• HOME
  • »
  • NEWS
  • »
  • money
  • »
  • Vivo's ED Raids: വരുമാനത്തിന്‍റെ 50 ശതമാനം ചൈനയിലേക്ക് കടത്തി; വിവോയുടെ 465 കോടി രൂപ ഇ.ഡി കണ്ടുകെട്ടി

Vivo's ED Raids: വരുമാനത്തിന്‍റെ 50 ശതമാനം ചൈനയിലേക്ക് കടത്തി; വിവോയുടെ 465 കോടി രൂപ ഇ.ഡി കണ്ടുകെട്ടി

കള്ളപ്പണം വെളുപ്പിക്കൽ കേസിൽ വിവോയുമായി ബന്ധപ്പെട്ട സ്ഥലങ്ങളിലും ഷവോമി, ഓപ്പോ ഉൾപ്പെടെയുള്ള ഓഫീസുകളിലും ഇ.ഡി പരിശോധന നടത്തി

Vivo

Vivo

  • Last Updated :
  • Share this:
    ചൈനീസ് സ്മാർട്ട്‌ഫോൺ നിർമാതാക്കളായ വിവോയ്ക്കും അനുബന്ധ സ്ഥാപനങ്ങൾക്കുമെതിരെ കള്ളപ്പണം വെളുപ്പിക്കൽ അന്വേഷണത്തിൽ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) ചൊവ്വാഴ്ചയും ബുധനാഴ്ചയും ഇന്ത്യയിലെ 40-ൽ അധികം സ്ഥലങ്ങളിൽ റെയ്ഡ് നടത്തി. കമ്പനിയുടെ ഇന്ത്യൻ വിഭാഗം വിറ്റുവരവിന്റെ 50 ശതമാനവും ചൈനയിലേക്ക് അയച്ചതായി ED വ്യാഴാഴ്ച പറഞ്ഞു, ഇവിടെ നികുതി വെട്ടിക്കുന്നതിനായാണ് വിവോ 62,476 കോടി രൂപ ചൈനയിലേക്ക് അയച്ചത്. ഇതോടെ വിവോയുടെ 465 കോടി രൂപ ഇ. ഡി കണ്ടുകെട്ടി. എന്നാൽ സംഭവത്തിൽ ന്യായമായ അന്വേഷണമുണ്ടാകുമെന്ന് പ്രതീക്ഷിക്കുന്നതായി ചൈന പ്രതികരിച്ചു.

    എന്താണ് പ്രശ്നം?

    കള്ളപ്പണം വെളുപ്പിക്കൽ കേസിൽ വിവോയുമായി ബന്ധപ്പെട്ട സ്ഥലങ്ങളിലും ഷവോമി, ഓപ്പോ ഉൾപ്പെടെയുള്ള  കമ്പനികളിലും ഇ.ഡി പരിശോധന നടത്തി. ജമ്മു കശ്മീർ ആസ്ഥാനമായുള്ള ഏജൻസിയുടെ ഒരു വിതരണക്കാരനെതിരെ അടുത്തിടെ ഡൽഹി പോലീസ് (സാമ്പത്തിക കുറ്റകൃത്യ വിഭാഗം) എഫ്‌ഐആർ എടുത്തത്, ആ കമ്പനിയിലെ ഏതാനും ചൈനീസ് ഓഹരി ഉടമകൾ അവരുടെ തിരിച്ചറിയൽ രേഖകൾ വ്യാജമായി സൃഷ്ടിച്ചതാണെന്ന് കണ്ടെത്തിയതിനെ തുടർന്നായിരുന്നു.

    കടലാസ് കമ്പനികൾ ഉപയോഗിച്ച് അനധികൃതമായി സൃഷ്ടിച്ച ഫണ്ട് വെളുപ്പിക്കാനാണ് ഈ വ്യാജരേഖ ചമച്ചതെന്ന് ED സംശയിക്കുന്നു, കൂടാതെ ഈ “കുറ്റകൃത്യത്തിലൂടെയുള്ള വരുമാനത്തിൽ” ചിലത് ഇന്ത്യൻ നികുതി, എൻഫോഴ്‌സ്‌മെന്റ് ഏജൻസികളുടെ നിരീക്ഷണത്തിലാകാൻ കാരണമായി.

    ചൈനീസ് സ്‌മാർട്ട്‌ഫോൺ നിർമാതാക്കളായ വിവോയുടെ ഇന്ത്യൻ വിഭാഗം വിറ്റുവരവിന്റെ 50 ശതമാനം അതായത് 62,476 കോടി രൂപ ചൈനയിലേക്ക് അയച്ചതായി ഇഡി വ്യാഴാഴ്ച വ്യക്തമാക്കി. വിവോ മൊബൈൽ ഇന്ത്യ പ്രൈവറ്റ് ലിമിറ്റഡിനും അതിന്റെ 23 അനുബന്ധ സ്ഥാപനങ്ങൾക്കുമെതിരെ ഈ ആഴ്ച ആദ്യം ആരംഭിച്ച പാൻ-ഇന്ത്യ റെയ്ഡുകൾക്ക് ശേഷം വിവിധ സ്ഥാപനങ്ങൾ 119 ബാങ്ക് അക്കൗണ്ടുകളിലായി 465 കോടി രൂപയും 73 ലക്ഷം രൂപയും 2 കിലോ സ്വർണവും സൂക്ഷിച്ചിട്ടുണ്ടെന്ന് കണ്ടെത്തിയിരുന്നു. ഇവയെല്ലാം കണ്ടുകെട്ടിയതായി ഇ.ഡി അറിയിച്ചു.

    ഈ ചൈനീസ് സ്ഥാപനങ്ങൾ നടപടി നേരിടുന്നത് ഇതാദ്യമാണോ?

    Xiaomi, Oppo, Vivo എന്നിവയുൾപ്പെടെയുള്ള ഈ ചൈനീസ് സ്മാർട്ട്‌ഫോൺ കമ്പനികളും, അവയുടെ വിതരണക്കാർ, ബന്ധപ്പെട്ട സ്ഥാപനങ്ങൾ എന്നിവിടങ്ങളിൽ കഴിഞ്ഞ വർഷം ഡിസംബറിൽ രാജ്യത്തുടനീളം ആദായനികുതി വകുപ്പ് റെയ്ഡ് നടത്തി, പിന്നീട് 6,500 കോടി രൂപയിലധികം വരുന്ന കണക്കിൽ പെടാത്ത വരുമാനം കണ്ടെത്തിയിരുന്നു. ഈ കമ്പനികൾ ഇന്ത്യൻ നികുതി നിയമങ്ങളും ചട്ടങ്ങളും ലംഘിച്ചതായി കണ്ടെത്തി.

    ചൈനീസ് സ്ഥാപനങ്ങളിൽ പരിശോധന കർശനമാക്കാനുള്ള കേന്ദ്രസർക്കാരിന്റെ നടപടികളുടെ ഭാഗമായും ഇവിടെ പ്രവർത്തിക്കുമ്പോൾ കള്ളപ്പണം വെളുപ്പിക്കൽ, നികുതി വെട്ടിപ്പ് തുടങ്ങിയ ഗുരുതരമായ സാമ്പത്തിക കുറ്റകൃത്യങ്ങളിൽ ഏർപ്പെടുന്ന അത്തരം സ്ഥാപനങ്ങൾക്കും അവരുമായി ബന്ധപ്പെട്ട ഇന്ത്യൻ പ്രവർത്തകർക്കുമെതിരെയുള്ള തുടർച്ചയായ നടപടികളുടെ ഭാഗമായാണ് ഈ നടപടി.

    കിഴക്കൻ ലഡാക്കിലെ യഥാർത്ഥ നിയന്ത്രണ രേഖയിൽ (എൽഎസി) ഇരു രാജ്യങ്ങളും തമ്മിലുള്ള സൈനിക നിലപാടിന്റെ പശ്ചാത്തലത്തിലാണ് ചൈനയുടെ പിന്തുണയുള്ള ഇന്ത്യയിൽ പ്രവർത്തിക്കുന്ന കമ്പനികൾക്കും ​​സ്ഥാപനങ്ങൾക്കും ​​എതിരായ നടപടി ശക്തമാക്കിയത്.

    ചൈനയുടെ പ്രതികരണം എങ്ങനെ?

    “ഞാൻ പലതവണ ഊന്നിപ്പറഞ്ഞതുപോലെ, വിദേശത്ത് ബിസിനസ്സ് നടത്തുമ്പോൾ നിയമങ്ങളും ചട്ടങ്ങളും പാലിക്കാൻ ചൈനീസ് സർക്കാർ എല്ലായ്‌പ്പോഴും ചൈനീസ് കമ്പനികളോട് ആവശ്യപ്പെട്ടിട്ടുണ്ട്… അതിനിടയിൽ, ചൈനീസ് കമ്പനികളെ സംരക്ഷിക്കുന്നതിൽ ഞങ്ങൾ ഉറച്ചുനിൽക്കുന്നു. അവരുടെ നിയമപരമായ അവകാശങ്ങളും താൽപ്പര്യങ്ങളും സംരക്ഷിക്കപ്പെടണം"- ചൈനീസ് വിദേശകാര്യ മന്ത്രാലയ വക്താവ് ഷാവോ ലിജിയാൻ വാർത്താസമ്മേളനത്തിൽ പറഞ്ഞു,

    "ഇന്ത്യൻ അധികൃതർ അന്വേഷണവും റെയ്ഡും മറ്റും നടത്തുമ്പോൾ നിയമങ്ങൾ പാലിക്കുമെന്ന് ഞങ്ങൾ പ്രതീക്ഷിക്കുന്നു, കൂടാതെ ഇന്ത്യയിൽ നിക്ഷേപം നടത്തുകയും പ്രവർത്തിക്കുകയും ചെയ്യുന്ന ചൈനീസ് കമ്പനികൾക്ക് യഥാർത്ഥവും ന്യായവും വിവേചനരഹിതവുമായ ബിസിനസ് അന്തരീക്ഷം ലഭ്യമാക്കുകയും വേണം," വക്താവ് പറഞ്ഞു.

    മാർക്കറ്റ് റിസർച്ച് ആൻഡ് അനാലിസിസ് സ്ഥാപനമായ ഐഡിസിയുടെ കണക്കനുസരിച്ച്, 2022 ന്റെ ആദ്യ പാദത്തിൽ, വിവോയ്ക്ക് 5.5 ദശലക്ഷം ഉപകരണങ്ങൾ കയറ്റുമതി ചെയ്ത ഇന്ത്യൻ സ്മാർട്ട്‌ഫോൺ വിഭാഗത്തിൽ 15 ശതമാനം വിപണി വിഹിതം ഉണ്ടായിരുന്നു. കൗണ്ടർപോയിന്റ് റിസർച്ച് റിപ്പോർട്ട് അനുസരിച്ച്, 2022 മാർച്ച് പാദത്തിൽ രാജ്യത്തെ 10,000-20,000 രൂപ വിലയുള്ള വിഭാഗത്തിലെ ഏറ്റവും മികച്ച 5G ബ്രാൻഡായി വിവോ മാറി.
    Published by:Anuraj GR
    First published: