• HOME
  • »
  • NEWS
  • »
  • money
  • »
  • Digital Lending | മൊബൈൽ വഴി കിട്ടുന്ന വായ്പ: ആർബിഐയുടെ പറയുന്ന പുതിയ മാനദണ്ഡങ്ങൾ എന്തെല്ലാം?

Digital Lending | മൊബൈൽ വഴി കിട്ടുന്ന വായ്പ: ആർബിഐയുടെ പറയുന്ന പുതിയ മാനദണ്ഡങ്ങൾ എന്തെല്ലാം?

ഡിജിറ്റൽ വായ്പയുമായി ബന്ധപ്പെട്ട പുതിയ വ്യവസ്ഥകൾ എന്തൊക്കെയാണെന്നും ആർബിഐ ഇവ അവതരിപ്പിച്ചത് എന്തുകൊണ്ടാണെന്നും പരിശോധിക്കാം

(പ്രതീകാത്മക ചിത്രം)

(പ്രതീകാത്മക ചിത്രം)

  • Last Updated :
  • Share this:
    രാജ്യത്തെ ഡിജിറ്റൽ വായ്പാ (digital lending) രം​ഗത്ത് വർധിച്ചു വരുന്ന ക്രമക്കേടുകൾ നിയന്ത്രിക്കുന്നതിനായി റിസർവ് ബാങ്ക് ഓഫ് ഇന്ത്യ (ആർബിഐ) മാനദണ്ഡങ്ങൾ ( norms) കർശനമാക്കുന്നു. ഡിജിറ്റൽ വായ്പ ലഭ്യമാക്കുന്ന സ്ഥാപനങ്ങൾക്കായി പുതിയ നിരവധി മാർ​ഗനിർദ്ദേശങ്ങൾ ആർബിഐ പ്രഖ്യാപിച്ചു. പുതിയ വ്യവസ്ഥ അനുസരിച്ച്, മൂന്നാം കക്ഷികളുടെ ഇടപെടൽ ഒഴിവാക്കി വായ്പ തുക ഡിജിറ്റൽ വായ്പയെടുക്കുന്നവരുടെ ബാങ്ക് അക്കൗണ്ടുകളിലേക്ക് നേരിട്ട് ക്രെഡിറ്റ് ചെയ്യണമെന്നത് നിർബന്ധമാക്കി.

    ഡിജിറ്റൽ വായ്പയുമായി ബന്ധപ്പെട്ട പുതിയ വ്യവസ്ഥകൾ എന്തൊക്കെയാണെന്നും ആർബിഐ ഇവ അവതരിപ്പിച്ചത് എന്തുകൊണ്ടാണെന്നും പരിശോധിക്കാം.

    പുതിയ വ്യവസ്ഥകൾ?

    ഡിജിറ്റൽ വായ്പ ലഭ്യമാക്കുമ്പോൾ, വായ്പ എടുക്കുന്നവരുടെ പൂർണ്ണ സമ്മതമില്ലാതെ വായ്പാ പരിധി വർധിപ്പിക്കുന്നത് ആർബിഐ നിരോധിച്ചു. പുതിയ മാനദണ്ഡങ്ങൾ അനുസരിച്ച്, വായ്പ സേവന ദാതാക്കൾക്ക് (എൽഎസ്പി) നൽകേണ്ട ഫീസും മറ്റ് ചാർജുകളും വായ്പ എടുക്കുന്നവരല്ല, മറിച്ച്ഡി ഡിജിറ്റൽ വായ്പ സ്ഥാപനങ്ങൾ ആണ് നൽകേണ്ടത്. വായ്പ വിതരണം ചെയ്യുന്നതും തിരിച്ചടയ്ക്കുന്നതും വായ്പയെടുക്കുന്നയാളുടെ ബാങ്ക് അക്കൗണ്ടുകളും വായ്പ സ്ഥാപനവും തമ്മിൽ നേരിട്ട് മാത്രമേ നടത്താവൂ. എൽഎസ്പിയുടെയോ ഏതെങ്കിലും മൂന്നാം കക്ഷിയുടെയോ പൂൾ അക്കൗണ്ട് മുഖേന പാടില്ല.

    വായ്പ കരാർ നടപ്പിലാക്കുന്നതിന് മുമ്പ് തന്നെ ഒരു സ്റ്റാൻഡേർഡ് കീ ഫാക്ട് സ്റ്റേറ്റ്മെന്റ് (KFS) വായ്പ എടുക്കുന്നയാൾക്ക് നൽകണം. ഡിജിറ്റൽ വായ്പയുമായി ബന്ധപ്പെട്ട എല്ലാ ചെലവുകളുടെയും വാർഷിക ശതമാന നിരക്ക് (APR) വായ്പയെടുക്കുന്നവർക്ക് വെളിപ്പെടുത്തേണ്ടതുണ്ട്, അതിനാൽ എപിആറും കെഎഫ്സിൽ ഉൾപ്പെടുത്തിയിരിക്കണം. മുതലും ആനുപാതികമായ എപിആറും അടച്ച് വായ്പയെടുക്കുന്നവർക്ക് പിഴ കൂടാതെ ഡിജിറ്റൽ വായ്പയിൽ നിന്ന് പുറത്തുകടക്കാൻ കഴിയുന്ന ഒരു കൂളിംഗ്-ഓഫ് / ലുക്ക്-അപ്പ് കാലയളവ് വായ്പ കരാറിന്റെ ഭാഗമായി നൽകണം.

    ഡിജിറ്റൽ വായ്പയുമായി ബന്ധപ്പെട്ട പരാതികൾ കൈകാര്യം ചെയ്യാൻ എൽഎസ്പികൾക്കും കൂടി അനുയോജ്യമായ നോഡൽ പരാതി പരിഹാര ഓഫീസർ ഉണ്ടെന്ന് അം​ഗീകൃത സ്ഥാപനങ്ങൾ ഉറപ്പാക്കണം. ഇത്തരം പരാതി പരിഹാര ഓഫീസർ ഇവരുടെ ഡിജിറ്റൽ ലെൻഡിങ് ആപ്പുകൾ (ഡിഎൽഎകൾ)ക്കെതിരായ പരാതികളും കൈകാര്യം ചെയ്യും.

    നിലവിലെ ആർബിഐ മാർഗ്ഗനിർദ്ദേശങ്ങൾ അനുസരിച്ച്, വായ്പയെടുക്കുന്നയാൾ നൽകിയ ഏതെങ്കിലും പരാതി നിശ്ചിത കാലയളവിനുള്ളിൽ (നിലവിൽ 30 ദിവസങ്ങൾ) ആർഇ (RE) വഴി പരിഹരിച്ചില്ലെങ്കിൽ, റിസർവ് ബാങ്ക് - ഇന്റഗ്രേറ്റഡ് ഓംബുഡ്സ്മാൻ സ്കീമിന് കീഴിൽ പരാതി നൽകാം. ആവശ്യമുള്ള വിവരങ്ങൾ മാത്രമs ഡി‌എൽ‌എകൾ ശേഖരിക്കാവൂ എന്നാണ് നിർദ്ദേശം, കൃത്യമായ പരിശോധനകൾ ഉണ്ടായിരിക്കണം മാത്രമല്ല വായ്പ എടുക്കുന്നവരുടെ മുൻകൂർ സമ്മതത്തോടെ മാത്രമേ വിവരങ്ങൾ ശേഖരിക്കാവൂ.

    എന്തുകൊണ്ടാണ് പുതിയ വ്യവസ്ഥകൾ അവതരിപ്പിച്ചത്?

    ഡിജിറ്റൽ വായ്പകൾ കുതിച്ചുയരാൻ തുടങ്ങിയതോടെ ഇടപാടുകളുടെ സുതാര്യത സംബന്ധിച്ചും ഉപഭോക്താക്കളുടെ സുരക്ഷ സംബന്ധിച്ചും ആശങ്കകൾ വർധിച്ച സാഹചര്യത്തിലാണ് പുതിയ വ്യവസ്ഥകൾ ആർബിഐ അവതരിപ്പിച്ചത്. മാത്രമല്ല നിയമവിരുദ്ധമായ ഡിജിറ്റൽ വായ്പാ പ്രവർത്തനങ്ങൾ തടയാനും ഇത് ലക്ഷ്യമിടുന്നുണ്ട്. ആർബിഐ ഗവർണർ ശക്തികാന്ത ദാസ് ഇത്തരം നിയന്ത്രണങ്ങൾ കൊണ്ടുവരുന്നതിനെക്കുറിച്ച് നേരത്തെ സൂചിപ്പിച്ചിരുന്നു.

    2021 ജനുവരിയിൽ ആണ് ഡിജിറ്റൽ വായ്പാ ആപ്പുകളുമായി ബന്ധപ്പെട്ടച പ്രശ്‌നങ്ങൾ പഠിക്കുന്നതിനും ആവശ്യമായ മാർ​ഗനിർദ്ദേശങ്ങൾ നൽകുന്നതിനുമായി ആർബിഐ ഒരു വർക്കിംഗ് ഗ്രൂപ്പ് രൂപീകരിച്ചത്. 2021 നവംബറോടെ ഡിജിറ്റൽ വായ്പാ മേഖലയിൽ നടപ്പിലാക്കേണ്ട കർശന വ്യവസ്ഥകൾ സമിതി നിർദ്ദേശിച്ചു. ആർബിഐ പുതിയ വ്യവസ്ഥകൾ അവതരിപ്പിച്ചതിനെ ഡിജിറ്റൽ വായ്പ രം​ഗത്തുള്ള വിവിധ സ്ഥാപനങ്ങൾ സ്വാ​ഗതം ചെയ്തു. മുഴുവൻ ഡിജിറ്റൽ വായ്പാ മേഖലയിലും നീതിയും സുതാര്യതയും ഉറപ്പാക്കുന്നതിന് ഈ നീക്കം സഹായിക്കുമെന്ന പ്രതീക്ഷയാണ് ഇവർ പങ്കു വെയ്ക്കുന്നത്.
    Published by:user_57
    First published: