രാത്രിയിൽ കാമുകിയെ കാണാനെത്തി; നാട്ടുകാർ പിടിച്ച് വിവാഹം കഴിപ്പിച്ചു; വൈറലായി ഒരു ഗ്രാമം

പാട്ന: മുൻഗർ- ബീഹാറിലെ ഒരു ജില്ലയുടെ പേരാണിത്. അവിടുത്തെ അധികമൊന്നും അറിയപ്പെടാതിരുന്ന ഗോഖുൽചക് എന്ന ഗ്രാമം ഇപ്പോൾ സമൂഹമാധ്യമങ്ങളിൽ വൈറലാണ്. പാതിരാത്രിയിൽ കാമുകിയെ കാണാൻ എത്തിയ യുവാവിനെ നാട്ടുകാർ പിടികൂടി വിവാഹം കഴിപ്പിച്ചതോടെയാണ് ഈ നാട് പ്രശസ്തമായത്. വിവാഹത്തിന്‍റെ വീഡിയോ സമൂഹമാധ്യമങ്ങളിൽ പ്രചരിച്ചതോടെയാണ് ഗോഖുൽചക് എന്ന ഗ്രാമം വൈറലായത്.

ബീഹാറിലെ മുംഗർ ജില്ലയിലെ ടെതിയ ബാംബർ ബ്ലോക്ക് പ്രദേശത്തിന് കീഴിലുള്ള ധൗരി പഞ്ചായത്തിലെ ഗോഖുൽചക് ഗ്രാമത്തിലാണ് നാടകീയ സംഭവങ്ങൾ അരങ്ങേറിയത്. കമിതാക്കളുടെ പെട്ടെന്നുള്ള വിവാഹാണ് സമൂഹമാധ്യമങ്ങളിൽ ഗോഖുൽചക് എന്ന ഗ്രാമം വൈറലായത്.

ബീഹാറിലെ ഹവേലി ഖഡഗ്പൂർ ബ്ലോക്ക് പരിധിയിലെ മജഗയ പഞ്ചായത്തിലെ നസാരി ഗ്രാമത്തിലെ സോനു കുമാർ എന്ന യുവാവും ഗോഖുൽചാക്കിലെ ഹേമ കുമാരി എന്ന യുവതിയും തമ്മിൽ കഴിഞ്ഞ 6 മാസമായി പ്രണയത്തിലായിരുന്നു പറയപ്പെടുന്നു. ഇരുവരും വീട്ടുകാരുടെ കണ്ണ് വെട്ടിച്ച് രാത്രികാലങ്ങളിൽ പരസ്പരം കാണാറുണ്ടായിരുന്നു. ഏറെ ദൂരം താണ്ടിയാണ് സോനു കുമാർ ഹേമ കുമാരിയെ കാണാനായി എത്തിയിരുന്നത്.

ചൊവ്വാഴ്ച രാത്രി വൈകി സോനു, ഹേമയെ കാണാൻ ഗോഖുൽചക്കിലെത്തി. എന്നാൽ ഇരുവരെയും നാട്ടുകാരിൽ ചിലർ കാണുകയും കൈയ്യോടെ പിടികൂടുകയും ചെയ്തു. ഇതിനുശേഷം ഗ്രാമവാസികൾ യുവാവിനെയും യുവതിയെയും ചോദ്യം ചെയ്തു. നാട്ടുകാരുടെ മുന്നിൽ വെച്ച് പ്രണയത്തിലാണെന്നും വിവാഹം കഴിക്കാൻ ആഗ്രഹിക്കുന്നുവെന്നും ഇരുവരും പറഞ്ഞു.

അങ്ങനെ നാട്ടുകാർ മുൻകൈയെടുത്ത് സോനുവിന്‍റെയും ഹേമയുടെയും വിവാഹം നടത്തിക്കൊടുത്തു. ഗ്രാമവാസികൾ യുവാവിന്റെ വീട്ടുകാരെയും വിവരം അറിയിച്ചു. അതിനിടെ ഒരാൾ വിവാഹ ചടങ്ങുകളുടെ വീഡിയോ എടുത്ത് സോഷ്യൽ സൈറ്റുകളിൽ അപ്‌ലോഡ് ചെയ്തു. ഇപ്പോൾ ഈ വീഡിയോ ഇപ്പോൾ വൈറലായിരിക്കുകയാണ്.