തൃശൂരിൽ അമ്മയുടെ മരണാനന്തരച്ചടങ്ങിനു ന്യൂയോർക്കിൽ നിന്നെത്തിയ യുവാവ് വാഹനാപകടത്തിൽ മരിച്ചു

തൃശ്ശൂർ: അമ്മയുടെ മരണാനന്തരച്ചടങ്ങിനു ന്യൂയോർക്കിൽ നിന്നെത്തിയ യുവാവ് വാഹനാപകടത്തിൽ മരിച്ചു. ആർത്താറ്റ് പനയ്ക്കൽ പരേതരായ വിൽസന്റെയും ബേബിയുടെയും മകൻ സജിത്ത് വിൽസനാണു (42) മരിച്ചത്. സജിത്ത് സഞ്ചരിച്ചിരുന്ന സ്കൂട്ടർ വഴിയിരികിൽ നിർത്തിയിട്ട ലോറിയിൽ ഇടിക്കുകയായിരുന്നു. വ്യാഴാഴ്ച പുലർച്ചെ ഒരു മണിയോടെ കോട്ടപ്പടിയിലാണ് അപകടം.

Also read-കോട്ടയം കുമാരനെല്ലൂരിൽ ബൈക്ക് ടോറസ് ലോറിയിലിടിച്ച് മൂന്ന് യുവാക്കൾ മരിച്ചു

കഴിഞ്ഞ ഞായറാഴ്ചയാണ് സജിത്തിൻറെ അമ്മ ബേബി മരിച്ചത്. തുടർന്നു സംസ്കാരത്തിനും മരണാനന്തരച്ചടങ്ങുകൾക്കുമായി ചൊവ്വാഴ്ച സജിത്ത് നാട്ടിലെത്തുകയായിരുന്നു. നാട്ടിലെത്തിയ സജിത്തിനു അമ്മയുടെ മരണം മൂലം രാത്രി സജിത്തിന് ഉറങ്ങാൻ ബുദ്ധിമുട്ടു നേരിട്ടിരുന്നു. ഇത്കൊണ്ട് എഴുന്നേറ്റ് ഗുരുവായൂർ ഭാഗത്തേക്കു ചായ കുടിക്കാൻ പോയപ്പോഴായിരുന്നു ദുരന്തം. യുഎസിലെ ന്യൂയോർക്കിലെ ആശുപത്രിയിൽ സോഷ്യൽ വർക്കറാണു സജിത്ത്. ഭാര്യ: ഷൈൻ. മക്കൾ: എമ, എമിലി, എയ്ഞ്ചൽ, ഏബൽ.