നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • world
    • »
    • ബെലാറസിൽ വിമാനം താഴെയിറക്കി മാധ്യമപ്രവ‍ർത്തകനെ അറസ്റ്റ് ചെയ്ത സംഭവം; അപലപിച്ച് അമേരിക്കയും യൂറോപ്പും

    ബെലാറസിൽ വിമാനം താഴെയിറക്കി മാധ്യമപ്രവ‍ർത്തകനെ അറസ്റ്റ് ചെയ്ത സംഭവം; അപലപിച്ച് അമേരിക്കയും യൂറോപ്പും

    പോർവിമാനം അയച്ച് ബലമായി യാത്രാവിമാനത്തെ ബെലാറസിൽ ഇറക്കിയശേഷമായിരുന്നു റോമൻ പ്രോട്ടസെവിച്ച് എന്ന മാധ്യമപ്രവർത്തകന്റെ അറസ്റ്റ്.

    ഫയൽ ചിത്രം

    ഫയൽ ചിത്രം

    • Share this:
      ബോംബ് ഭീഷണിയുണ്ടെന്ന വ്യാജേന ബെലാറസ് ഭരണകൂടം ഞായറാഴ്ച്ച റയാനെയ‍ർ വിമാനം ബലമായി താഴെ ഇറക്കി മാധ്യമപ്രവ‍ർത്തകനെ അറസ്റ്റ് ചെയ്ത് സംഭവത്തിൽ അമേരിക്കയും യൂറോപ്പും അപലപിച്ചു. പോർവിമാനം അയച്ച് ബലമായി യാത്രാവിമാനത്തെ ബെലാറസിൽ ഇറക്കിയശേഷമായിരുന്നു റോമൻ പ്രോട്ടസെവിച്ച് എന്ന മാധ്യമപ്രവർത്തകന്റെ അറസ്റ്റ്.

      ഏഥൻസിൽ നിന്ന് ലിത്വാനിയയിലേക്ക് പറന്ന യാത്രാ വിമാനമാണ് ബലമായി ബെലാറസിന്റെ തലസ്ഥാനമായ മിൻസ്കിലേക്ക് തിരിച്ചുവിട്ടത്. ബെലാറസിന്റെ ഈ നടപടിയെ ചില യൂറോപ്യൻ യൂണിയൻ നേതാക്കൾ തട്ടിക്കൊണ്ടുപോകൽ എന്നാണ് വിശേഷിപ്പിച്ചത്. സോവിയറ്റ് കാലഘട്ടത്തിലെ മിഗ് -29 യുദ്ധവിമാനത്തിന്റെ അകമ്പടിയോടെയാണ് യാത്രവിമാനം താഴെ ഇറക്കിയത്.

      വിമാനം താഴെ ഇറങ്ങിയ ഉടൻ അധികൃതർ മാധ്യമപ്രവർത്തകനായ റോമൻ പ്രോട്ടസെവിച്ചിനെ കസ്റ്റഡിയിലെടുത്തു. ഫ്ലൈറ്റ് മിൻസ്കിലേക്കാണ് പോകുന്നതെന്ന് മനസിലായപ്പോൾ പ്രോട്ടസെവിച്ച് വിറയ്ക്കുകയായിരുന്നുവെന്ന് വിമാനത്തിലെ മറ്റൊരു യാത്രക്കാരൻ ലിത്വാനിയയിലെ ഡെൽഫി വാർത്താ ഏജൻസിയോട് വ്യക്തമാക്കി. “എനിക്ക് വധശിക്ഷ ലഭിക്കും” എന്ന് പ്രോട്ടസെവിച്ച് പറഞ്ഞതായും റിപ്പോ‍ർട്ടിൽ പറയുന്നു. എന്നാൽ റോയിട്ടേഴ്‌സ് ഈ റിപ്പോർട്ട് സ്ഥിരീകരിച്ചിട്ടില്ല.

      ആരാണ് റോമൻ പ്രോട്ടസെവിച്ച്?
      26 കാരനായ മാധ്യമ പ്രവർത്തകനാണ് റോമൻ പ്രോട്ടസെവിച്ച്. പോളണ്ട് ആസ്ഥാനമായുള്ള ഓൺലൈൻ വാർത്താ സേവനമായ നെക്സ്റ്റയിലാണ് പ്രോട്ടസെവിച്ച് ജോലി ചെയ്തിരുന്നത്. കഴിഞ്ഞ വർഷം ബെലാറസ് പ്രസിഡന്റ് അലക്സാണ്ടർ ലുകാഷെങ്കോയ്‌ക്കെതിരായ ജനകീയ പ്രതിഷേധത്തിന്റെ ദൃശ്യങ്ങൾ ടെലിഗ്രാം മെസഞ്ചർ ആപ്പ് വഴി ഇദ്ദേഹം പ്രക്ഷേപണം ചെയ്തിരുന്നു. വിദേശ മാധ്യമങ്ങൾക്ക് പോലും സാധിക്കാത്ത കാര്യമായിരുന്നു ഇത്. ബെലാമോവ എന്ന മറ്റൊരു ടെലിഗ്രാം ചാനലിലാണ് ഇപ്പോൾ പ്രോട്ടസെവിച്ച് പ്രവ‍ർത്തിക്കുന്നത്. കൂട്ട കലാപങ്ങൾ സംഘടിപ്പിച്ചുവെന്നും സാമൂഹിക വിദ്വേഷം വളർത്തിയെന്നുമെണാണ് പ്രോട്ടസെവിച്ചിന് എതിരെ ആരോപിക്കപ്പെട്ടിരിക്കുന്ന കുറ്റങ്ങൾ.

      പ്രോട്ടസെവിച്ചിന്റെ പ്രതികരണം
      മിൻസ്കിലേക്ക് വിമാനം പെട്ടെന്ന് വഴിതിരിച്ചുവിട്ടതിന് പൈലറ്റോ ജോലിക്കാരോ പൂർണ്ണമായ വിശദീകരണം നൽകിയിരുന്നില്ല. എന്നാൽ പ്രോട്ടസെവിച്ച് തന്റെ സീറ്റിൽ നിന്ന് എഴുന്നേറ്റു നിന്ന് അറിയിപ്പിനോട് പ്രതികരിച്ചതായി വിൽനിയസ് വിമാനത്താവളത്തിലെത്തിയ ശേഷം യാത്രക്കാരിലൊരാൾ റോയിട്ടേഴ്സിനോട് പറഞ്ഞു. പ്രോട്ടസെവിച്ച് വിമാനത്തിൽ വച്ചിരുന്ന ബാഗ് തുറന്ന് ഒരു ലാപ്‌ടോപ്പ് കമ്പ്യൂട്ടറും ഫോണും കൂടെയുണ്ടായിരുന്ന വനിതാ കൂട്ടാളിക്ക് നൽകിയെന്നും ഒരു ലിത്വാനിയൻ യാത്രക്കാരൻ പറഞ്ഞു. എന്നാൽ പ്രൊട്ടസെവിച്ചിനൊപ്പമുണ്ടായിരുന്ന വനിതാ കൂട്ടാളി മിൻസ്കിൽ നിന്ന് വിൽനിയസിലേക്കുള്ള വിമാനത്തിൽ ഉണ്ടായിരുന്നില്ലെന്ന് ലിത്വാനിയൻ പ്രസിഡന്റ് ഗീതാനാസ് നൗസേദ ഞായറാഴ്ച വൈകി വാർത്താ സമ്മേളനത്തിൽ പറഞ്ഞു.

      Also Read എഫ്‌.സി.ഐയിൽ ജോലി വാഗ്ദാനം ചെയ്ത് തട്ടിയെടുത്തത് ഒരു കോടി രൂപ; ബി.ജെ.പി നേതാവ് ഉള്‍പ്പെടെ 3 പേര്‍ക്കെതിരെ കേസ്

      റയാനെയ‍റിന്റെ പ്രതികരണം
      ഫ്ലൈറ്റ്റാഡാർ 24.കോം വെബ്‌സൈറ്റിൽ നിന്നുള്ള വിവരം അനുസരിച്ച് വിമാനം ലിത്വാനിയൻ വ്യോമാതിർത്തിയിലേക്ക് കടക്കുന്നതിന് രണ്ട് മിനിറ്റ് മുമ്പാണ് വഴിതിരിച്ചുവിട്ടത്. ബെലാറസിൽ നിന്ന് ഏഴുമണിക്കൂറിന് ശേഷം വിമാനം പറന്നുയർന്ന് വിൽനിയസിൽ എത്തി. അവിടെ ലിത്വാനിയൻ പ്രധാനമന്ത്രി ഇൻഗ്രിഡ സിമോനൈറ്റ് യാത്രക്കാരെ കാത്തിരിക്കുകയായിരുന്നു. വിമാനത്തിലെ സുരക്ഷാ ഭീഷണിയെക്കുറിച്ച് വിമാനത്തിന്റെ ക്രൂവിനെ ബെലാറസ് അറിയിച്ചതായും അടുത്തുള്ള വിമാനത്താവളമായ മിൻസ്കിലേക്ക് തിരിച്ചുവിടാൻ നിർദ്ദേശം നൽകിയതായും റയാനെയർ പ്രസ്താവനയിൽ പറഞ്ഞു. വിമാനം മിൻസ്കിൽ സുരക്ഷിതമായി ലാൻഡ് ചെയ്തു. തുട‍ർന്ന് പ്രാദേശിക അധികാരികൾ സുരക്ഷാ പരിശോധന നടത്തി. വിമാനം പിന്നീട് വിൽനിയസിലേയ്ക്കുള്ള യാത്ര പുനരാരംഭിച്ചതായി റയാനെയർ വ്യക്തമാക്കി. ആഗോള എയർലൈൻ വ്യവസായ സ്ഥാപനമായ അയാട്ട സംഭവത്തിൽ സമ്പൂർണ്ണ അന്വേഷണം ആവശ്യപ്പെട്ടിട്ടുണ്ട്.

      Also Read എം.ബി രാജേഷ് നിയമസഭാ സ്പീക്കർ; ജലന്തറിൽ ജനിച്ച് പാലക്കാടിന്റെ ശബ്ദമായ സഭാനാഥന് മുഖ്യമന്ത്രിയുടെ അഭിനന്ദനം

      ലോക രാജ്യങ്ങളുടെ പ്രതികരണം
      യൂറോപ്യൻ ഉദ്യോഗസ്ഥർ ബെലാറസിന് മേൽ പുതിയ ഉപരോധം ഏർപ്പെടുത്തുമെന്ന് ഭീഷണിപ്പെടുത്തിയപ്പോൾ, യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കൻ നിർബന്ധിത ലാൻഡിംഗിനെ “ഞെട്ടിക്കുന്ന നടപടിയെന്ന്” വിശേഷിപ്പിച്ചു. പ്രോട്ടസെവിച്ചിനെ ഉടനടി മോചിപ്പിക്കണമെന്നും ബ്ലിങ്കൻ ആവശ്യപ്പെട്ടു. യുഎസ് പൗരന്മാർ ഉൾപ്പെടെയുള്ള യാത്രക്കാരുടെ ജീവൻ അപകടത്തിലാക്കുന്ന തരത്തിലുള്ള നടപടിയെക്കുറിച്ച് “പൂർണ്ണ അന്വേഷണം” നടത്തണമെന്നും ബ്ലിങ്കൻ ആവശ്യപ്പെട്ടു.

      യൂറോപ്യൻ യൂണിയനും നാറ്റോയും ഇക്കാര്യത്തിൽ പ്രതികരിക്കണമെന്ന് യൂറോപ്യൻ യൂണിയൻ അംഗരാജ്യമായ ലിത്വാനിയ ആവശ്യപ്പെട്ടു. പ്രോട്ടസെവിച്ച് ഉടൻ മോചിപ്പിക്കപ്പെടണമെന്നും റയാനെയർ വിമാനത്തെ തട്ടിക്കൊണ്ടു പോയതിന് ബെലാറസ് ഉത്തരവാദികളാണെന്നും യൂറോപ്യൻ യൂണിയന്റെ എക്സിക്യൂട്ടീവ് യൂറോപ്യൻ കമ്മീഷൻ മേധാവി ഉർസുല വോൺ ഡെർ ലെയ്ൻ പറഞ്ഞു. സംഭവം ഗുരുതരവും അപകടകരവുമാണെന്നും അന്താരാഷ്ട്ര അന്വേഷണം ആവശ്യമാണെന്നും നാറ്റോ സെക്രട്ടറി ജനറൽ ജെൻസ് സ്റ്റോൾട്ടൻബർഗ് ട്വീറ്റിൽ പറഞ്ഞു.

      “യൂറോപ്യൻ യൂണിയന്റെ നിഷ്‌ക്രിയത്വം അല്ലെങ്കിൽ വിവേചനം ബെലാറസ് ബലഹീനതയായി കണക്കാക്കും” എന്ന് റയാനെയറിന്റെ ആസ്ഥാനമായ അയർലണ്ടിലെ വിദേശകാര്യ മന്ത്രി സൈമൺ കോവ്‌നി ട്വിറ്ററിൽ പറഞ്ഞു. പടിഞ്ഞാറൻ രാജ്യങ്ങളിൽ നിന്ന് ശക്തമായ പ്രതികരണം ആവശ്യപ്പെട്ട് യുഎസ് അസിസ്റ്റന്റ് സ്റ്റേറ്റ് സെക്രട്ടറി ഫിലിപ്പ് റേക്കറുമായി ചർച്ച നടത്തിയതായി ലിത്വാനിയയുടെ വിദേശകാര്യ മന്ത്രി ഗബ്രിയേലിയസ് ലാൻഡ്‌സ്‌ബെർഗിസ് പറഞ്ഞു.

      ഓഗസ്റ്റിലെ തിരഞ്ഞെടുപ്പിനെത്തുടർന്ന് അമേരിക്ക, യൂറോപ്യൻ യൂണിയൻ, ബ്രിട്ടൻ, കാനഡ എന്നിവ ലുകാഷെങ്കോ ഉൾപ്പെടെ 90 ഓളം ബലാറസ് ഉദ്യോഗസ്ഥരുടെ സ്വത്ത് മരവിപ്പിക്കുകയും യാത്രാ നിരോധനം ഏർപ്പെടുത്തുകയും ചെയ്തിട്ടുണ്ട്. 1994 മുതൽ ലുകാഷെങ്കോ കർശനമായി നിയന്ത്രിച്ചിരുന്ന പടിഞ്ഞാറൻ രാജ്യങ്ങളും ബെലാറസും തമ്മിലുള്ള ബന്ധം ഇതോടെ വഷളാകുമെന്ന് ഉറപ്പാണ്.

      ലുകാഷെങ്കോയുടെ ഉത്തരവ്
      റയാനെയർ വിമാനം മിൻസ്കിലേക്ക് കൊണ്ടുപോകാൻ ലുകാഷെങ്കോ യുദ്ധവിമാനത്തിന് ഉത്തരവിട്ടിരുന്നതായി ബെലാറസ് വാർത്താ ഏജൻസി ബെൽറ്റ റിപ്പോർട്ട് ചെയ്തു. 12 രാജ്യങ്ങളിൽ നിന്നുള്ള 170 ഓളം പേരടങ്ങിയ വിമാനം നിർബന്ധിതമായി താഴെ ഇറക്കാനുള്ള പ്രവർത്തനം മുൻകൂട്ടി ആസൂത്രണം ചെയ്തതാണെന്ന് തോന്നുന്നുവെന്ന് ലിത്വാനിയൻ പ്രസിഡന്റ് ഉപദേഷ്ടാവ് അസ്ത സ്കൈസ്ഗിരിറ്റ് പറഞ്ഞു. കഴിഞ്ഞ ഓഗസ്റ്റ് മുതൽ 35,000 ത്തോളം പേരെ ബലാറസിൽ തടഞ്ഞുവച്ചിട്ടുണ്ടെന്ന് മനുഷ്യാവകാശ സംഘടനകൾ പറയുന്നു. നിരവധി പേർക്ക് ജയിൽ ശിക്ഷയും ലഭിച്ചിട്ടുണ്ട്.
      Published by:Aneesh Anirudhan
      First published:
      )}