ആപ്പിൾ സ്റ്റോറിൽനിന്ന് നാലു കോടി രൂപയുടെ 430 ഐഫോണുകൾ കവർന്നു; മോഷ്ടാക്കളെത്തിയത് കടയുടെ പിൻഭാഗത്തെ ഭിത്തി തുരന്ന്

ഏകദേശം നാലു കോടി രൂപ വില വരുന്ന ഐഫോണുകൾ ആപ്പിൾ സ്റ്റോറിൽനിന്ന് മോഷണം പോയി. അമേരിക്കയിലെ വാഷിങ്ടണിലുള്ള ആപ്പിൾ സ്റ്റോറിൽനിന്നാണ് ഐഫോണുകൾ മോഷണം പോയത്. ഒരു ലക്ഷത്തോളം രൂപ വില വരുന്ന 430 ഐഫോണുകളാണ് മോഷണം പോയത്. കടയുടെ പിൻഭാഗത്തെ ഭിത്തി തുരന്നാണ് മോഷ്ടാക്കൾ എത്തിയത്.

വാഷിങ്ടണിലെ പ്രമുഖ മാളിലുള്ള ആപ്പിൾ സ്റ്റോറിലാണ് വൻ കവർച്ച നടന്നത്. ആപ്പിൾ സ്റ്റോറിനോട് ചേർന്ന കോഫി ഷോപ്പിന്‍റെ ഭിത്തി തുരന്നാണ് മോഷ്ടാക്കൾ ആപ്പിൾ സ്റ്റോറിന്‍റെ പിൻഭാഗത്തേക്ക് എത്തിയത്. തുടർന്ന് ആപ്പിൾ സ്റ്റോറിന്‍റെ ഭിത്തി തുരക്കുകയും, 430 ഐഫോണുകൾ മോഷ്ടാക്കൾ കൊണ്ടുപോകുകയുമായുരുന്നു.

വാഷങ്ടണിലെ പ്രശസ്തമായ കോഫി ഗിയർ എന്ന കോഫി ഷോപ്പ് വഴിയാണ് മോഷ്ടാക്കൾ ആപ്പിൾ സ്റ്റോറിൽ കടന്നത്. “ഞങ്ങളുടെ സ്റ്റോർ ആപ്പിൾ സ്റ്റോറിനോട് ചേർന്നാണെന്ന് ഞാൻ ഒരിക്കലും കരുതിയിരുന്നില്ല, എന്നാൽ ആപ്പിൾ സ്റ്റോർ കോഫി സ്റ്റോറിന്‍റെ വശത്താണെന്ന കാര്യം മോഷ്ടാക്കൾ കൃത്യമായി മനസിലാക്കി.” സിയാറ്റിൽ കോഫി ഗിയർ മാനേജർ എറിക് മാർക്ക്സ് കിംഗ് 5 ന്യൂസിനോട് പറഞ്ഞു.

മോഷ്ടാക്കൾ മുറിച്ചെടുത്ത മതിലിന്റെ ചിത്രം സിയാറ്റിൽ കോഫി ഗിയർ സിഇഒ ട്വിറ്ററിൽ പങ്കുവെച്ചു. ഈ ചിത്രം ഇപ്പോൾ വൈറലായിട്ടുണ്ട്. കോഫി ഷോപ്പിൽ നിന്ന് ഒന്നും മോഷ്ടിച്ചിട്ടില്ല എന്നത് ശ്രദ്ധേയമാണ്. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

ശാസ്ത്രീയ അന്വേഷണവും പുരോഗമിക്കുകയാണ്. വിരലടയാള വിദഗ്ദരും ഫോറൻസിക് വിഭാഗവും സ്ഥലത്തെത്തി തെളിവുകൾ ശേഖരിച്ചു. സംഭവത്തിൽ നിർണായക തെളിവുകൾ ലഭിച്ചതായി വാഷിങ്ടൺ പൊലീസ് അറിയിച്ചു. മോഷ്ടാക്കൾ ഉടൻ പിടിയിലാകുമെന്നും പൊലീസ് പറയുന്നു.