വിശുദ്ധ ഖുറാൻ കത്തിച്ചു; കലാപഭൂമിയായി സ്വീഡൻ നഗരം

മാൽമോ: ഇസ്ലാം വിരുദ്ധ പ്രവര്‍ത്തനങ്ങള്‍ക്ക് എതിരെ ഒരു വിഭാഗം ജനങ്ങൾ തെക്കൻ സ്വീഡൻ നഗരത്തിൽ നടത്തിയ പ്രതിഷേധം വൻ കലാപത്തിലേയ്ക്ക് വഴിവെച്ചു. വെള്ളിയാഴ്ചയായിരുന്നു സംഭവം. ചില വലതുപക്ഷ തീവ്രവാദികള്‍ വിശുദ്ധ ഖുറാൻ പരസ്യമായി കത്തിച്ചതാണ് പ്രതിഷേധക്കാരെ പ്രകോപിപ്പിച്ചത്. മുന്നൂറോളം പ്രതിഷേധക്കാര്‍ ചേർന്ന് പോലീസിനു നേരെ സാധനങ്ങള്‍ വലിച്ചെറിയുകയും കാര്‍ ടയറുകള്‍ കത്തിക്കുകയും ചെയ്തതായി പോലീസ് വക്താവ് അറിയിച്ചു.

തീവ്ര വലതുപക്ഷ രാഷ്ട്രീയ പാർട്ടിയായ ഹാർഡ് ലൈനിന്റെ നേതാവ് റാസ്മസ് പലുദന് മാൽമോയിൽ ഒരു യോഗം നടത്താൻ അനുമതി നിഷേധിച്ചതിനെ തുടർന്നാണ് പ്രശ്നങ്ങൾ ആരംഭിച്ചത്. ക്രമസമാധാന പ്രശ്നങ്ങള്‍ ഉണ്ടാകും എന്ന കാരണത്താലാണ് റാലിക്ക് അധികൃതര്‍ അനുമതി നിഷേധിച്ചത്. വലതുപക്ഷ നേതാവ് റാസ്മസ് പലുദന് മല്‍മോയ്ക്ക് അടുത്തുവച്ച് തടഞ്ഞ് കസ്റ്റഡിയിലും എടുത്തു. ഇതില്‍ പ്രതിഷേധിച്ചാണ് ചില തീവ്രവലതുപക്ഷക്കാര്‍ നഗരത്തില്‍ വിശുദ്ധ ഗ്രന്ഥം അഗ്നിക്കിരയാക്കിയത്.

കുടിയേറ്റ വിരുദ്ധ കക്ഷിയായ ഹാര്‍ഡ് ലൈന്‍ നേതാവാണ് റാസ്മസ് പലുദന്‍. സ്വീഡനിലേക്കുള്ള ഇയാളുടെ വരവ് സ്വീഡിഷ് അധികൃതര്‍ രണ്ട് വര്‍ഷത്തേക്ക് വിലക്കിയിരുന്നു. സ്വീഡനിൽ നിയമം ലംഘിക്കാൻ പോവുകയാണെന്നും അയാളുടെ സാന്നിധ്യം സമൂഹത്തിന് ഭീഷണിയാകുമെന്ന് സൂചന കിട്ടിയതിനാലാണ് അത്തരത്തിൽ ഒരു നടപടി സ്വീകരിച്ചതെന്ന് മാൽമോയിലെ പോലീസ് വക്താവ് കാലെ പെർസൺ പറഞ്ഞു.
You may also like:11 ദിവസം നീണ്ട പൂജ; പുരോഹിതർക്ക് ദക്ഷിണയായി നൽകിയത് വ്യാജനോട്ടുകൾ: സ്ത്രീ അറസ്റ്റിൽ [NEWS]കഞ്ചാവ് സിഗരറ്റ് ആവശ്യപ്പെട്ട് റിയ ചക്രബർത്തി? വാട്സ്ആപ്പ് ചാറ്റ് പുറത്തുവിട്ട് സുശാന്തിന്‍റെ സഹോദരി [NEWS] Shocking| തെരുവിൽ കഴിയുന്ന സ്ത്രീയെ കൊലപ്പെടുത്തി; മൃതദേഹത്തിൽ ലൈംഗിക വൈകൃതം; യുവാവിനെ തിര‍ഞ്ഞ് പൊലീസ് [NEWS]
മാൽമോ പ്രദേശത്ത് വെള്ളിയാഴ്ച ദിവസം നിരവധി മുസ്ലീം വിരുദ്ധ പ്രവര്‍ത്തനങ്ങള്‍ നടന്നെന്നാണ് റിപ്പോര്‍ട്ട്. ഒരു പബ്ലിക് സ്ക്വയറിൽ വെച്ച് മൂന്നുപേര്‍ ചേര്‍ന്ന് മതഗ്രന്ഥത്തിൻറെ കോപ്പിയിൽ ചവിട്ടിയതായും പറയുന്നു.

ഖുറാൻ കത്തിച്ച സ്ഥലത്തു തന്നെയാണ് ഇന്നലെ പ്രതിഷേധ പ്രകടനങ്ങളും ആരംഭിച്ചത്. കലാപം നിയന്ത്രണ വിധേയമായിട്ടില്ലെന്നും എന്നാൽ സ്ഥിതിഗതികള്‍ ശാന്തമാക്കാൻ ശ്രമിക്കുകയാണെന്നും പോലീസ് വക്താവ് അറിയിച്ചു. മുൻപ് നടന്ന സംഭവങ്ങളുമായി പ്രതിഷേധത്തിന് ബന്ധമുണ്ടോയെന്ന കാര്യം പരിശോധിക്കുകയാണെന്നും പോലീസ് അറിയിച്ചു.