Big Boss | ഓർമയുണ്ടോ മലയാളി ഹൗസിലെ തിങ്കളിനെ; ഇപ്പോൾ ഇതാ സഹോദരി ബിഗ് ബോസിലും

മലയാളത്തിലെ ആദ്യത്തെ ബിഗ് ബോസ് ഷോ അഥവാ മലയാളീകരിച്ച ബിഗ് ബോസ് ഷോ ആയിരുന്നു മലയാളി ഹൗസ്. ഒരു തവണ മാത്രമാണ് മലയാളി ഹൗസ് പ്രേക്ഷകർക്ക് മുന്നിൽ എത്തിയത്. അതിനു പിന്നാലെ, ഹിന്ദിയിലും തമിഴിലും നിരവധി സീസണുകൾ പിന്നിട്ട ബിഗ് ബോസ് മലയാളത്തിലേക്കും എത്തി.

ബിഗ് ബോസിന്റെ ആദ്യ സീസൺ വൻ വിജയമായിരുന്നെങ്കിലും രണ്ടാം സീസൺ ഒന്നാം സീസണോളം അഭിപ്രായം നേടിയില്ല. കൊറോണ വന്നതോടു കൂടി രണ്ടാം സീസൺ പകുതിക്ക് വച്ച് അവസാനിപ്പിക്കേണ്ടിയും വന്നിരുന്നു.

ഏതായാലും മൂന്നാം സീസണിൽ പ്രേക്ഷകരെ ആദ്യദിനം കൈയിലെടുത്തത് ഡിംപൽ ഭാൽ ആണ്. നീളൻ മുടിയുള്ള, കൊലുന്നനെയുള്ള, വാക്കുകളിൽ ആത്മവിശ്വാസം തുളുമ്പുന്ന സുന്ദരി. ലാലേട്ടൻ റോസാപ്പൂവ് നൽകി ആയിരുന്നു ഓരോ മത്സരാർത്ഥികളെയും ബിഗ് ബോസ് ഷോയിലേക്ക് സ്വാഗതം ചെയ്തത്.

സിനിമ - സീരിയൽ താരമായ നോബി ആയിരുന്നു ആദ്യത്തെ മത്സരാർത്ഥി. രണ്ടാമത്തെ മത്സരാർത്ഥി ആയാണ് ഡിംപൽ ഷോയിലേക്ക് എത്തിയത്. ഈ ഡിംപലിനെക്കുറിച്ചുള്ള ചർച്ചകളാണ് ഇപ്പോൾ സോഷ്യൽ മീഡിയയിൽ മുഴുവനായും.

മലയാളി പ്രേക്ഷകർ ആദ്യമായാണ് ഡിംപലിനെ കാണുന്നത്. ഇതിനു മുമ്പും ഡിംപൽ അത്ര പരിചയമുള്ള മുഖമല്ല. എന്നാൽ, ഡിംപലിന്റെ അടുത്ത ബന്ധുവിനെ സഹോദരിയെ നമുക്ക് അറിയാം. അതാണ് തിങ്കൾ. ആരാണ് തിങ്കൾ എന്നാണോ? ബിഗ് ബോസ് ഒക്കെ വരുന്നതിനു മുമ്പ് ഒരു ഷോ ഉണ്ടായിരുന്നു. മലയാളി ഹൗസ്. അന്ന് ആ മലയാളി ഹൗസിൽ എല്ലാവരെയും കൈയിലെടുത്ത താരമായിരുന്നു തിങ്കൾ എന്ന തിങ്കൾ ഭാൽ.

ഏതായാലും സോഷ്യൽ മീഡിയയിൽ ഡിംപൽ ഭാലിനെക്കുറിച്ചുള്ള ചർച്ചകളാണ് ഇപ്പോൾ സജീവമായിരിക്കുന്നത്. സൈക്കോളജിയിൽ എം ഫില്ലും ക്ലിനിക്കൽ സൈക്കോളജിയിൽ എം എസ് സിയും പൂർത്തിയാക്കിയ ആളാണ് ഡിംപൽ. ഡിംപലിന്റെ കുടുംബ പശ്ചാത്തലത്തിലും പേരിലെ വ്യത്യസ്തത ഉണ്ട്. അച്ഛൻ ഉത്തർ പ്രദേശിലെ മീററ്റ് സ്വദേശിയും അമ്മ ഇടുക്കി കട്ടപ്പന സ്വദേശിയുമാണ്.

വളരെ ചെറുപ്പത്തിൽ തന്നെ ജീവിതത്തോട് വലിയ പോരാട്ടം നടത്തി വന്നയാളാണ് ഡിംപൽ. അപൂർവ ക്യാൻസർ ആയിരുന്നു കുഞ്ഞുനാളിൽ ഡിംപലിനെ ബാധിച്ചത്. നട്ടെല്ല് അലിഞ്ഞു പോകുന്ന അപൂർവ ക്യാൻസർ ആയിരുന്നു ഡിംപലിനെ ബാധിച്ചത്. ദീർഘനാളത്തെ ചികിത്സയ്ക്ക് ഒടുവിലാണ് അത് സുഖമായത്.

തനിക്ക് ആരെയും പോലെ ആകേണ്ടെന്നും തനിക്ക് താനായി ജീവിച്ചാൽ മതിയെന്നും ആയിരുന്നു ഡിംപൽ ഷോയിൽ പറഞ്ഞത്.

ബിഗ് ബോസ് സീസൺ മൂന്നിന്റെ പ്രധാന ആകർഷണങ്ങളിൽ ഒന്നായി മാറിയിരിക്കുകയാണ് ഡിംപൽ ഭാൽ.