വന്ധ്യതാ ചികിത്സക്കെത്തിയ യുവതികൾക്ക് സ്വന്തം ബീജം നൽകി; ഡോക്ടർ പിതാവായത് 49 കുട്ടികൾക്ക്

ഹേഗ്: സ്വന്തം ബീജം ഉപയോഗിച്ച്​ വന്ധ്യതാ നിവാരണ ചികിത്സയുടെ മറവിൽ 49 കുട്ടികൾക്ക്​ ​ജന്മം നൽകിയ ഡോക്​ടർക്കെതിരെ കോടതി വിധി. ഡച്ചുകാരനായ യാൻ കർബാത് എന്ന ഡോക്ടർ ദാതാക്കളുടേതിന് പകരം സ്വന്തം ബീജമാണ് ചികിത്സക്കായി ഉപയോഗിച്ചതെന്നാണ്​​ കോടതിയുടെ കണ്ടെത്തൽ. 2017ൽ മരിച്ച ഡോക്​ടർക്കെതിരെയുള്ള വിധി ഇപ്പോഴാണ്​ കോടതി പുറപ്പെടുവിച്ചത്​.

കൃത്രിമ ബീജ സങ്കലനം നടത്താൻ യാൻ കർബാത് ​ എന്ന ഡോക്​ടറുടെ ക്ലിനിക്​ സന്ദർശിക്കുന്ന സ്​ത്രീകൾ നിർദേശിക്കുന്ന ബീജത്തിന്​ പകരം സ്വന്തം ബീജം ഉപയോഗിച്ചു എന്ന പരാതിയെ തുടർന്നാണ് സംഭവം വിവാദമായത്. കോർബതിന്റെ റോട്ടർഡാമിലുള്ള ക്ലിനിക്കിലെ ഐവിഎഫ്​ സംവിധാനം ഉപയോഗിച്ച്​ ജന്മമെടുത്ത കുട്ടികളും അവരുടെ അമ്മമാരും ചേർന്ന്​ രൂപീകരിച്ച സംഘടനയാണ് വിചിത്ര ആരോപണവുമായി ഡച്ച്​ കോടതിയെ സമീപിച്ചത്​. ഇയാളുടെ ക്ലിനിക്കിൽ ചികിത്സക്കായി ചെന്ന സ്​ത്രീയാണ്​ കർബാത്തിന്റെ കള്ളക്കളി വെളിച്ചത്ത്​ കൊണ്ടുവന്നത്​.

യുവതി നിർദേശിച്ച ബീജത്തിന്​ പകരംഡോക്ടർ​ സ്വന്തം ബീജം ഉപയോഗിച്ചതായി യുവതി ​ആരോപിച്ചു. പിന്നീട് ഇവിടത്തെ ചികിത്സയിലൂടെ ജനിച്ച കുട്ടികളിൽ നടത്തിയ ഡി എൻ എ ടെസ്റ്റിലാണ്​ 49 കുട്ടികളുടെയും പിതാവ്​ കർബാത് ആണെന്ന്​ കണ്ടെത്തിയത്​. എന്നാൽ ആരോപണം ഉന്നയിക്കുന്ന കുടുംബത്തിലെ കുട്ടികൾക്കെല്ലാം​ തവിട്ട്​ നിറത്തിലുള്ള കണ്ണുകളാണെന്നും കർബാതിന്​ നീലക്കണ്ണുകളാണെന്നും അദ്ദേഹത്തിന്​ വേണ്ടി വാദിക്കുന്ന അഭിഭാഷകൻ അവകാശപ്പെട്ടിരുന്നു.
കർബാതിന്റെ ഡിഎൻഎ പരിശോധനക്കായി രക്ഷിതാക്കൾക്കും കുട്ടികൾക്കും നൽകണമെന്ന്​ ഡച്ച്​ കോടതി ഉത്തരവിട്ടതിന്​ പിന്നാലെയാണ്​ സംഭവം ലോകമറിയുന്നത്​. ലോക്കറിൽ സൂക്ഷിച്ചിരുന്ന ഡിഎൻഎ പരിശോധനക്കായി വിട്ടുകിട്ടാൻ ചികിത്സ തേടിയവർ കോടതിയെ സമീപിക്കുകയായിരുന്നു. മരണപ്പെടുന്നതിന്​ മുമ്പ്​ താൻ 60ഓളം കുട്ടികൾക്ക്​ ജന്മം നൽകിയതായി​ കർബാത്​ സമ്മതിച്ചിരുന്നതായി റിപ്പോർട്ടുകളുണ്ട്​. അതേസമയം,​ 2009ൽ ചില ആരോപണങ്ങൾ ഉയർന്നതിനെ തുടർന്ന്​ കർബാതിന്റെ ക്ലിനിക്​ അടച്ചുപൂട്ടിയിരുന്നു.

ഡോക്ടർ ജന്മം നൽകിയ കുട്ടികളിൽ ഒരാളായ എറിക് ലിവർ പ്രതികരിച്ചത് ഇങ്ങനെ- 'അദ്ദേഹം എന്റെ അമ്മയെ വഞ്ചിച്ചതായി തോന്നുന്നില്ല. പിതാവിന് കുട്ടികളുണ്ടാകാതിരുന്നപ്പോൾ എന്റെ അമ്മയ്ക്ക് ഒരു കുഞ്ഞിനെ കൂടിയേ തീരുമായിരിന്നുള്ളൂ'.