സൂര്യഗ്രഹണം: ശബരിമല ക്ഷേത്രനട നാല് മണിക്കൂർ അടച്ചിടും

ശബരിമല: സൂര്യഗ്രഹണത്തെ തുടർന്ന് ശബരിമല ക്ഷേത്രനട ഇന്ന് നാല് മണിക്കൂർ അടച്ചിടും. രാവിലെ ഏഴര മുതൽ പതിനൊന്നര വരെയാണ് നടയടക്കുക. ഈ സമയം ദർശനമുണ്ടാകില്ല.

തങ്ക അങ്കിയുമായുള്ള ഘോഷയാത്ര വൈകീട്ട് സന്നിധാനത്തെത്തും . തുടർന്ന് അയ്യപ്പന് അങ്കി ചാർത്തിയുള്ള ദീപാരാധന നടക്കും. ശരംകുത്തിയിൽ ദേവസ്വം ബോർഡ് അധികൃതർ ആചാര പൂർവം സ്വീകരിച്ചാണ് തങ്ക അങ്കി സന്നിധാനത്തേക്ക് ആനയിക്കുക. ഈ സമയങ്ങളിലും തീർഥാടകരെ പമ്പയിൽ നിന്ന് സന്നിധാനത്തേക്ക് കടത്തിവിടില്ല.

തിരക്ക് ക്രമീകരിക്കുന്നതിന്റെ ഭാഗമായി ഇടത്താവളങ്ങളിൽ നിയന്ത്രണം തുടരുകയാണ്. ഇതിലുള്ള അതൃപ്‌തി ദേവസ്വം ബോർഡ് പോലീസ് മേധാവിയെ അറിയിച്ചിട്ടുണ്ട്. നാളെയാണ് മണ്ഡലപൂജക്ക് ശേഷം നടയടക്കുക. 30 ന് മകരവിളക്ക് പൂജകൾക്കായി നട വീണ്ടും തുറക്കും.