'ഇനി പറ ധോണി വിരമിക്കണോ വേണ്ടയോയെന്ന്' ലങ്കയുടെ ആദ്യ നാല് വിക്കറ്റിനും പിന്നിലും ധോണി ഇഫക്ട്

ലീഡ്‌സ്: ഇന്ത്യന്‍ മുന്‍ നായകനും വിക്കറ്റ് കീപ്പറുമായ എംഎസ് ധോണിയുടെ ബാറ്റിങ്ങിലെ മെല്ലെപ്പോക്കും കീപ്പിങ്ങിലെ ചെറിയ പിഴവുകളുമായിരുന്നു ഇത്രയും നാള്‍ ക്രിക്കറ്റ് ലോകത്തെ ചര്‍ച്ചയെങ്കില്‍ ഇന്നത്തെ മത്സരത്തിലെ പ്രകടനത്തിലൂടെ വിമര്‍ശകര്‍ക്ക് മറുപടി നല്‍കിയിരിക്കുകയാണ് ധോണി. വിക്കറ്റിനു പിന്നില്‍ മികച്ച പ്രകടനമായിരുന്നു താരം പുറത്തെടുത്തത്.

ലങ്കന്‍ ഇന്നിങ്‌സില്‍ ആദ്യംവീണ നാലു വിക്കറ്റിനു പിന്നിലും ധോണിയുടെ കൈകളായിരുന്നു. ഇതില്‍ മൂന്നുവിക്കറ്റ് കീപ്പര്‍ ക്യാച്ചിന്റെ രൂപത്തിലായിരുന്നെങ്കില്‍ നാലാമത്തേത് തകര്‍പ്പന്‍ സ്റ്റംപിങ്ങായിരുന്നു. ജഡേജയുടെ ആദ്യ ഓവറില്‍ കുശാല്‍ മെന്‍ഡിസിനെയാണ് ധോണി സ്റ്റംപിങ്ങിലൂടെ പുറത്താക്കിയത്.

Also Read: 'ഒടുവില്‍ കുറ്റസമ്മതം നടത്തി അല്ലേ' ജഡേജയെ പുകഴ്ത്തി മഞ്ജരേക്കര്‍; മറുപടിയുമായി ആരാധകര്‍

ജഡേജയെറിഞ്ഞ നാലം പന്ത് ക്രീസില്‍ നിന്നിറങ്ങി മെന്‍ഡിസ് കളിക്കാന്‍ ശ്രമിച്ചെങ്കിലും താരത്തിന് പിഴക്കുകയായിരുന്നു. പന്ത് മിസ്സായത് താരം മനസിലാക്കുമ്പോഴേക്കും മിന്നല്‍ സ്റ്റംപിങ്ങിലൂടെ താരം വിക്കറ്റ് നേടുകയും ചെയ്തിരുന്നു. ബൂമ്രയുടെ പന്തുകളില്‍ കരുണരത്‌നെ, പെരേര എന്നിവരെയും ഹര്‍ദ്ദിക്കിന്റെ പന്തില്‍ അവിഷ്‌ക ഫെര്‍ണാണ്ടോയെയുമാണ് ധോണി പിടികൂടിയത്.