• HOME
  • »
  • NEWS
  • »
  • sports
  • »
  • പ്രായത്തിന്റെ ഹർഡിൽ ചാടിക്കടന്ന് മുൻ MLA എം ജെ ജേക്കബ്; ലോക മാസ്റ്റേഴ്സ് അത്ലറ്റിക്സ് ചാമ്പ്യൻഷിപ്പിൽ 82കാരന് മെഡൽ നേട്ടം

പ്രായത്തിന്റെ ഹർഡിൽ ചാടിക്കടന്ന് മുൻ MLA എം ജെ ജേക്കബ്; ലോക മാസ്റ്റേഴ്സ് അത്ലറ്റിക്സ് ചാമ്പ്യൻഷിപ്പിൽ 82കാരന് മെഡൽ നേട്ടം

ഞായറാഴ്ച ഫിൻലാൻഡിൽ അവസാനിച്ച ലോക മാസ്റ്റേഴ്സ് അത്ലറ്റിക്സ് ചാമ്പ്യൻഷിപ്പിലാണ് മുൻ പിറവം എംഎൽഎയും സിപിഎം മുതിർന്ന നേതാവുമായ എം ജെ ജേക്കബ് ഇന്ത്യക്കായി മെഡലുകൾ നേടിയത്.

എം ജെ ജേക്കബ് (Photo- Twitter)

എം ജെ ജേക്കബ് (Photo- Twitter)

  • Last Updated :
  • Share this:
    കൊച്ചി: പ്രായം വെറും നമ്പർമാത്രമാണെന്ന് തെളിയിച്ച് മുൻ പിറവം എംഎൽഎയും മുതിർന്ന സിപിഎം നേതാവുമായ എം ജെ ജേക്കബ് (MJ Jacob) . 82ാം വയസിൽ വിശ്രമജീവിതം നയിക്കേണ്ട സമയത്ത് രാജ്യത്തിനായി ഇരട്ട മെഡൽ നേട്ടം സ്വന്തമാക്കിയിരിക്കുകയാണ് അദ്ദേഹം. ഞായറാഴ്ച ഫിൻലാൻഡിൽ അവസാനിച്ച ലോക മാസ്റ്റേഴ്സ് അത്ലറ്റിക്സ് ചാമ്പ്യൻഷിപ്പിലാണ് എം ജെ ജേക്കബ്ബിന്റെ മെഡൽ നേട്ടം. 80 മീറ്റർ, 200 മീറ്റർ ഹർഡിൽസില്‍ വെങ്കല മെഡലുകളാണ് അദ്ദേഹം സ്വന്തമാക്കിയത്. എന്നാൽ അടുത്ത വർഷം തന്റെ പ്രകടനം മെച്ചപ്പെടുത്തി സ്വർണമെഡൽ നേടാനുള്ള കഠിന പരിശീലനമാണ് ഇനി അദ്ദേഹം ലക്ഷ്യമിടുന്നത്.

    ''ആദ്യം രാഷ്ട്രീയക്കാരന്റെ കുപ്പായത്തിലും ഇപ്പോള്‍ കായികതാരമായും രാജ്യത്തെ സേവിക്കാനായി. ഞാൻ ത്രില്ലിലാണ്, ഭാവിയിൽ കൂടുതൽ കായികമേളകളില്‍ പങ്കെടുക്കും''- ഫിൻലാൻഡിലെ റാറ്റിനം സ്റ്റേഡിയത്തിൽ നിന്ന് എം ജെ ജേക്കബ് ദ ന്യൂ ഇന്ത്യൻ എക്സപ്രസിനോട് പ്രതികരിച്ചു. ചാമ്പ്യൻഷിപ്പിൽ 80 പ്ലസ് വിഭാഗത്തിൽ രണ്ട് ഹർഡിൽസ് ഇനത്തിലാണ് അദ്ദേഹം പങ്കെടുത്തത്. ''കുട്ടിക്കാലം മുതലേ സ്പോർട്സിൽ താൽപര്യമുണ്ടായിരുന്നു. 2006 മുതലാണ് രാജ്യാന്തര കായിക മേളകളിൽ പങ്കെടുക്കാനും മെഡലുകൾ നേടാനും തുടങ്ങിയത്''- ജേക്കബ് പറഞ്ഞു.

    ആരോഗ്യകരമായ ജീവിതശൈലിയാണ് നേട്ടത്തിന് കാരണമെന്ന് ജേക്കബ് പറയുന്നു.

    2006 മുതൽ 2011 വരെ സംസ്ഥാന നിയമസഭയിൽ പിറവത്തെ പ്രതിനിധീകരിച്ച ജേക്കബ് ഡബ്ല്യുഎംഎസിയിൽ രണ്ട് വിഭാഗങ്ങളിലും വെള്ളി മെഡൽ നേടുന്നതിന് തൊട്ടടുത്തെത്തിയെന്ന് പറയുന്നു. "തോൽപ്പിക്കാൻ പ്രയാസമുള്ള യൂറോപ്യന്മാരുമായി മത്സരിക്കാൻ എന്റെ പരിശീലനത്തിൽ കുറച്ചുകൂടി മെച്ചപ്പെടുത്തൽ ആവശ്യമാണ്," അടുത്ത വർഷം ഇന്ത്യക്ക് വേണ്ടി സ്വർണ്ണം നേടുമെന്ന് ഉറപ്പിച്ച ജേക്കബ് പറഞ്ഞു.

    Also Read- 'ദിലീപിനെതിരെ പൊലീസ് വ്യാജ തെളിവുകളുണ്ടാക്കി, പൾസർ സുനിക്കൊപ്പമുള്ള ചിത്രം ഫോട്ടോഷോപ്പ്': മുൻ ഡിജിപി ആർ. ശ്രീലേഖ

    1981-82, 1998-99 വർഷങ്ങളിൽ യഥാക്രമം തിരുമാറാടി പഞ്ചായത്ത് പ്രസിഡന്റായും എറണാകുളം ജില്ലാ പഞ്ചായത്ത് അംഗമായും പ്രവർത്തിച്ച ജേക്കബ് ജൂലൈ 13ന് ഫിൻലൻഡിൽ നടക്കുന്ന ചാമ്പ്യൻഷിപ്പിന്റെ സമാപന ചടങ്ങിൽ പങ്കെടുത്ത ശേഷം ഇന്ത്യയിലേക്ക് മടങ്ങും. വർഷങ്ങളായി താൻ ശ്രദ്ധയോടെ പിന്തുടരുന്ന ആരോഗ്യകരമായ ജീവിതശൈലിയാണ് നേട്ടത്തിന് കാരണമെന്ന് ജേക്കബ് പറഞ്ഞു.

    ''പുലർച്ചെ 4 മണിക്ക് എഴുന്നേറ്റു നടക്കാനും ഓടാനും പോകും, ​​പലപ്പോഴും യോഗ ചെയ്യാറുണ്ട്, ശരീരത്തിന് കരുത്ത് പകരുന്ന വ്യായാമങ്ങൾ ചെയ്യാറുണ്ട്. തിരുവനന്തപുരത്തെ എംഎൽഎ ഹോസ്റ്റലിൽ താമസിക്കുമ്പോൾ എല്ലാ ദിവസവും യൂണിവേഴ്‌സിറ്റി സ്‌റ്റേഡിയത്തിൽ പ്രാക്‌ടീസ് ചെയ്യും. എന്റെ ശരീരത്തിന് ആരോഗ്യകരവും ആവശ്യമുള്ളതുമായ ഭക്ഷണം കഴിക്കും'' അദ്ദേഹം പറഞ്ഞു.

    "പഞ്ചായത്ത് പ്രസിഡന്റായും പിന്നീട് എംഎൽഎയായും തെരഞ്ഞെടുക്കപ്പെട്ട ശേഷവും സംസ്ഥാന, ദേശീയ, അന്തർദേശീയ തലങ്ങളിൽ നടന്ന സ്പോർട്സ് മീറ്റുകളിൽ ഞാൻ പങ്കെടുത്തിട്ടുണ്ട്. അന്താരാഷ്ട്ര മീറ്റുകൾക്ക് വ്യക്തിഗത വിഭാഗങ്ങളിൽ സെലക്ഷൻ കിട്ടുക പ്രയാസമാണ്. ഇത്തരമൊരു ചാമ്പ്യൻഷിപ്പ് ഇതാദ്യമാണ്." അദ്ദേഹം പറഞ്ഞു.

    Also Read- 'നടിയെ ആക്രമിച്ച കേസിൽ നടൻ ദിലീപ് നിരപരാധിയെന്ന് ' മുൻ ജയിൽ DGP

    2006 ലെ കേരള നിയമസഭാ തെരഞ്ഞെടുപ്പിൽ ജേക്കബ് കേരളാ കോൺഗ്രസ് നേതാവ് ടി എം ജേക്കബിനെ പരാജയപ്പെടുത്തി. എന്നാൽ 2011-ൽ അതേ എതിരാളിയോട് 157 വോട്ടിന്റെ നേരിയ വ്യത്യാസത്തിൽ അദ്ദേഹം പരാജയപ്പെട്ടു.

    ടി എം ജേക്കബിന്റെ മരണശേഷം മകൻ അനൂപ് ജേക്കബിനെതിരെ മത്സരിച്ച് പരാജയപ്പെട്ടിരുന്നു. 2016 ലെ തെരഞ്ഞെടുപ്പിൽ വീണ്ടും പരാജയപ്പെട്ടതിന് ശേഷം, എംജെ ജേക്കബ് തന്റെ ശാരീരികക്ഷമതയിൽ കൂടുതൽ ശ്രദ്ധ കേന്ദ്രീകരിക്കുകയും രാഷ്ട്രീയ പ്രവർത്തനം ഒരുവശത്ത് തുടരുമ്പോഴും അത്ലറ്റിക്സ് മത്സരങ്ങളിൽ പങ്കെടുക്കാൻ തുടങ്ങുകയുമായിരുന്നു.
    Published by:Rajesh V
    First published: