഔട്ട്ലൈറ്റുകളാണ് സ്ഥാപിക്കുന്നത്. ഇവിടെ നിന്നും പൊതുജനങ്ങൾക്ക് പകൽ സമയവും, കെഎസ്ആർടിസിക്ക് കൺസ്യൂമർ പമ്പിൽ നിന്നും രാത്രിയും ഡീസൽ നിറക്കുന്നതിനുള്ള സൗകര്യവുമാണ് ഒരുക്കുന്നത്.

      കെഎസ്ആർടിസി ഡിപ്പോകളിൽ പ്രവർത്തിക്കുന്ന 72 ഡീസൽ പമ്പുകളിൽ 66 എണ്ണവും ഇന്ത്യൻ ഓയിൽ കോർപ്പറേഷനാണ് സ്ഥാപിച്ചിട്ടുള്ളത്. ഇതിന്റ ആദ്യഘട്ടമായി ഇന്ത്യൻ ഓയിൽ കോർപ്പറേഷൻ സ്ഥാപിച്ചിട്ടുള്ള 66 ഡീസൽ പമ്പുകൾക്ക് പുറമെ ആലുവയിലെ റീജണൽ വർക്ക്ഷോപ്പും പമ്പയിലെ കെഎസ്ആർടിസി ബസ് സ്റ്റാൻഡും കൂടി ചേർത്താണ് 67 സ്ഥലങ്ങളിൽ പമ്പുകൾ സ്ഥാപിക്കുക. പമ്പയിലെ കെഎസ്ആർടിസി ബസ് സ്റ്റാൻഡിൽ വനം വകുപ്പിന്റെയും, ദേവസ്വം ബോർഡിന്റേയും അനുമതിക്കനുസരിച്ചാകും പമ്പ് സ്ഥാപിക്കുക.

      ധാരണാപത്രപ്രകാരം ഇവിടെ അനുയോജ്യമായ സ്ഥലങ്ങൾ കണ്ടെത്തി പുതിയ പമ്പുകൾ സ്ഥാപിച്ച് പൊതുജനങ്ങൾക്കായി തുറന്ന് നൽകും. ഇതിനായി ശരാശരി 30 മുതൽ 40 സെന്റ് സ്ഥലം വരെ കെഎസ്ആർടിസി ദീർഘകാലപാട്ടത്തിനായി ഐഒസിക്ക് നൽകും. കൂടാതെ അഞ്ച് കിലോ​ഗ്രാമിന്റെ സിലിണ്ടർ , ടോയിലറ്റ്, കഫ്റ്റേരിയ എന്നിവയുടെ അധിക വരുമാനവും കെഎസ്ആർടിസിയും ഐഒസിയും പങ്കിട്ടെടുക്കും. 67 പമ്പിൽ നിന്നും ഇന്ത്യൻ സർക്കാർ നിശ്ചയിച്ചിട്ടുള്ള ഡീലർ കമ്മീഷനു പുറമെ സർക്കാർ സ്ഥലത്തിലുള്ള കെഎസ്ആർടിസി നിശ്ചയിക്കുന്ന സ്ഥലവാടകയുൾപ്പെടെ എല്ലാ ചിലവകളും കഴിഞ്ഞ് ഒരു വർഷം 70 കോടിയോളം രൂപ ലഭ്യമാകുമെന്നാണ് പ്രതീക്ഷ.

      ആദ്യഘട്ടത്തിൽ ചേർത്തല, മാവേലിക്കര, മൂവാറ്റുപുഴ, അങ്കമാലി, മൂന്നാർ, കണ്ണൂർ, കോഴിക്കോട്, ചാത്തന്നൂർ, ചാലക്കുടി, ​ഗുരുവായൂർ, തൃശ്ശൂർ, ആറ്റിങ്ങൽ, പെരിന്തൽമണ്ണ എന്നിവിടങ്ങളിൽ ഇപ്പോൾ നിലവിലുള്ള ഡീസൽ പമ്പുകളോടൊപ്പം പെട്രോൾ പമ്പുകൾ കൂടി ചേർത്താണ് ആദ്യ ഘട്ടത്തിൽ പദ്ധതി ആരംഭിക്കുക. അതിന് ശേഷമാണ് വിപുലീകരിച്ച പമ്പുകൾ മറ്റു സ്ഥലങ്ങളിൽ തുറക്കുന്നത്. അതിനുള്ള മുഴുവൻ ചിലവും ഐഒസി തന്നെ വഹിക്കും. കൂടാതെ ഓരോ ബസ് സ്റ്റേഷനുകളിലും ഐഒസി യാത്രക്കാർക്കായി മികച്ച ടോയിലറ്റ് സൗകര്യവും, കഫ്റ്റേരിയ സൗകര്യവും ഒരുക്കും.

      Also Read 'പരസ്യ പ്രസ്താവന വേണ്ട'; KSRTC CMD ബിജു പ്രഭാകറിനോട് മുഖ്യമന്ത്രി

      കെഎസ്ആർടിസി ഇപ്പോൾ നേരിടുന്നത് ജീവനക്കാരുടെ ആധിക്യമാണ്. രണ്ടായിരത്തോളം ജീവനക്കാർ വേണ്ട മെക്കാനിക്കൽ ഡിവിഷനിൽ അയ്യായിരത്തോളം ജീവനക്കാരാണ് നിലവിൽ ഉള്ളത്. തന്നെയുമല്ല 99 വർക്ക്ഷോപ്പുകളാണ് ഇപ്പോൾ പ്രവർത്തിക്കുന്നത്.

      ജീവനക്കാർ വികേന്ദ്രീകൃതമായിട്ട് ജോലി ചെയ്യുന്നത് കൊണ്ട് ഈ സ്ഥലങ്ങളിൽ ആവശ്യമായ സ്പെയർ പാർട്സുകൾ വാങ്ങി സൂക്ഷിക്കാൻ ഏകദേശം ഒരു മാസം 15 കോടിയോളം രൂപ വേണ്ടി വരും, ഈ 15 കോടി രൂപ ഒന്നിച്ച് നൽകാൻ സാധ്യമല്ലാത്തതിനാൽ ലോക്കൽ പർച്ചേസിലാണ് എല്ലായിടത്തും നടത്തുന്നത്. ഇതിനെക്കുറിച്ചും ആക്ഷേപങ്ങൾ ഉണ്ട്. പുനരുദ്ധാരണത്തിന്റെ ഭാ​ഗമായി വർക്ക്ഷോപ്പുകൾ നവീകരിക്കാൻ തീരുമാനിച്ചിട്ടുണ്ട്. 31.93 കോടി രൂപ ഇതിനായി സംസ്ഥാന സർക്കാർ നൽകിയിട്ടുണ്ട്. 99 വർക്ക്ഷോപ്പുകൾ 20 വർക്ക്ഷോപ്പുകളായി പുനസംഘടിപ്പിക്കാനാണ് തീരുമാനം.

      Also Read- കെ സ്വിഫ്റ്റ് രൂപീകരണത്തെ എതിർത്ത് പ്രതിപക്ഷ സംഘടനകൾ; KSRTC എംഡിയുടെ വിവാദ പരാമർശങ്ങൾ ചർച്ചയായില്ല

      റീജണൽ വർക്ക്ഷോപ്പ് , ഇല്ലാത്ത 9 ജില്ലകളിൽ ജില്ലാ തലങ്ങളിൽ വർക്ക്ഷോപ്പുകൾ ഇത് കൂടാതെ ചില സ്ഥലങ്ങളിൽ ആവശ്യമായ സബ് ഡിവിഷൻ വർക്ക്ഷോപ്പുകൾ കൂടിയേ ഇനി മുതൽ ഉണ്ടാകുകയുള്ളൂ. അങ്ങനെ പുനസംഘടിപ്പിക്കുമ്പോൾ അധികം ഉണ്ടാകുന്ന 600 ഓളം അധിക ജീവനക്കാരെ പുതിയതായി സ്ഥാപിക്കുന്ന പമ്പുകളിൽ നിയമിക്കും, 170 ഓളം പേരിൽ നിന്നും ലൈറ്റ് ഡ്യൂട്ടിക്കായി അപേക്ഷകൾ ലഭിച്ചിട്ടുണ്ട്. അതിന് അർഹകരായവരേയും പമ്പുകളിൽ നിയോ​ഗിക്കും. ഇവരുടെ ശമ്പള ഇന ചിലവ് പമ്പുകളുടെ വരുമാനത്തിൽ നിന്നും ലഭ്യമാക്കും. ഇവർക്കായി ഐഒസി ആവശ്യമായ പരിശീലനം ഉൾപ്പെടെയുള്ളവ ജീവനക്കാർക്ക് നൽകും. അങ്ങനെ പ്രതിമാസം ശമ്പളവും മറ്റ് ആനുകൂല്യങ്ങൾ നൽകുന്ന ഇനത്തിൽ ഒന്നരക്കോടിയോളം രൂപ ചിലവിൽ കുറയ്ക്കാനുമാകും.

      ഐഒസിയുമായി ഏർപ്പെടുന്ന കരാർ കൂടാതെ പെട്രോനെറ്റ് 4 സ്ഥലങ്ങളിൽ എൽഎൻജി പമ്പുകൾ സ്ഥാപിക്കും, ഇത് കൂടാതെ ബിപിസിഎൽ 8 സ്ഥലങ്ങളിൽ പെട്രോൾ -ഡീസൽ പമ്പുകളും, എച്ച്പിസിഎൽ മലപ്പുറത്തും പെട്രോൾ ഡീസൽ പമ്പുകളും സ്ഥാപിക്കുന്നുണ്ട്. ഐഒസി സ്ഥാപിക്കുന്ന പമ്പിനുള്ളിലോ , അല്ലെങ്കിൽ അതിനോട് ചേർന്നോ, സിഎൻജി, എൽഎൻജി എന്നിവ സ്ഥാപിക്കുന്നതിനുള്ള ചർച്ചയും പുരോ​ഗമിക്കുകയാണ്.
      Published by:Anuraj GR
      First published:
      )}