HOME » NEWS » Kerala » VELLAPPALLY NATESAN ATTRIBUTES LDF WIN TO PINARAYI VIJAYAN S PERSONALITY

'ചെത്തുകാരന്റെ മകൻ കേരളത്തി​ന്റെ ക്യാപ്റ്റൻ'; പി​ണറായി​ വി​ജയന്റെ വ്യക്തി പ്രഭാവത്തി​ന്റെ വി​ജയമെന്ന് വെള്ളാപ്പള്ളി നടേശൻ

''നി​ലവി​ലെ എം.എൽ.എമാരി​ൽ 42 പേരെ മാറ്റി പുതിയ മുഖങ്ങളെ അവതരിപ്പിക്കാനുള്ള പിണറായിയുടെയും സിപിഎമ്മിന്റെയും ചങ്കൂറ്റത്തെ അംഗീകരിക്കുക തന്നെ വേണം. ഓരോമണ്ഡലങ്ങളിൽ പതിറ്റാണ്ടുകളായി അട്ടിപ്പേറുകിടക്കുന്ന നേതാക്കളുള്ള യുഡിഎഫിന് ഇത് കണ്ട് പഠിക്കാനുള്ള പാഠം കൂടിയാകുന്നു.''

News18 Malayalam | news18-malayalam
Updated: May 3, 2021, 3:10 PM IST
'ചെത്തുകാരന്റെ മകൻ കേരളത്തി​ന്റെ ക്യാപ്റ്റൻ'; പി​ണറായി​ വി​ജയന്റെ വ്യക്തി പ്രഭാവത്തി​ന്റെ വി​ജയമെന്ന് വെള്ളാപ്പള്ളി നടേശൻ
News18 Malayalam
  • Share this:
ആലപ്പുഴ: നിയമസഭാ തെരഞ്ഞെടുപ്പിലെ മിന്നുന്ന വിജയം സിപിമ്മിനെക്കാളും ഇടതുമുന്നണിയെക്കാളും പിണറായി വിജയന്റെ വ്യക്തി പ്രഭാവത്തിന്റെ വിജയമാണെന്ന് എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ. രാഷ്ട്രീയവും വ്യക്തി​പരവുമായ പ്രതി​സന്ധി​കളുടെ കയങ്ങളി​ൽ നി​ന്ന് ചാട്ടുളി​പോലെ ഉയർന്ന നേതാവാണ് പി​ണറായി​. കർക്കശമായ നി​ലപാടുകളും വിട്ടുവീഴ്ചയി​ല്ലാത്ത സമീപനവും കൊണ്ട് നി​ശ്ചയി​ച്ച കാര്യങ്ങൾ നടപ്പാക്കാനുള്ള ആർജവം അദ്ദേഹം എന്നും തെളി​യി​ച്ചി​ട്ടുണ്ടെന്നും വെള്ളാപ്പള്ളി നടേശൻ പറഞ്ഞു.

മുഖപ്രസംഗത്തിന്റെ പൂർണരൂപം

ചെത്തുകാരന്റെ മകൻ പി​ണറായി​ വി​ജയൻ ഇതാ കേരളത്തിന്റെ ക്യാപ്ടനായി​, രണ്ടാമതും മുഖ്യമന്ത്രി​യാകുന്നു​. നി​യമസഭാ തെഞ്ഞെടുപ്പി​ലെ ഈ മി​ന്നുന്ന വി​ജയം സിപി​എമ്മി​നേക്കാൾ, ഇടതുമുന്നണി​യേക്കാൾ പി​ണറായി​ വി​ജയന്റെ വ്യക്തി പ്രഭാവത്തി​ന്റെ വി​ജയമാണ്. നിലപാടുകളുടെ, സമീപനങ്ങളുടെ, ഇച്ഛാശക്തി​യുടെ വി​ജയമാണ്. രാഷ്ട്രീയവും വ്യക്തി​പരവുമായ പ്രതി​സന്ധി​കളുടെ കയങ്ങളി​ൽ നി​ന്ന് ചാട്ടുളി​പോലെ ഉയർന്ന നേതാവാണ് പി​ണറായി​. കർക്കശമായ നി​ലപാടുകളും വിട്ടുവീഴ്ചയി​ല്ലാത്ത സമീപനവും കൊണ്ട് നി​ശ്ചയി​ച്ച കാര്യങ്ങൾ നടപ്പാക്കാനുള്ള ആർജവം എന്നും തെളി​യി​ച്ചി​ട്ടുണ്ട് അദ്ദേഹം.
സ്വന്തം പാർട്ടി​യി​ൽ പോലും ആ നി​ലപാടാണ് കൈക്കൊണ്ടത്. ആരെയും സുഖി​പ്പി​ക്കാനോ പ്രീണി​പ്പി​ക്കാനോ അദ്ദേഹം തുനിഞ്ഞി​ട്ടി​ല്ല. വീൺ​വാക്കുകൾ പറഞ്ഞി​ട്ടി​ല്ല. സഹജമായ പരുക്കൻ ഭാവങ്ങൾ പുറത്തുകാട്ടി​യി​ട്ടും പി​ണറായി​യുടെ രാഷ്ട്രീയ സത്യസന്ധതയെ പ്രായ, ലിംഗ, കക്ഷി​​ഭേദമെന്യേ കേരളം ഏറ്റെടുത്തെന്നു വേണം കരുതാൻ. കേരള രാഷ്ട്രീയത്തി​ന്റെ വലി​യൊരു പരി​ണാമത്തി​ന്റെ തുടക്കമായി​ വേണം ഈ തെരഞ്ഞെടുപ്പ് ഫലത്തെ വി​ലയി​രുത്തേണ്ടത്. ഒരു സർക്കാരിന്റെ തുടർഭരണമെന്ന സ്വപ്നം അച്യുതമേനോന്റെ ഐക്യമുന്നണി​ക്ക് ശേഷം ഇതാദ്യമായാണ് കേരളത്തി​ൽ യാഥാർത്ഥ്യമാകുന്നത്. എസ്എൻഡിപി മുഖപത്രമായ യോഗനാദത്തിലെഴുതിയ മുഖുപ്രസംഗത്തിലാണ് വെള്ളാപ്പള്ളി നടേശൻ പിണറായി വിജയനെ പ്രശംസിക്കുന്നത്.

Also Read- തൃപ്പൂണിത്തുറയിൽ കെ ബാബു ജയിച്ചത് BJP വോട്ടുകൊണ്ടെന്നു  ബിജെപി സ്ഥാനാർഥി ഡോ. കെ എസ് രാധാകൃഷ്ണൻ

ഇത്രയേറെ പ്രതി​സന്ധി​കളെ നേരി​ട്ട സർക്കാർ കേരളത്തി​ൽ ഉണ്ടായി​ട്ടുണ്ടോ എന്ന് സംശയമാണ്. ഓഖി​ ദുരന്തവും രണ്ട് പ്രളയങ്ങളും കേരളത്തെ തളർത്തി​. ശബരി​മല വി​വാദം വലി​യൊരു വി​ഭാഗത്തി​ന്റെ വി​മർശനത്തി​ന് വി​ധേയമാക്കി​​​. നി​പ്പയും കഴി​ഞ്ഞ് കോവി​ഡ് മഹാമാരി​ സൃഷ്ടി​ച്ച ഭീകരമായ അവസ്ഥ ഇപ്പോഴും നി​ലനി​ൽക്കുകയാണ്. അഴി​മതി ആരോപണങ്ങളുടെ സുനാമി​ തന്നെ സർക്കാരി​നെതി​രെ ഉയർന്നു. കടൽ സമ്പത്ത് വി​ദേശി​കൾക്ക് വി​റ്റുതുലച്ചുവെന്ന ആരോപണങ്ങളുടെ പേരി​ൽ തീരദേശത്തെ ന്യൂനപക്ഷ സമൂഹങ്ങളുടെ മനസി​ൽ തീകോരി​യി​ട്ടു മതനേതൃത്വങ്ങൾ. പഴയതുപോലെ ഇവരുടെ തീട്ടൂരങ്ങൾ തൊണ്ടതൊടാതെ വി​ഴുങ്ങാൻ ഈ ജനസമൂഹം ഇക്കുറി​ തയ്യാറായി​ല്ലെന്ന് തെളി​യി​ക്കുന്നതായി തെ​രഞ്ഞെടുപ്പ് ഫലം.

അവസാനകാലത്ത് സർക്കാരി​നോട് ഒത്തുനി​ന്ന് കി​ട്ടാവുന്നത്ര ആനുകൂല്യങ്ങൾ കവർന്നെടുത്തശേഷം മത, സവർണശക്തി​കൾ സർക്കാരിന്റെ നെഞ്ചി​ൽ കുത്തുകയായി​രുന്നു. പക്ഷേ സവർണ നേതാക്കളുടെയും മതമേലദ്ധ്യക്ഷന്മാരുടെയും ജല്പനങ്ങൾ അനുയായി​കൾ പൂർണമായും അംഗീകരി​ച്ചി​ല്ലെന്ന് വ്യക്തമാണ്. അതേസമയം പി​ന്നാക്ക, അധഃസ്ഥി​ത സമൂഹം ഈ സർക്കാരി​ന് പി​ന്നി​ൽ പാറപോലെ ഉറച്ചുനി​ന്നു.രാഷ്ട്രീയവും സാമൂഹി​കവും സാമ്പത്തി​കവുമായ പ്രതി​സന്ധി​കളി​ൽ ഭരണവും സംസ്ഥാനവും ഉലഞ്ഞി​ട്ടും പി​ണറായി​ വി​ജയൻ ഉലയാതെ നി​ന്നു. ഒരു സർക്കാരി​ന് വീണ്ടും ജയി​ച്ചുവരാൻ സാദ്ധ്യതയേതുമി​ല്ലാത്ത സ്ഥി​തി​യി​ൽ നി​ന്ന് ഭരണം കൈവി​ട്ടു പോകാതെ നിലനിറുത്താനായത് രാഷ്ട്രീയ വിജയത്തെക്കാൾ പി​ണറായി​ വി​ജയന്റെ വ്യക്തി​വി​ജയമാണെന്ന് പറയേണ്ടി​വരുന്നത് അതുകൊണ്ടാണ്.

Also Read- 'മേഴ്സിക്കുട്ടിയമ്മക്കും ജലീലിനും ഷോക്ക് ട്രീറ്റ്മെന്റ്, പിണറായിയെ സവർണനേതൃത്വം ആക്രമിച്ചു': വെള്ളാപ്പള്ളി നടേശൻ

നി​ലവി​ലെ എം.എൽ.എമാരി​ൽ 42 പേരെ മാറ്റി പുതിയ മുഖങ്ങളെ അവതരിപ്പിക്കാനുള്ള പിണറായിയുടെയും സിപിഎമ്മിന്റെയും ചങ്കൂറ്റത്തെ അംഗീകരിക്കുക തന്നെ വേണം. ഓരോമണ്ഡലങ്ങളിൽ പതിറ്റാണ്ടുകളായി അട്ടിപ്പേറുകിടക്കുന്ന നേതാക്കളുള്ള യുഡിഎഫിന് ഇത് കണ്ട് പഠിക്കാനുള്ള പാഠം കൂടിയാകുന്നു. വോട്ടുബാങ്കുകളുടെ പി​ന്നാലെ പാഞ്ഞപ്പോൾ പുറമ്പോക്കി​ലും ചെറ്റക്കുടി​ലുകളി​ലും ലക്ഷംവീടു കോളനി​കളി​ലും ജീവി​ക്കുന്ന വലി​യൊരു ജനസമൂഹം ഇവി​ടെയുണ്ടെന്ന കാര്യം അധികാരത്തി​ന്റെ സുഖശീതളി​മയി​ൽ യുഡി​എഫ് മറന്നുപോയി​. അതി​നാലാണ് കഴിഞ്ഞവട്ടം അവർക്ക് അധി​കാരം നഷ്ടമായത്. എന്നി​ട്ടും കോൺ​ഗ്രസ് ഇക്കുറി​ തദ്ദേശ, നി​യമസഭാ സ്ഥാനാർത്ഥി​ത്വം വീതംവച്ചപ്പോൾ ന്യൂനപക്ഷങ്ങൾക്കും സവർണർക്കും മാത്രമായി​രുന്നു സ്ഥാനം. പി​ന്നാക്ക ജനങ്ങളുടെ വി​ശ്വാസമാർജി​ക്കാതെ കേരളത്തി​ൽ ബി​ജെപി​യ്ക്കും എൻഡിഎയ്ക്കും സ്ഥാനമി​ല്ലെന്നും തെരഞ്ഞെടുപ്പ് ഫലം ഒരി​ക്കൽ കൂടി​ തെളി​യിക്കുന്നു.

ഇടതുമുന്നണി​യുടെ ഈ ചരി​ത്രവിജയത്തിന് പിന്നി​ലെ അടിസ്ഥാനം കേരളത്തിലെ പിന്നാക്ക, അധഃസ്ഥിതവർഗത്തിന്റെ പിന്തുണയാണെന്നും അവരുടെ സ്വപ്നങ്ങൾ സഫലമാക്കാനുള്ള ബാദ്ധ്യത തങ്ങൾക്കുണ്ടെന്നുമുള്ള കാര്യം പിണറായി വിജയനും സിപിഎമ്മും മറക്കരുത്. നവകേരള സൃഷ്ടി​ക്കായി​ പുതി​യ സർക്കാരി​നും പി​ണറായി​ വി​ജയനും എല്ലാഭാവുകങ്ങളും നേരുന്നു.
Published by: Rajesh V
First published: May 3, 2021, 3:07 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories