ജിയോയിലെ 43,574 കോടി ഫേസ്ബുക്ക് നിക്ഷേപം; അഭിനന്ദനവുമായി ബ്രോഡ് ബാൻഡ് ഇന്ത്യ ഫോറം

ന്യൂഡൽഹ: കൊറോണ വ്യാപന പ്രതിസന്ധിയ്ക്കിടയിലും റിലയൻസ് ജിയോയിൽ ഫേസ് ബുക്ക് 43,574 കോടി രൂപ(5.7 ബില്യണ്‍ ഡോളര്‍)നിക്ഷേപിക്കുന്നതിനെ അഭിനന്ദിച്ച് ബ്രോഡ് ബാൻഡ് ഇന്ത്യ ഫോറം (ബി.ഐ.എഫ്).  ജിയോ- ഫേസ്ബുക്ക് പങ്കാളിത്തം രാജ്യത്തെ സൂഷ്മ, ചെറുകിട, ഇടത്തരം സംരംഭകർക്കും കർഷകർക്കും ഗുണകരമാകുമെന്നാണ് ബി.ഐ.എഫ് വിലയിരുത്തുന്നത്.

ഇ-കൊമേഴ്‌സ് പ്ലാറ്റ്‌ഫോമായ ജിയോമാർട്ടും വാട്‌സ്ആപ്പും തമ്മിൽ ഒപ്പുവച്ച കരാർ ഉപഭോക്താക്കളും പ്രാദേശിക സംരംഭകർക്കും വൻ അവസരമാണ് തുറന്നിടുന്നത്. ഇത് രാജ്യത്തെ വളരുന്ന ഡിജിറ്റൽ സമ്പദ്‌വ്യവസ്ഥയ്ക്കും ഏറെ ഗുണകരമാകുമെന്നാണ് പ്രതീക്ഷിക്കുന്നത്. കോവിഡ് 19 മൂലമുണ്ടായിരിക്കുന്ന പ്രത്യേക സാഹചര്യത്തെ മറികടക്കാനും ചെറുകിട ബിസിനസുകാരെ പ്രതിസന്ധിയിൽ നിന്നും കരകയറ്റാനും ഈ പങ്കാളിത്തത്തിലൂടെ സാധിക്കുമെന്നും ബി.ഐ.എഫ് വിലയിരുത്തുന്നു.

അതേസമയം നെറ്റ് ന്യൂട്രാലിറ്റിയും ഡാറ്റാ സംരക്ഷണ മാനദണ്ഡങ്ങളും ലംഘിക്കപ്പെടുമെന്നും ഉപഭോക്തൃ താൽപ്പര്യത്തിന് ഹാനികരമാകുമെന്നും ചിലർ ആശങ്കപ്പെടുന്നു. എന്നാൽ ഇത് തെറ്റാണെന്നും വസ്തുതകളെ അടിസ്ഥാനമാക്കിയുള്ളതല്ലെന്നും ബി.ഐ.എഫ് പ്രസിഡന്റ് ടി.വി രാമചന്ദ്രൻ വ്യക്തമാക്കി. കൊറോണ വ്യാപന പശ്ചാത്തലത്തിലുള്ള ഈ നിക്ഷേപ തീരുമാനം ആഗോള നിക്ഷേപ സമൂഹത്തിൽ, പ്രത്യേകിച്ച് ഡിജിറ്റൽ രംഗത്ത് ഇന്ത്യയുടെ പ്രസക്തി വർധിപ്പിക്കുന്നതാണെന്നും അദ്ദേഹം പറഞ്ഞു.
BEST PERFORMING STORIES:Reliance Jio-Facebook Mega deal | റിലയൻസ് ജിയോയും ഫേസ്ബുക്കും തമ്മിൽ 43574 കോടി രൂപയുടെ കരാർ [NEWS]ഫേസ്ബുക്ക് ജിയോയുടെ 43574 കോടി രൂപയുടെ ഓഹരികൾ വാങ്ങിയത് എന്തുകൊണ്ട്? [NEWS]ഫേസ്ബുക്ക്-ജിയോ കരാർ ഓഹരിവിപണിയിലുണ്ടാക്കുന്ന മാറ്റങ്ങൾ എന്തൊക്കെ? [NEWS]
ജിയോ- ഫേസ്ബുക്ക് കൂട്ടുകെട്ട് രാജ്യത്തെ ബ്രോഡ്‌ബാൻഡ് സംവിധാനത്തെ കൂടുതൽ ശക്തിപ്പെടുത്തുന്നതും സാമൂഹ്യ-സാമ്പത്തിക വികസനത്തിന് പ്രചോദനം നൽകുന്നതാണെന്നും ബി.ഐ.എഫ് പ്രസ്താവനയിൽ ചൂണ്ടിക്കാട്ടി.

രാജ്യത്തെ ടെക്നോളജി പ്രൊവൈഡർമാർ, ടെലികോം ഓപ്പറേറ്റർമാർ, ഇൻറർനെറ്റ് സേവന ദാതാക്കൾ, മൂല്യവർദ്ധിത സേവന ദാതാക്കൾ, സാറ്റലൈറ്റ് ഓപ്പറേറ്റർമാർ, സേവന ദാതാക്കൾ സ്റ്റാർട്ടപ്പുകൾ, പ്രൊഫഷണലുകൾ തുടങ്ങിയവരുടെ പങ്കാളിത്തത്തോടെ 2015 ഒക്ടോബറിലാണ് ബി.ഐ.എഫ് രൂപീകരിച്ചത്.