Miss Kerala | മിസ് കേരള പട്ടം കണ്ണൂർ സ്വദേശി ഗോപികയ്ക്ക്; ലിവ്യ, ഗഗന എന്നിവർ രണ്ടും മൂന്നും സ്ഥാനങ്ങളിൽ

25 പേർ മാറ്റുരച്ച മിസ് കേരള മത്സരത്തിൽ കണ്ണൂർ സ്വദേശിനി ഗോപിക സുരേഷ് സൗന്ദര്യറാണി പട്ടം കരസ്ഥമാക്കി. ബംഗളുരുവിൽ വിദ്യാർത്ഥിനിയാണ് ഗോപിക. എറണാകുളം സ്വദേശിനി ലിവ്യ, ഓസ്ട്രേലിയയിൽ വിദ്യാർത്ഥിനിയായ തൃശൂർ സ്വദേശിനി ഗഗന ഗോപാൽ എന്നിവരാണ് ഫസ്റ്റ്, സെക്കന്റ് റണ്ണർ അപ്പ് സ്ഥാനങ്ങളിൽ.

'മയക്കുമരുന്ന് ഉപയോഗവുമായി ബന്ധപ്പെട്ട് ഉയർന്ന വിവാദങ്ങളിൽ ആരാണ് ഉത്തരവാദി' എന്ന ചോദ്യത്തിനായിരുന്നു മത്സരാർത്ഥികൾ ഫൈനൽ റൗണ്ടിൽ ഉത്തരം നൽകേണ്ടിയിരുന്നത്.

കേരളീയ ലഹങ്ക, ഗൗൺ എന്നിവ അണിഞ്ഞായിരുന്നു ആദ്യ റൗണ്ടുകൾ. മൂന്നാമത്തെ റൗണ്ടിൽ ഫാഷൻ ഡിസൈനർ സഞ്ജന ജോൺ ഡിസൈൻ ചെയ്ത ഗൗണിൽ സുന്ദരിമാർ റാമ്പ് വാക്ക് നടത്തി.

ഫൈനൽ റൗണ്ടിൽ അഞ്ചുപേരാണ് മത്സരിച്ചത്. സംവിധായകൻ ജീത്തു ജോസഫ്, സംഗീത സംവിധായകൻ ദീപക് ദേവ് എന്നിവരായിരുന്നു വിധിനിർണ്ണയം നടത്തിയത്.