ഈ ലോകകപ്പിലെ ഇന്ത്യക്കാരന്റെ ആദ്യ സെഞ്ച്വറി രോഹിത്തിന്റെ പേരില്‍; ദക്ഷിണാഫ്രിക്കയ്‌ക്കെതിരെ ഇന്ത്യ ജയത്തിലേക്ക്

സതാംപ്ടണ്‍: ഇംഗ്ലണ്ട് ലോകകപ്പിലെ ഇന്ത്യക്കാരന്റെ ആദ്യ സെഞ്ച്വറി തന്റെ പേരില്‍ കുറിച്ച് ഓപ്പണര്‍ രോഹിത് ശര്‍മ. 128 പന്തില്‍ 10 ഫോറിന്റെയും 2 സിക്‌സിന്റെയും അകമ്പടിയോടെയാണ് രോഹിത് സെഞ്ച്വറി പൂര്‍ത്തിയാക്കിയത്. മത്സരത്തില്‍ ഇന്ത്യ ജയത്തിലേക്ക് അടുക്കുകയാണ്. 41.1 ഓവറില്‍ 178 ന് 3 എന്ന നിലയിലാണ് ഇന്ത്യ.

ഏഴു വിക്കറ്റ് കയ്യിലിരിക്കെ 53 പന്തുകളില്‍ 50 റണ്‍സാണ് ഇന്ത്യക്ക് വേണ്ടത്. ഏകദിന ക്രിക്കറ്റിലെ ഇരുപത്തിമൂന്നാമത്തെയും ലോകകപ്പിലെ രണ്ടാമത്തെയും സെഞ്ച്വറിയാണ് രോഹിത്ത് ഇന്ന് നേടിയത്. ദക്ഷിണാഫ്രിക്കയ്‌ക്കെതിരെ താരത്തിന്റെ മൂന്നാം സെഞ്ച്വറിയാണിത്.

Also Read: ബംഗ്ലാദേശിനെതിരെ ന്യൂസിലന്‍ഡിന് 245 റണ്‍സ് വിജയലക്ഷ്യം

നേരത്തെ ടോസ് നേടി ബാറ്റിങ് തെരഞ്ഞെടുത്ത ദക്ഷിണാഫ്രിക്കയ്ക്ക് ഇന്ത്യന്‍ ബൗളര്‍മാരുടെ കൃത്യതയാര്‍ന്ന പ്രകടനത്തിന് മുന്നില്‍ 9 വിക്കറ്റ് നഷ്ടത്തില്‍ 227 റണ്‍സെടക്കാനെ കഴിഞ്ഞുള്ളു. നാല് വിക്കറ്റ് വീഴ്ത്തിയ യൂസവേന്ദ്ര ചാഹലാണ് പ്രോട്ടീസിനെ തകര്‍ത്തത്.