നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • kerala
    • »
    • Sfi | എസ്.എഫ്.ഐ ലൈംഗിക അരാജത്വമുണ്ടാക്കുന്നു; വിമര്‍ശനവുമായി സുന്നി സ്റ്റുഡന്റ്‌സ് ഫെഡറേഷന്‍

    Sfi | എസ്.എഫ്.ഐ ലൈംഗിക അരാജത്വമുണ്ടാക്കുന്നു; വിമര്‍ശനവുമായി സുന്നി സ്റ്റുഡന്റ്‌സ് ഫെഡറേഷന്‍

    സമൂഹ ജീവിതത്തെ അരാജകമാക്കുന്ന രാഷ്ട്രീയത്തിന്റെ പ്രചാരകരായി ഇടതുപക്ഷ സംഘടനകള്‍ മാറിയെന്നാണ് എസ്.എസ്.എഫ് സംസ്ഥാന കമ്മിറ്റിയുടെ വിമര്‍ശനം.

    • Share this:
      കോഴിക്കോട്: കേരള വര്‍മ്മ കാമ്പസില്‍ (Sree Kerala Varma College) നവാഗതര്‍ക്ക് സ്വാഗതം പറയുന്ന പോസ്റ്ററില്‍ സ്വവര്‍ഗ്ഗാനുരാഗ രാഷ്ട്രീയം പറഞ്ഞതിന് എസ്.എഫ്.ഐ (SFI) ക്കെതിരെ സമസ്ത കാന്തപുരം വിഭാഗം വിദ്യാര്‍ത്ഥി സംഘടനയായ എസ്.എസ്.എഫ് (SSF) രംഗത്ത്. സമൂഹ ജീവിതത്തെ അരാജകമാക്കുന്ന രാഷ്ട്രീയത്തിന്റെ പ്രചാരകരായി ഇടതുപക്ഷ സംഘടനകള്‍ മാറിയെന്നാണ് എസ്.എസ്.എഫ് സംസ്ഥാന കമ്മിറ്റിയുടെ വിമര്‍ശനം.

      കാമ്പസുകളില്‍ രാഷ്ട്രീയം പറയാന്‍ കഴിയാത്തതുകൊണ്ട് ലൈംഗിക അരാജകത്വമുണ്ടാക്കാനാണ് ശ്രമമെന്നും എന്ത് വിപ്ലവമാണ് നടപ്പാക്കാന്‍ ഉദ്ദേശിക്കുന്നതെന്ന് എസ്.എഫ്.ഐ വ്യക്തമാക്കണമെന്നും എസ്.എസ്.എഫ്  ആവശ്യപ്പെടുന്നു.

      സാമൂഹിക ജീവിതത്തെ അരാജകമാക്കുകയും സാംസ്‌കാരിക- സദാചാര മേഖലയില്‍ ഗുരുതര പ്രത്യാഘാതങ്ങള്‍ സൃഷ്ടിക്കുകയും ചെയ്യുന്ന ലിബറല്‍ ചിന്തകളുടെ പ്രചാരകരും പ്രയോക്താക്കളുമായി ഇടതുപക്ഷ വിദ്യാര്‍ത്ഥി യുവജന സംഘടനകള്‍ മാറിയിരിക്കുകയാണ്.

      അവ വലിയ വിനാശമാണ് നമ്മുടെ നാട്ടില്‍ വിതക്കാനിരിക്കുന്നത്. നാളിതു വരെ കാത്തുസൂക്ഷിച്ച മൂല്യങ്ങളെയൊക്കെയും തിരസ്‌കരിച്ച് അനിയന്ത്രിതമായ വ്യക്തിസ്വാതന്ത്ര്യത്തിന്റെ പേരില്‍ അവിടെ അധാര്‍മ്മികതകളെ സ്ഥാപിക്കാനാണ് ശ്രമിക്കുന്നത്.

      ചൂഷണമുക്തമായ ഒരു രീതിശാസ്ത്രമെന്ന വ്യാജേന അവതരിച്ച ലിബറലിസം അരാജകത്വവും സദാചാരരാഹിത്യവുമാണ് സംഭാവന ചെയ്തത്. അവയെ കേരളത്തിലെ കാമ്പസുകളിലേക്ക് കെട്ടിയിറക്കാനുള്ള ശ്രമമാണ് ഇപ്പോള്‍ നടന്നുകൊണ്ടിരിക്കുന്നത്. കാമ്പസുകള്‍ക്കകത്ത് നിലപാടുള്ള രാഷ്ട്രീയം പറയുവാനോ നിലവാരമുള്ള രാഷ്ട്രീയം പ്രദര്‍ശിപ്പിക്കാനോ സാധിക്കാതെ വരുമ്പോഴുളള നിസ്സഹായതയില്‍ നിന്നാണ് പൈങ്കിളി രാഷ്ട്രീയത്തിലേക്കുള്ള ഈ പരകായപ്രവേശം.

      കേരള വര്‍മ്മ കോളേജിലെ നവാഗതര്‍ക്ക് സ്വാഗതമോതിക്കൊണ്ടുള്ള ബോര്‍ഡുകളിലും പ്രത്യക്ഷപ്പെട്ടത് ഈ തുണിയഴിക്കല്‍ വിപ്ലവമായിരുന്നു. ആശയങ്ങള്‍ക്ക് മൂര്‍ച്ച കുറയുമ്പോള്‍ ആയുധങ്ങളെ ആശ്രയിച്ചിരുന്നവര്‍ അശ്ലീലതയില്‍ അഭയം തേടുന്ന അതിദാരുണ രംഗമാണ് ഇപ്പോള്‍ കാണുന്നത്.

      കേരളത്തിലെ കാമ്പസുകളില്‍ രാഷ്ട്രീയം നിരോധിക്കുന്നതിനെ കുറിച്ച് എം.എന്‍ വിജയനോട് ചോദിച്ചപ്പോള്‍ അദ്ദേഹം പറഞ്ഞത് നിരോധിക്കാന്‍ മാത്രം എന്ത് രാഷ്ട്രീയമാണ് കേരളത്തിലെ കാമ്പസുകള്‍ക്കകത്ത് ഉള്ളത് എന്നാണ്. വിപ്ലവത്തിന്റെ കുത്തകാവകാശം പേറുന്നവര്‍ക്ക് നേരെയുള്ള മുനയുള്ള ചോദ്യം കൂടിയാണ് വിജയന്‍ മാഷിന്റെ ഉത്തരം.

      നിര്‍മാണാത്മകമായ ഒരു രാഷ്ട്രീയ ആശയത്തെയും സംഭാവന ചെയ്യാന്‍ സമീപകാലത്തൊന്നും കഴിയാതെ പോയ നിരാശക്ക് പരിഹാരമെന്നോണമാണ് സ്വതന്ത്ര ലൈംഗികതയെ മുന്നില്‍ നിര്‍ത്തി മുഖ്യധാരയില്‍ നിറഞ്ഞു നില്‍ക്കാന്‍ ഇവര്‍ പെടാ പാട് പെടുന്നത്. ലൈംഗികതയെ ഫോക്കസ് ചെയ്തു കൊണ്ടുള്ള ഇവരുടെ ഗിമ്മിക്കുകള്‍ കാണുമ്പോള്‍ ലൈംഗിക ദാരിദ്ര്യമാണ് കലാലയങ്ങള്‍ ഇന്ന് അനുഭവിക്കുന്ന ഏറ്റവും വലിയ പ്രതിസന്ധിയെന്നാണ് തോന്നുക.

      അക്കാദമികമായും മറ്റും വിദ്യാഭ്യാസ രംഗം നേരിട്ടു കൊണ്ടിരിക്കുന്ന പലവിധ പ്രശ്നങ്ങളെ അഡ്രസ് ചെയ്യാതെ ലൈംഗികതയിലേക്ക് കാമറ തിരിക്കുന്നവര്‍ ധൈഷണിക വിദ്യാര്‍ത്ഥിത്വത്തില്‍ നിന്ന് പൂവാല വിദ്യാര്‍ത്ഥിത്വത്തിലേക്ക് ചുരുങ്ങുകയാണ്.

      കമ്പോള, മുതലാളിത്ത വിരുദ്ധ പക്ഷത്ത് നിലകൊള്ളുന്നുവെന്ന് അവകാശപ്പെടുന്ന ഒരു പ്രസ്ഥാനത്തിന്റെ വക്താക്കള്‍ അവരുടെ അജണ്ടകളില്‍ വീണു പോകുന്നുവെന്ന വൈരുദ്ധ്യം കൂടി നവ ലിബറല്‍ ആശയങ്ങള്‍ ഏറ്റെടുക്കുന്നതിലൂടെ സംഭവിക്കുന്നുണ്ട്.

      സമൂഹത്തിന്റെ നന്‍മയും നിലനില്‍പ്പും പരിഗണിക്കാത്ത ലിബറല്‍ വ്യക്തി വാദങ്ങളിലൂടെ എന്ത് വിപ്ലവമാണ് സമൂഹത്തില്‍ നടപ്പിലാക്കാന്‍ ഉദ്ദേശിക്കുന്നതെന്ന് എസ് എഫ് ഐ വ്യക്തമാക്കണം. ലൈംഗികതയും ലഹരിയും കുത്തികയറ്റി യുവത്വത്തെ നശിപ്പിക്കുന്ന കുറ്റകരമായ സ്വാതന്ത്ര്യമാണ് ലിബറലിസത്തിന്റെ സംഭാവന.

      മറ്റുള്ളവരുടെ ആശയങ്ങളുടെ മേല്‍ കുതിര കയറലും പൊതു സമൂഹം തിന്‍മയായി കാണുന്നതെല്ലാം നന്‍മയായി അവതരിപ്പിക്കലുമാണ് ലിബറലിസത്തിന്റെ ഐഡിയോളജി. മതത്തില്‍ നിന്ന് മാനവികതയിലേക്ക് ക്ഷണിക്കുന്നവര്‍ അമാനവികമായ ഈ ചിന്താധാരയെ പുല്‍കുന്നതിലെ ഗൂഢലക്ഷ്യം പൊതു സമൂഹം തിരിച്ചറിയണം.

      Also Read-CM Pinarayi Vijayan |കേരളത്തില്‍ ഒന്നും നടക്കില്ലെന്ന് ചിലര്‍ ശാപവാക്കുകള്‍ ഉരുവിട്ടു; വികസനം കൊണ്ട് മറുപടി നല്‍കി; മുഖ്യമന്ത്രി

      മനുഷ്യനെ ലൈംഗികതയിലേക്ക് മാത്രം ചുരുക്കുകയും അവന്റെ ആത്മാവിന്റെ ദാഹത്തിന് ശമനം നല്‍കാന്‍ സാധിക്കാതിരിക്കുകയും ചെയ്യുന്ന ലിബറല്‍ കമ്യൂണിസ്റ്റ് പ്രത്യയ ശാസ്ത്രത്തിന്റെ ദുര്‍ബലതയെ കൂടി വിവേകമുള്ളവര്‍ മനസ്സിലാക്കണം.

      Also Read-ലീഗ് വിട്ട് സി.പി.എമ്മില്‍ ചേര്‍ന്നാല്‍ മതവിശ്വാസം നഷ്ടമാകില്ല: സമസ്ത നേതാവ് അബ്ദുസ്സമദ് പൂക്കോട്ടൂര്‍

      കാമ്പസുകളില്‍ ലൈംഗിക അരാജകത്വം കൊണ്ടുവരിക എന്നത് പൊതു മിനിമം പരിപാടിയായി പാര്‍ട്ടി സ്വീകരിച്ചിട്ടുണ്ടോ എന്നാണ് ഇനി അറിയാനുള്ളത്. പള്ളിക്കൂടങ്ങളെ അസാംസ്‌കാരിക ഇടങ്ങളായി പരിവര്‍ത്തനം ചെയ്യാനുള്ള ലിബറല്‍ വര്‍ഗീയ കൂട്ടങ്ങളുടെ ചിന്താശൂന്യതക്ക് നിന്ന് തരില്ലെന്ന് ധാര്‍മ്മികത പുലരണമെന്ന് ആഗ്രഹിക്കുന്നവരെല്ലാം ഉറക്കെ പറയേണ്ട സവിശേഷ സന്ദര്‍ഭമാണിത്.- എസ്.എസ്.എഫ് പ്രസ്താവനയില്‍ വ്യക്തമാക്കി.
      Published by:Jayashankar AV
      First published:
      )}