Actor Bala | ഉണ്ണി മുകുന്ദൻ- വ്ലോഗർ വിഷയത്തിൽ ബാല അങ്ങനെ പറഞ്ഞോ? നടൻ പ്രതികരിക്കുന്നു

നടൻ ഉണ്ണി മുകുന്ദനും (Unni Mukundan) യൂട്യൂബ് വ്ലോഗറും തമ്മിലെ സംഭാഷണം കഴിഞ്ഞ ദിവസം കേരളം ഒട്ടേറെ ചർച്ച ചെയ്ത വിഷയമാണ്. സിനിമ കേരളത്തിന് പുറത്തുള്ള സംസ്ഥാനങ്ങളിൽ മറ്റു ഭാഷകളിൽ റിലീസ് ചെയ്യുന്ന ദിവസത്തിന് മുൻപാണ് വ്ലോഗറും ഉണ്ണി മുകുന്ദനും തമ്മിൽ ചൂടേറിയ വാക്കുതർക്കമുണ്ടായത്. സംഭവത്തെ തുടർന്ന് ഉണ്ണി മുകുന്ദൻ ഒരു വിശദീകരണ പോസ്റ്റും നൽകി

ഇതിനു തൊട്ടു മുൻപ് ഉണ്ണി മുകുന്ദനുമായി ബന്ധപ്പെട്ട് വിവാദ വിഷയമായി മാറിയത് നടൻ ബാലയുമായുള്ള ചില സിനിമാ ഇടപാടുകളാണ്. 'ഷെഫീക്കിന്റെ സന്തോഷം' എന്ന ചിത്രത്തിൽ അഭിനയിച്ച് മലയാള സിനിമയിലേക്ക് മടങ്ങിവന്ന ബാല, പ്രതിഫലം ലഭിച്ചില്ല എന്ന തരത്തിൽ സംസാരിച്ചിരുന്നു. എന്നാൽ വ്ലോഗർ- ഉണ്ണി മുകുന്ദൻ വിഷയത്തിൽ ബാലയുടെ പ്രതികരണം ഉണ്ടായിരുന്നോ ഇല്ലയോ? ഏറ്റവും പുതിയ വീഡിയോയിൽ തന്നെക്കുറിച്ച് പ്രചരിച്ച ചില വിഷയങ്ങളിൽ ബാല രൂക്ഷപ്രതികരണം നടത്തുന്നുണ്ട് (തുടർന്ന് വായിക്കുക)

ഒരു യൂട്യൂബ് ചാനൽ നടനെതിരെ പറയാത്ത കാര്യങ്ങൾ പ്രചരിപ്പിച്ചു എന്നാണ് ബാലയുടെ ആരോപണം. ഈ ചാനലിന്റെ വിവരങ്ങൾ സഹിതമാണ് ഒന്നര മിനിറ്റ് ദൈർഘ്യമുള്ള വീഡിയോയിൽ ബാല പ്രതികരിച്ചത്. ബാലയുടെ വാക്കുകളിലേക്ക്

'വീഡിയോ കണ്ടു ഞാൻ ചിരിച്ചുപോയി. ഞാൻ എന്തൊക്കെയോ പറഞ്ഞെന്നു പറഞ്ഞ് ന്യൂസ് ഇട്ടിരിക്കുന്നു, ഞാൻ വളരെ വ്യക്തമായി ഒരു സ്റ്റേറ്റ്മെൻറ്റ് കൊടുത്തിരുന്നു. മീഡിയ ഇല്ലെങ്കിൽ നടൻ ഇല്ല, നടനില്ലെങ്കിൽ മീഡിയ ഇല്ല എന്നുമാണ് ഞാൻ പറഞ്ഞത്...

നമ്മളെല്ലാം കുടുംബം പോലെ ഒന്നിച്ചു പോണമെന്ന രീതിയിലാണ് ഞാൻ സംസാരിച്ചത്. ഞാൻ ഇന്റർവ്യൂ കൊടുത്തു എന്ന നിലയിൽ എന്റെ പഴയ വീഡിയോയിൽ നിന്നും എന്തെല്ലാമോ എടുത്ത് വെട്ടിവച്ച് കൊണ്ടാണ് അത് ചെയ്തത്. ഞാൻ പറഞ്ഞത് എന്നപോലെ സൂപ്പർ സ്ക്രിപ്റ്റിൽ ചെയ്തിരിക്കുന്നു.' ബാല പ്രതികരിച്ചു

'ഉണ്ണി മുകുന്ദന്റെ തെറിവിളിയിൽ മറുപടിയുമായി ബാല' എന്ന തലക്കെട്ടോടു കൂടിയാണ് വീഡിയോ പ്രചരിച്ചത്