രൂപയിൽ വ്യാപാരം നടത്താൻ വോസ്‌ട്രോ അക്കൗണ്ടുകള്‍ തുറന്നത് എട്ട് രാജ്യങ്ങൾ; ആറുമാസത്തിനിടെ 50ഓളം അക്കൗണ്ടുകൾ
ഇതുവരെ 49ഓളം വോസ്‌ട്രോ അക്കൗണ്ടുകളാണ് തുറന്നതെന്ന് ബന്ധപ്പെട്ട വൃത്തങ്ങള്‍ അറിയിച്ചു
(പ്രതീകാത്മക ചിത്രം)
- News18 Malayalam
- Last Updated :
ന്യൂഡല്‍ഹി: ഇന്ത്യന്‍ രൂപയില്‍ വിദേശ വ്യാപാരം സുഗമമാക്കുന്നതിനായി സ്‌പെഷ്യല്‍ റുപ്പി വോസ്‌ട്രോ അക്കൗണ്ട് (Special Rupee vostro Account ) തുറന്നത് എട്ട് രാജ്യങ്ങള്‍. ആറ് മാസത്തിനുള്ളില്‍ ഈ അക്കൗണ്ടുകള്‍ക്ക് സ്വീകാര്യത വര്‍ധിച്ചിട്ടുണ്ട്. കൂടുതല്‍ രാജ്യങ്ങള്‍ ഇന്ത്യന്‍ കറന്‍സിയില്‍ വ്യാപാരം നടത്താന്‍ താല്‍പ്പര്യം പ്രകടിപ്പിച്ച് രംഗത്തെത്തുന്നുമുണ്ട്. ഇതുവരെ 49ഓളം വോസ്‌ട്രോ അക്കൗണ്ടുകളാണ് തുറന്നതെന്ന് ബന്ധപ്പെട്ട വൃത്തങ്ങള്‍ അറിയിച്ചു.
സ്‌പെഷ്യല്‍ റുപ്പി വോസ്‌ട്രോ അക്കൗണ്ട് തുറന്നരാജ്യങ്ങള്‍?
റഷ്യ, ശ്രീലങ്ക, മൗറിഷ്യസ്, മലേഷ്യ, സിംഗപ്പൂര്‍, മ്യാന്‍മാര്‍, ഇസ്രായേല്‍ ജര്‍മ്മനി, തുടങ്ങിയ എട്ട് രാജ്യങ്ങളാണ് സ്‌പെഷ്യല്‍ റുപ്പി വോസ്‌ട്രോ അക്കൗണ്ടുകൾ ആരംഭിച്ചത്. കഴിഞ്ഞ ജൂലൈയില്‍ വിദേശ രാജ്യങ്ങളുമായി ഇന്ത്യന്‍ രൂപയിൽ വ്യാപാര ഇടപാടുകള്‍ നടത്തുന്നത് സംബന്ധിച്ച് വിശദമായ മാര്‍ഗ്ഗ നിര്‍ദ്ദേശം റിസര്‍വ് ബാങ്ക് പ്രഖ്യാപിച്ചിരുന്നു.
സ്‌പെഷ്യല്‍ വോസ്‌ട്രോ അക്കൗണ്ട് ഉടമകള്‍ക്ക് ഇന്ത്യയിലെ സര്‍ക്കാര്‍ സെക്യൂരിറ്റികളില്‍ സര്‍പ്ലസ് ബാലന്‍സ് നിക്ഷേപം നടത്താന്‍ അനുവാദമുണ്ട്. പുതിയ നയം കൂടുതല്‍ ജനകീയമാക്കുന്നതിന് ആവശ്യമായ സൗകര്യവും ആര്‍ബിഐ ഒരുക്കിയിട്ടുണ്ട്.
Also read: ഇഷ്ടിക, കുമ്മായം ചില്ലറ വ്യാപാരികൾക്കായി ദേശീയ റീട്ടെയിൽ വ്യാപാര നയം കൊണ്ടുവരാനൊരുങ്ങി കേന്ദ്രം
എന്താണ് സ്‌പെഷ്യല്‍ റുപ്പി വോസ്‌ട്രോ അക്കൗണ്ട് (എസ്ആര്‍വി)?
അന്തര്‍ദേശീയ വ്യാപാരം ഇന്ത്യയില്‍ രൂപയില്‍ നടത്തുന്നതിനായി ആര്‍ബിഐ പ്രഖ്യാപിച്ച പുതിയ വ്യാപാര സംവിധാനമാണ് സ്‌പെഷ്യല്‍ റുപ്പി വോസ്‌ട്രോ അക്കൗണ്ട് അഥവാ എസ്ആര്‍വിഎ.
വ്യാപാര ഇടപാടുകള്‍ പൂര്‍ത്തിയാക്കുന്നതിന് അതത് അംഗീകൃത ബാങ്കുകള്‍ വ്യാപാര പങ്കാളിയായ രാജ്യത്തെ ബാങ്കുകളുടെ SRVA പ്രവര്‍ത്തന സജ്ജമാക്കേണ്ടതുണ്ട്. ഇന്ത്യയിലെ ഒരു ഇറക്കുമതിക്കാരന്‍ വിദേശ വ്യാപാരിക്ക് പണമടയ്ക്കുന്ന അവസരത്തില്‍ ഈ തുക വോസ്‌ട്രോ അക്കൗണ്ടിലേക്ക് ക്രെഡിറ്റ് ചെയ്യപ്പെടുകയാണ് ചെയ്യുന്നത്.
അതേരീതിയില്‍ ഇന്ത്യന്‍ കയറ്റുമതിക്കാരന് ചരക്കുകള്‍ക്കായി ഇന്ത്യന്‍ രൂപയില്‍ പണം നല്‍കുമ്പോള്‍ ഈ വോസ്‌ട്രോ അക്കൗണ്ടില്‍ നിന്ന് തുക കുറയ്ക്കുകയും അത് കയറ്റുമതി ചെയ്യുന്നയാളിന്റെ സാധാരണ അക്കൗണ്ടിലേക്ക് ക്രെഡിറ്റ് ചെയ്യുകയും ചെയ്യുന്നു.
എസ്ആര്‍വിഎയും റുപി വോസ്‌ട്രോ അക്കൗണ്ടും തമ്മിലുള്ള വ്യത്യാസമെന്ത്?
ഇന്ത്യൻ രൂപയിലുള്ള അന്താരാഷ്ട്ര വ്യാപാര സെറ്റില്‍മെന്റ് നിലവിലുള്ള സമ്പ്രദായത്തിന്റെ ഒരു വിപുലീകരിച്ച പതിപ്പാണ്. സ്‌പെഷ്യല്‍ റുപ്പി വോസ്‌ട്രോ അക്കൗണ്ട്ഓപ്പണ്‍ ചെയ്യുന്നതിന് മുന്‍കൂര്‍ അനുമതി ആവശ്യമാണ്.
ഏറ്റവും വിശ്വാസ്യതയുള്ള വാർത്തകള്‍, തത്സമയ വിവരങ്ങൾ, ലോകം, ദേശീയം, ബോളിവുഡ‍്, സ്പോർട്സ്, ബിസിനസ്, ആരോഗ്യം, ലൈഫ് സ്റ്റൈൽ വാർത്തകൾ ന്യൂസ് 18 മലയാളം വെബ്സൈറ്റിൽ വായിക്കൂ.
