നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • kerala
    • »
    • 'ഉത്തരക്കടലാസും സർവകലാശാലാ മുദ്രയും പിടിച്ചെടുത്തതിനേക്കാൾ അപകടകരമായ പ്രചരണം' സിപിഎമ്മിനെതിരെ വെൽഫെയർപാര്‍ട്ടി

    'ഉത്തരക്കടലാസും സർവകലാശാലാ മുദ്രയും പിടിച്ചെടുത്തതിനേക്കാൾ അപകടകരമായ പ്രചരണം' സിപിഎമ്മിനെതിരെ വെൽഫെയർപാര്‍ട്ടി

    സിപിഐ(എം) കേരളത്തില്‍ സമീപകാലത്തായി സ്വീകരിക്കുന്ന നിലപാടുകള്‍ അത്യന്തം അപകടകരമാണെന്ന് വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് ഹമീദ് വാണിയമ്പലം

    • Share this:
      പ്രൊഫഷണല്‍ കോളേജുകള്‍ കേന്ദ്രീകരിച്ച് യുവതികളെ തീവ്രവാദത്തിലേക്ക് ആകര്‍ഷിക്കാനുള്ള ശ്രമം നടക്കുന്നെന്ന സിപിഎം പരാമര്‍ശത്തിനെതിരെ വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് ഹമീദ് വാണിയമ്പലം.

      രാജ്യത്ത് ഇന്നും പ്രസക്തിയുള്ള മതേതര പാര്‍ട്ടിയായ സിപിഐ(എം)
      കേരളത്തില്‍ സമീപകാലത്തായി സ്വീകരിക്കുന്ന നിലപാടുകള്‍ അത്യന്തം അപകടകരമാണെന്ന് അദ്ദേഹം പറഞ്ഞു.

      ലവ് ജിഹാദ്, നാര്‍ക്കോട്ടിക് ജിഹാദ് തുടങ്ങി വംശീയ-വര്‍ഗീയവാദികള്‍ ഉന്നയിക്കുന്ന ആരോപണം പോലെ തന്നെ വസ്തുതളുടെ പിന്‍ബലമോ സത്യത്തിന്റെ നേര്‍കണികയോ ഇല്ലാത്ത ആരോപണമാണ് സിപിഎം നേതാക്കള്‍ കേരളമാകെ പ്രഭാഷണം നടത്തി പ്രചരിപ്പിക്കാനൊരുങ്ങുന്നതെന്നും അദ്ദേഹം വ്യക്തമാക്കി.

      പ്രൊഫഷണല്‍ കോളേജുകള്‍ കേന്ദ്രീകരിച്ച് യുവതികളെ തീവ്രവാദത്തിലേക്ക് ആകര്‍ഷിക്കാനുള്ള ശ്രമം നടക്കുന്നെന്ന് സിപിഎം നേരത്തെ പരാമര്‍ശിച്ചിരുന്നു. താലിബാന്‍ പോലുള്ള സംഘടനകളെ പിന്തുണയ്ക്കുന്ന സാഹചര്യം കേരളത്തിലുണ്ടെന്നും ക്രൈസ്തവ വിഭാഗത്തിലെ വര്‍ഗീയ സ്വാധിനത്തേയും ഗൗരവത്തോടെ കാണണമെന്നും സംഘടന അഭിപ്രായപ്പെട്ടിരുന്നു.

      Also read - 'തീവ്രവാദത്തിലേക്ക് പ്രൊഫഷണൽ കോളജുകളിലെ യുവതികളെ ആകർഷിക്കാൻ ശ്രമം:' സിപിഎം

      അതേ സമയം നാര്‍ക്കോട്ടിക് ജിഹാദ് പരാമര്‍ശത്തില്‍ പാലാ ബിഷപിന്റെ വെളിപ്പെടുത്തല്‍ ദുരുദ്ദേശ്യത്തോടെ ആയിരുന്നില്ലെന്ന് സിപിഎം ആക്ടിംഗ് സെക്രട്ടറി എ വിജയരാഘവന്‍ വ്യക്തമാക്കിയിരുന്നു.

      Also Read - 'പാലാ ബിഷപ്പിന് ദുരുദ്ദേശ്യമില്ല; ചിലര്‍ തെറ്റായ പ്രചാരണം നടത്തി': എ.വിജയരാഘവന്‍

      ഫേസ്ബുക്ക് പോസ്റ്റിന്റെ പൂര്‍ണ്ണരൂപം

      സിപിഐ(എം) സമ്മേളനങ്ങളിലെ പ്രഭാഷകർക്കുള്ള കുറിപ്പിൽ പ്രൊഫഷണൽ കോളേജ് കേന്ദ്രീകരിച്ച് യുവതികളെ തീവ്രവാദത്തിലേക്ക് സ്വാധീനിക്കാൻ ശ്രമമെന്ന് പരാമർശമുള്ളതായി വിവിധ വാർത്താ മാധ്യമങ്ങൾ റിപ്പോർട്ട് ചെയ്തിരിക്കുന്നു.

      ഇന്ത്യ രാജ്യത്ത് ഇന്നും പ്രസക്തിയുള്ള മതേതര പാർട്ടി തന്നെയാണ് സിപിഐ(എം). പ്രത്യേകിച്ച് സംഘ്പരിവാർ ഭരണകാലത്ത് മതേതര കൂട്ടായ്മയുടെ ഭാഗമാകേണ്ടവരാണ് അവർ.

      എന്നാൽ, കേരളത്തിൽ സമീപകാലത്തായി അവർ സ്വീകരിക്കുന്ന നിലപാടുകൾ അത്യന്തം അപകടകരമാണ്. അവരുടെ തന്നെ ദേശീയ നിലപാടുകളുടെ കടകവിരുദ്ധവും രാജ്യത്തെ മതനിരപേക്ഷതക്ക് ഹാനിയുണ്ടാക്കുന്നതുമാണ്.

      ഇന്ത്യയിൽ ഇസ്‌ലാമോഫോബിയ പടർത്തി മതവിഭാഗങ്ങളെ വംശീയമായി വേർതിരിച്ച് സവർണാധിപത്യ ഭരണക്രമം സൃഷ്ടിച്ചെടുക്കാൻ സംഘ്പരിവാർ നടത്തിവരുന്ന ശ്രമങ്ങൾ അതിന്റെ വിജയപ്രാപ്തിയിലേക്ക് നീളുന്ന ഘട്ടമാണിത്.

      അതേ ഫോർമാറ്റും രീതിയും അവലംബിച്ച് കേരളത്തിൽ സോഷ്യൽ എഞ്ചിനീയറിംഗ് നടത്തി തങ്ങൾക്ക് സമഗ്രാധിപത്യം നേടാനുള്ള നീക്കമാണ് സിപിഎം ഇപ്പോൾ നടത്തുന്നത്. അതിലവർ ഭാഗികമായി വിജയിച്ചതാണ് തുടർഭരണം നേടിയെടുക്കാനുണ്ടായ പലകാരണങ്ങളിലൊന്ന്.

      വി.എസ് അച്യുതാനന്ദൻ എന്ന പരിണിത പ്രജ്ഞനായ സിപിഎം നേതാവ് ഒരിക്കൽ യാതൊരു വസ്തുതകളുടെ പിൻബലവുമില്ലാതെ കേരളം 20 വർഷം കഴിയുമ്പോൾ മുസ്‌ലിം ഭൂരിപക്ഷ രാജ്യമാകുമെന്ന ഒരു ആരോപണം ഉന്നയിച്ചിരുന്നു. തദ്ദേശ തെരഞ്ഞെടുപ്പ് മുതൽ സിപിഎം നേതാക്കൾ പച്ചയായി കേരളത്തിലെ മുസ്‌ലിം - ക്രിസ്ത്യൻ ഹാർമണി തകർക്കാനുള്ള നീക്കങ്ങൾ നടത്തുകയും ചെയ്തിരുന്നു. അതിന്റെയൊക്കെ തുടർച്ചയാണ് ചിലകേന്ദ്രങ്ങളിൽ നിന്ന് ഇപ്പോഴുണ്ടാകുന്ന കലുഷിതമായ പ്രചരണങ്ങൾ.

      ലവ് ജിഹാദ്, നാർക്കോട്ടിക് ജിഹാദ് തുടങ്ങി വംശീയ-വർഗീയവാദികൾ ഉന്നയിക്കുന്ന ആരോപണം പോലെ തന്നെ വസ്തുതളുടെ പിൻബലമോ സത്യത്തിന്റെ നേർകണികയോ ഇല്ലാത്ത ആരോപണമാണ് സിപിഎം നേതാക്കൾ കേരളമാകെ പ്രഭാഷണം നടത്തി പ്രചരിപ്പിക്കാനൊരുങ്ങുന്നത്.

      കേരളത്തിലെ കോളജുകളിൽ പ്രത്യേകിച്ച് സർക്കാർ കോളജുകളിൽ ഏതെങ്കിലും ഒരു വിദ്യാർത്ഥി സംഘടന തങ്ങളിലേക്ക് ബലം പ്രയോഗിച്ച് ആളെ ചേർക്കുന്നെങ്കിൽ അത് സിപിഎമ്മിന്റെ വിദ്യാർത്ഥി സംഘടന മാത്രമാണ്. മറ്റ് വിദ്യാർത്ഥി സംഘടനകളെ പ്രവർത്തിക്കാനനുവദിക്കാതിരിക്കുക, എതിർ ശബ്ദങ്ങളെ കായികമായും സംഘടിത അദ്ധ്യാപക യൂണിയനുകളെ ഉപയോഗിച്ചും നിശബ്ദമാക്കുക തുടങ്ങിയ ഒട്ടേറെ ആരോപണങ്ങൾ അവർക്കെതിരെ വസ്തുതകളുടെ പിൻബലത്തോടെ തന്നെ ഉയരുന്നുണ്ട്.



      പരീക്ഷ ഉത്തരക്കടലാസും സർവകലാശാല മുദ്രയും സിപിഎം അനുകൂല വിദ്യാർത്ഥി സംഘടനാ നേതാക്കളിൽ നിന്ന് പിടിച്ചെടുത്ത സംഭവങ്ങളുമുണ്ടായിട്ടുണ്ട്. അതൊക്കെയിരിക്കെ അതിനേക്കാൾ അപകടമായ പ്രചരണമാണ് ഇവിടെ സിപിഎം അഴിച്ചു വിടുന്നത്.

      സത്യത്തിൽ ഈ ദുഷ്പ്രചരണം സമൂഹങ്ങളുടെ പരസ്പരമുള്ള വിശ്വാസ്യത തകർക്കുക എന്നത് മാത്രം ഉദ്ദേശിച്ചുള്ളതല്ല. സംഘ്പരിവാറും ലവ് ജിഹാദ് പ്രചരകരും പുലർത്തുന്നതുപോലെ സിപിഎം എന്ന പാർട്ടി വച്ച് പുലർത്തുന്ന സ്ത്രീ വിരുദ്ധതയും ഈ പ്രചരണത്തിന് പിന്നിലുണ്ട്. വിദ്യാർത്ഥിനികളും യുവതികളും ആരുടെയും പ്രലോഭനത്തിന് വീണ് ഏങ്ങോട്ടേയ്ക്കും ചായുന്നവരാണ് എന്ന പുരുഷാധിപത്യ അധമ മനസുകൂടി ഈ പ്രചരണത്തിന് പിന്നിലുണ്ട്.

      കേരളത്തെ കലുഷിതമാക്കാനുള്ള നീക്കത്തിൽ നിന്ന് സിപിഎം പിൻമാറുകയാണ് വേണ്ടത്. ഉറച്ച മതേതര നിലപാടുകൾ പുലർത്താറുള്ള സിപിഐ(എം) കേന്ദ്ര നേതൃത്വം സംസ്ഥാനത്തെ ഇനിയെങ്കിലും തിരുത്തിക്കണം.

      കേരളത്തിലെ നവോത്ഥാന മൂല്യങ്ങൾക്കും മതനിരപേക്ഷതക്കും എതിരായ ഈ നീക്കത്തിൽ നിന്ന് സിപിഎമ്മിനെ പിന്തിരിപ്പിക്കാൻ പുരോഗമ ജനാധിപത്യ സമൂഹം ജാഗ്രത പാലിക്കണം.
      Published by:Karthika M
      First published:
      )}