മുഖ്യമന്ത്രിയോട് ചെന്നിത്തല; അലനും താഹയും മാവോയിസ്റ്റ് ആണെന്നതിന് തെളിവ് തരൂ

കോഴിക്കോട് : അലനും താഹയും മാവോയിസ്റ്റ് ആണെന്നതിന് മുഖ്യമന്ത്രി തെളിവ് തരണമെന്ന് പ്രതിപക്ഷ നേതാവ് രമേശ് ചെന്നിത്തല. യുഎപിഎ ചുമത്തുന്നതിനുള്ള നിബന്ധന ഇവിടെ പാലിച്ചില്ലെന്നാരോപിച്ച പ്രതിപക്ഷ നേതാവ്, മനുഷ്യാവകാശ പ്രശ്നമായതു കൊണ്ടാണ് ഇടപെട്ടതെന്നാണ് വ്യക്തമാക്കിയത്.

അമിത് ഷായും പിണറായിയും തമ്മിൽ എന്താണ് വ്യത്യാസമെന്ന വിമർശനവും ചെന്നിത്തല ഉന്നയിച്ചു.യുഎപിഎ കേസിൽ അറസ്റ്റിലായ താഹ യുടെ വീട് സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു പ്രതിപക്ഷ നേതാവ്. പൊലീസ് പറയുന്നതെല്ലാം ശരിയല്ലെന്നും അങ്ങനെ പലവട്ടം തെളിഞ്ഞതാണെന്നും ആരോപിച്ച ചെന്നിത്തല വിഷയം സഭയിൽ ഉന്നയിക്കുമെന്നും അറിയിച്ചു.

Also Read-അലൻ-താഹ അറസ്റ്റിൽ യുഡിഎഫ് ഇടപെടുന്നു; പ്രതിപക്ഷനേതാവ് നാളെ ഇരു വീടുകളും സന്ദർശിക്കും

അലന്റെയും താഹയുടെയും വിഷയത്തില്‍ ഇടപെടാൻ യുഡിഎഫ് തീരുമാനിച്ചതായി എം.കെ.മുനീർ കഴിഞ്ഞ ദിവസം അറിയിച്ചിരുന്നു. മുന്നണിയിൽ ആലോചിച്ച ശേഷമെടുത്ത ഈ തീരുമാനത്തിന്റെ ഭാഗമായി പ്രതിപക്ഷ നേതാവ് അലന്‍റെയും താഹയുടെയും വീടുകൾ സന്ദർശിക്കുമെന്നും മുനീർ അറിയിച്ചിരുന്നു.