മലേഷ്യ മാസ്റ്റേഴ്സ് ബാഡ്മിന്റണ്‍: സെമിയില്‍ കാലിടറി; സൈന പുറത്ത്

ക്വലാലംപുര്‍: മലേഷ്യ മാസ്റ്റേഴ്സ് ബാഡ്മിന്റണ്‍ സെമിഫൈനലില്‍ സൈന നേവാളിനു പരാജയം. സ്പാനിഷ് താരം കരോളിന മാരിനോട് നേരിട്ടുള്ള ഗെയിമുകള്‍ക്കായിരുന്നു സൈനയുടെ തോല്‍വി. ഇതോടെ ഫൈനല്‍ കാണാതെ താരം പുറത്തായി.

ആദ്യ ഗെയിമില്‍ വ്യക്തമായ ലീഡ് എടുത്ത ശേഷമായിരുന്നു താരം മത്സരം കൈവിട്ടത്. കരോളിനയുടെ മികച്ച പ്രകടനത്തിനും മാസ്റ്റേഴ്‌സ് ബാഡ്മിന്റണ്‍ വേദിയായി. 5- 2 ന്റെ ലീഡ് നേടിയ താരം പിന്നീട് കരോളിനയുടെ തിരിച്ചുവരവോടെ 11- 9 ലേക്ക് പിന്തള്ളപ്പെടുകയായിരുന്നു.

Also Read: 'ഇത് 100 വോള്‍ട്ട് ജയം'; AFC ASIAN CUP, പിന്തുണക്കാന്‍ ഗ്യലറിയില്‍ ഒരാള്‍ പോലുമില്ല; എന്നിട്ടും ഖത്തര്‍ സൗദിയെ മുട്ടുകുത്തിച്ചു

ആദ്യ ഗെയിം 21- 16 നാണ് കരോളിന സ്വന്തമാക്കിയത്. തുടക്കത്തിലെ ലീഡ് നേട്ടമൊഴിച്ചാല്‍ പിന്നീടൊരിക്കലും സൈനയ്ക്ക് മത്സരത്തിലേക്ക് തിരിച്ചുവരാന്‍ കഴിഞ്ഞിരുന്നില്ല. രണ്ടാം ഗെയിമിലും വ്യക്തമായ ലീഡായിരുന്നു കരോളിന്‍ നേടിയത്. 7- 3 ന്റെ ലീഡ് നേടിയ മാരിന്‍ 11-6 ലേക്ക് ലീഡുയര്‍ത്തുകയും ഗെയിം 21- 13 ന് ഗെയിമും സ്വന്തമാക്കുകയും ചെയ്തു.

ഇതോടെ ടൂര്‍ണ്ണമെന്റിലെ ഇന്ത്യന്‍ പ്രതീക്ഷകളും അവസാനിച്ചു. മുന്‍ ലോകചാമ്പ്യനായ ജപ്പാന്റെ നൊസോമി ഒക്കുഹാരയെ തോല്‍പ്പിച്ചാണ് സൈന സെമി ഫൈനലിനെത്തിയത്.