തൃശൂർ -എറണാകുളം പാതയിൽ ട്രെയിൻ ഗതാഗതം പുനഃസ്ഥാപിച്ചു

കൊച്ചി: തൃശൂർ-എറണാകുളം പാതയിൽ ട്രെയിൻ ഗതാഗതം പുനഃസ്ഥാപിച്ചു. ആലുവ-അങ്കമാലി പാതയിൽ വിള്ളൽ കണ്ടെത്തിയതും വൈദ്യുതി തടസവും കാരണമാണ് ട്രെയിൻ ഗതാഗതം സ്തംഭിച്ചത്. എന്നാൽ റെയിൽവേ സാങ്കേതിക വിഭാഗം ജീവനക്കാരുടെ ശ്രമഫലമായി തകരാറുകൾ അതിവേഗം പരിഹരിക്കുകയായിരുന്നു. രാവിലെ മുതൽ വിവിധ സ്റ്റേഷനുകളിൽ പിടിച്ചിട്ട ട്രെയിനുകൾ ഓടിത്തുടങ്ങി.

180 കി.മീ വേഗതയിൽ ചീറിപ്പാഞ്ഞ് ട്രെയിൻ 18

നിസാമുദ്ദീൻ-എറണാകുളം മംഗള എക്സ്പ്രസ് രണ്ടുമണിക്കൂറോളം വൈകിയാണ് ഓടിക്കൊണ്ടിരിക്കുന്നത്. തൃശൂർ-എറണാകുളം പാതയിലെ തകരാർ കാരണം ട്രെയിൻ ഷൊർണൂർ സ്റ്റേഷനിൽ പിടിച്ചിട്ടിരുന്നു. ഗുരുവായൂർ-എറണാകുളം പാസഞ്ചർ ഒരു മണിക്കൂറിലേറെ വൈകിയാണ് ഓടുന്നത്. ഈ ട്രെയിൻ ഒരു മണിക്കൂറോളം ഒല്ലൂർ സ്റ്റേഷനിൽ പിടിച്ചിട്ടിരുന്നു. രാവിലെ ട്രെയിൻ ഗതാഗതം തടസപ്പെട്ടതിനാൽ ഓഫീസുകളിലേക്ക് പോകുന്ന സ്ഥിരം യാത്രക്കാർ ശരിക്കും വലഞ്ഞു.