'ഇത് സർക്കാരിന് കൊടുത്തതു കൊണ്ട് ഞാൻ മുടിഞ്ഞു പോകില്ല' 25 വർഷം 'ലോക്ക്ഡൗണി'ലായ ആൾ പെൻഷൻ തുക നൽകിക്കൊണ്ട് പറയുന്നു

Positive note | 25 വർഷമായി കിടപ്പിലായിപ്പോയ അപ്പുക്കുട്ടൻ നായർ രണ്ടുമാസത്തെ പെൻഷൻ തുകയായ 2500 രൂപയാണ് മണിമല പൊലീസ് സ്റ്റേഷൻ ഹൌസ് ഓഫീസർ ഷാജു ജോസിനെ ഏൽപ്പിച്ചത്.

News18 Malayalam | news18-malayalam
Updated: May 1, 2020, 10:59 AM IST
'ഇത് സർക്കാരിന് കൊടുത്തതു കൊണ്ട് ഞാൻ മുടിഞ്ഞു പോകില്ല' 25 വർഷം 'ലോക്ക്ഡൗണി'ലായ ആൾ പെൻഷൻ തുക നൽകിക്കൊണ്ട് പറയുന്നു
appukkuttan nair cmdrf donation
  • Share this:
കോട്ടയം: മുഖ്യമന്ത്രിയുടെ ദുരിതാശ്വാസനിധിയിലേക്ക് വരുന്ന ചില സംഭാവനകൾക്ക് പിന്നിൽ ഹൃദയസ്പർശിയായ കഥ പറയാനുണ്ടാകും. ജീവിതത്തിലെ ഏറ്റവും പ്രധാനപ്പെട്ട കാര്യങ്ങൾ മാറ്റിവെച്ചാണ് പലരും സംഭാവന നൽകുന്നത്. അത്തരമൊരു സംഭവമാണ് മണിമല പൊലീസ് സ്റ്റേഷൻ ഹൌസ് ഓഫീസർ ഷാജു ജോസ് പറയുന്നത് .

ഷാജു ജോസ് പങ്കുവെച്ച കുറിപ്പിൽ നിന്ന്

കഴിഞ്ഞ ദിവസം (ഏപ്രിൽ 30 ) രാവിലെ ഷാജുവിന്‍റെ ഔദ്യോഗിക മൊബൈൽ ഫോണിൽ ഒരു കോള്‍ വന്നു. സ്റ്റേഷൻ പരിധിയിൽ പെട്ട വെളളാവൂര്‍ വട്ടക്കാവില്‍ എന്ന സ്ഥലത്തു താമസിക്കുന്ന അപ്പുക്കുട്ടൻ നായർ എന്നയാളാണ് വിളിച്ചത്. താൻ ഒരു വികലാംഗൻ ആണെന്നും തനിക്കു ലഭിക്കുന്ന വികലാംഗ പെൻഷൻ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യാൻ ആഗ്രഹിക്കുന്നതായും അറിയിച്ചു. "ഒരു സാധാരണ സംഭവം എന്ന നിലയിൽ ഞാൻ അതിനുള്ള മാർഗവും പണം അടക്കേണ്ട രീതിയുമൊക്ക അദ്ദേഹത്തോട് പറഞ്ഞു. എന്നാൽ തനിക്ക് 73 വയസ്സ് ആയെന്നും ഭാര്യയുമൊത്താണ് വീട്ടിൽ താമസിക്കുന്നതെന്നും വിളിച്ചയാൾ പറഞ്ഞു. സഹായത്തിനു വിവാഹം കഴിച്ചയച്ച ഏക മകളെ വിളിച്ചു ബുദ്ധിമുട്ടിക്കേണ്ട എന്ന് കരുതിയാണ് പോലീസിന്റെ സഹായം തേടിയത് എന്നും അദ്ദേഹം പറഞ്ഞു. വൈകുന്നേരം പട്രോളിങ്ങിന് പോകുമ്പോൾ വീട്ടിൽ വരാമെന്നും പണം വാങ്ങി മുഖ്യമന്ത്രി യുടെ ദുരിതാശ്വാസ നിധിയിൽ അടക്കാൻ സഹായിക്കാമെന്നും ഞാൻ അദ്ദേഹത്തെ അറിയിച്ചു"-ഷാജു പറഞ്ഞു.

"വൈകുന്നേരം 5.30 മണിയോടെ ഞാനും സഹപ്രവർത്തകരും അദേഹത്തിന്റെ വീടിനടുത്തെത്തി ഫോൺ വിളിച്ചപ്പോൾ പ്രായമുള്ള ഒരമ്മ വഴി കാണിക്കാൻ ഇറങ്ങി വന്നു. ചെറിയ വൈകല്യം എന്തെങ്കിലും ഉള്ള മുച്ചക്ര വാഹനം ഉപയോഗിക്കുന്ന ഒരാൾ ആയിരിക്കും ഈ അപ്പുക്കുട്ടൻനായർ എന്നാണ് ഞാൻ കരുതിയത്. മഴയുടെ അകമ്പടിയോടെ ഞാനും സഹപ്രവർത്തകനും അവരുടെ വീട്ടിലെത്തി. ഒരു ചെറിയ വീട്. അകത്തേക്ക് കയറുമ്പോൾ ഇടതു വശത്തു നിന്നും ഒരു സ്വാഗതം. സാറേ ഇവിടെ... ഞാൻ നോക്കിയപ്പോൾ മെലിഞ്ഞ ഒരു മനുഷ്യൻ. കട്ടിലിൽ കിടക്കുന്നു. സാർ ഞാൻ ഇരുപത്തഞ്ചു കൊല്ലമായി ലോക്ക് ഡൌൺ ആണ്.. കിടന്ന കിടപ്പാണ്. അതുകൊണ്ടാണ് സാറിനെ ബുദ്ധിമുട്ടിച്ചത്. 1995 ഡിസംബർ 11 ന് അടുത്തുള്ള ഒരു പുരയിടത്തിൽ മരം വെട്ടാൻ പോയപ്പോൾ മരത്തിൽ നിന്ന് വീണ് നട്ടെല്ലിന് സാരമായ പരിക്കേറ്റ് അന്ന് മുതൽ കിടപ്പിലായതാണ്. ഒന്നര മാസത്തോളം കോട്ടയം മെഡിക്കൽ കോളേജിൽ ചികിത്സയിൽ കഴിഞ്ഞു. പിന്നെ കഴിഞ്ഞ 25 വർഷമായി ഈ കൊച്ചു വീട്ടിൽ ഭാര്യ ഭവാനിയമ്മയോടൊപ്പം.

ചായ ഒക്കെ തന്ന് അല്പം കഴിഞ്ഞപ്പോൾ കട്ടിലിനടിയിൽ നിന്നും 2500 രൂപ എടുത്ത് ഭാര്യയുടെ കൈയിൽ കൊടുത്ത അപ്പുക്കുട്ടൻ നായർ, അത് ഇൻസ്പെക്ടറെ ഏൽപ്പിക്കാൻ പറഞ്ഞു. സാർ ഇത് തന്റെ രണ്ട് മാസത്തെ പെൻഷൻ തുകയാണെന്ന് അദ്ദേഹം പറഞ്ഞു. " 40 രൂപയാണ് ആദ്യം എനിക്ക് കിട്ടിയ പെൻഷൻ. പിന്നെ അത് 60 ആയി. 1000 ആയി. ഇത് വരെ 1200 ആയിരുന്നു. ഇപ്പോൾ കഴിഞ്ഞ മാസം മുതൽ അത് 1300 ആയി"- അപ്പുക്കുട്ടൻ നായർ പറഞ്ഞു. കഴിഞ്ഞ രണ്ട് മാസത്തെ പെൻഷൻ തുകയാണ് അദ്ദേഹം തന്നെ ഏല്പിച്ചതെന്ന് ഷാജു പറയുന്നു.

"ഇതെല്ലാം കൊടുത്താൽ ഇനി മരുന്നിനും ഭക്ഷണത്തിനും എന്ത് ചെയ്യുമെന്ന് ഞാൻ ചോദിച്ചപ്പോൾ അദ്ദേഹം പറഞ്ഞു. ഭാര്യക്കും ചെറിയ പെൻഷൻ ഉണ്ട്. അത് മതി. പിന്നെ അരിയായും കിറ്റായും ഒക്കെ സർക്കാർ സഹായിച്ചു. എന്തെല്ലാം കാര്യങ്ങൾ ഗവണ്മെന്റ് ചെയ്യുന്നുണ്ട്. അപ്പോൾ സർക്കാരിന് ഒരാവശ്യം വരുമ്പോൾ നമ്മൾ സഹായിക്കേണ്ടെ എന്നാണ് അപ്പുക്കുട്ടൻ നായരുടെ ചോദ്യമെന്ന് ഷാജു പറുന്നു. 'ഇത് സർക്കാരിന് കൊടുത്തത് കൊണ്ട് ഞാൻ മുടിഞ്ഞു പോകില്ല സാർ..'- അപ്പുക്കുട്ടൻ നായർ പറഞ്ഞു.

TRENDING:Covid 19 | 130 കോടി ജനങ്ങളുള്ള മഹാരാജ്യത്ത് മൂന്നുമാസത്തിനിടെ മരണം 1000; ഇന്ത്യ എന്താണ് ചെയ്യുന്നത്? [NEWS]ആക്ഷേപിക്കാൻ യുഡിഎഫിന് എന്ത് അർഹത? 'സർക്കാരിന്റെ ധൂർത്ത്' ആരോപണങ്ങൾക്ക് മന്ത്രി തോമസ് ഐസക്കിന്റെ മറുപടി [NEWS]സ്വത്ത് തർക്കം: കുടുംബത്തിലെ ആറു പേരെ വെട്ടിക്കൊലപ്പെടുത്തിയ യുവാവ് പൊലീസിൽ കീഴടങ്ങി [NEWS]

നാളെ ഈ തുക ബാങ്കിൽ അടച്ചിട്ട് രസീത് ഇവിടെ എത്തിക്കാം എന്ന് പറഞ്ഞപ്പോൾ നാളെ തൊഴിലാളി ദിനമാണ് സാർ.. ബാങ്ക് അവധി ആയിരിക്കും എന്ന ഓർമ്മപ്പെടുത്തലുമുണ്ടായി. 'സാർ മറ്റന്നാൾ അടച്ചാൽ മതി. രസീത് ഒന്നും തരേണ്ട എന്ന് എന്നെ ഓർമിപ്പിച്ചു അദ്ദേഹം വീണ്ടും ചിരിച്ചു.."- ഷാജു പറയുന്നു. "ശമ്പളത്തിന്റെ ഒരു ഭാഗം കടമായി ചോദിച്ചപ്പോൾ കലി പൂണ്ടവരുടെയും ഞങ്ങളുടെ വരുമാനത്തിൽ തൊടാൻ പാടില്ല എന്ന് ഉത്തരവ് ഇറക്കിയവരുമുള്ളപ്പോൾ ഇത്രയെങ്കിലും ചെയ്യണ്ടെ"- അപ്പുക്കുട്ടൻ നായർ ചോദിച്ചു.

"എത്രയോ ആൾക്കാർ. പണം ഉള്ളവരും ഇല്ലാത്തവരും കൊറോണക്ക് ഇരയായി.. ഇത്രയെങ്കിലും ചെയ്തില്ലെങ്കിൽ നമ്മൾ നന്ദിയില്ലാത്തവരാകില്ലേ.."
വാട്ടർ ബെഡിൽ ഒരേ കിടപ്പു കിടന്നുകൊണ്ട് ജീവിതത്തെ പോസിറ്റീവ് ആയി കാണുന്ന അപ്പുക്കുട്ടൻ നായരുടെ ഈ ചോദ്യവും ഭിത്തിയിൽ തൂങ്ങുന്ന കട്ടി മീശ വച്ച 25 കൊല്ലം മുൻപത്തെ ചെറുപ്പക്കാരന്റെ രൂപവും അവിടെ നിന്നിറങ്ങി ഏറെ സമയം കഴിഞ്ഞിട്ടും തന്നെ പിന്തുടർന്നതായി ഷാജു ജോസ് പറയുന്നു.

അപ്പുക്കുട്ടൻനായരെ പോലെയുള്ള എല്ലാ നല്ല മനുഷ്യർക്കും ന്യൂസ് 18 മലയാളത്തിന്‍റെ സ്നേഹാദരങ്ങൾ...
First published: May 1, 2020, 10:13 AM IST
കൂടുതൽ കാണുക
അടുത്തത് വാര്‍ത്തകള്‍

Top Stories

corona virus btn
corona virus btn
Loading