ISL 2020-21 | അടി തിരിച്ചടി; നോർത്ത് ഈസ്റ്റ്-ഒഡീഷ മത്സരം സമനിലയിൽ

പനാജി: ഇന്ത്യൻ സൂപ്പർ ലീഗിൽ ആദ്യ ജയത്തിനായി ഒഡീഷ എഫ്.സി ഇനിയും കാത്തിരിക്കണം. ഇതുവരെ ജയിച്ചിട്ടില്ലാത്ത ഒഡിഷ എഫ്​.സിക്ക്​ നോര്‍ത്ത്​ ഈസ്റ്റിനു മുന്നിലും സമനില. അത്യന്തം ആവേശകരമായ മത്സരതതിൽ ഇരു ടീമുകളും രണ്ടു ഗോൾ വീതമടിച്ച് സമനിലയിൽ പിരിയുകയായിരുന്നു.

ആദ്യം ഗോളടിച്ചു തുടങ്ങിയെങ്കിലും ഒഡിഷക്ക്​ പിന്നീട്​ കളി കൈവിടുകയായിരുന്നു. 22ാം മിനിറ്റില്‍ ഡീഗോ മൗറീഷ്യോയാണ്​ അക്കൌണ്ട്​ തുറന്ന്​ ഒഡിഷയെ മുന്നിലെത്തിയത്​. എന്നാല്‍, ആദ്യ പകുതിയുടെ ഇഞ്ചുറി സമയം നോര്‍ത്ത്​ ഈസ്റ്റ്​ തിരിച്ചടിച്ചു. 45ാം മിനിറ്റില്‍ ക്യാപ്​റ്റന്‍ ബെഞ്ചമിന്‍ ലാബോട്ടാണ്​ തകര്‍പ്പന്‍ ഹെഡറിലൂടെ ഗോള്‍ നേടിയത്​.

രണ്ടാം പകുതിയില്‍ തിരിച്ചടി മാത്രം ലക്ഷ്യമിട്ട് ഇറങ്ങിയ നോര്‍ത്ത്​ ഈസ്റ്റ് കെസി അപ്പിയയുടെ പെനാല്‍റ്റിയില്‍ മുന്നിലെത്തി. താരത്തെ, എതിര്‍ ഗോളി ബോക്​സില്‍ വീഴ്​ത്തയതിനാണ്​ പെനാല്‍റ്റി ലഭിച്ചത്​. അനായാസം ഘാന താരം ഗോളാക്കുകയും ചെയ്​തു.

എന്നാല്‍, രണ്ടു മിനിറ്റിനകം ഒഡിഷ തിരിച്ചടിച്ചു. കോലെ അലക്​സാണ്ടറിന്‍റെ ബോക്​സില്‍ നിന്നുള്ള ബുള്ളറ്റ്​ ഷോട്ടാണ്​ നോര്‍ത്ത്​ ഈസ്റ്റിന്‍റെ ഗോൾ വലയം ഭേദിച്ചത്​. ചാട്ടുളി പോലെ വളഞ്ഞു വന്ന പന്തിനു മുന്നില്‍ ​നോര്‍ത്ത്​ ഈസ്റ്റ്​ ഗോളി ഗുര്‍മീത്​ സിങ്ങ് വെറുമൊരു കാഴ്ചക്കാരൻ മാത്രമായിരുന്നു.