'അരിക്കൊമ്പനി'ലും ഉണ്ടാവുമോ?; കൊമ്പ് വളര്‍ത്തിക്കൊണ്ടിരിക്കുകയാണെന്ന് ടൊവിനോയുടെ മാസ്സ് ഡയോലോഗ്; ഏറ്റെടുത്ത് സോഷ്യൽമീഡിയ

കേരളം നേരിട്ട മഹാപ്രളയത്തെ അഭ്രപാളികളിലെത്തിച്ച സംവിധായകൻ ജൂഡ് ആന്റണി ജോസഫിന്റെ ചിത്രം '2018' മികച്ച പ്രതികരണവുമായി മുന്നേറുകയാണ്. യാഥാർഥ്യത്തെ അത്രമേൽ സ്വാഭാവികതയോടു കൂടി ബിഗ് സ്‌ക്രീനിലെത്തിച്ചതിന്റെ ക്രെഡിറ്റ് ജൂഡിനും സിനിമയുടെ വലുതും ചെറുതുമായ മേഖലകളിൽ പ്രവർത്തിച്ച ഓരോരുത്തർക്കുമാണ്. പ്രളയകാലത്ത് നേരിട്ട് പ്രവർത്തിക്കുകയും, സിനിമയിലും ഒരു സുപ്രധാനവേഷം ചെയ്യുകയും ചെയ്ത നടനാണ് ടൊവിനോ തോമസ്.

ചിത്രത്തിന്റെ വിജയാഘോഷത്തിനിടെ അരിക്കൊമ്പൻ സിനിമയുമായി ബന്ധപ്പെട്ട ചോദ്യത്തിന് ടൊവിനോ നൽകിയ മറുപടി ആണ് ഇപ്പോൾ വൈറലാകുന്നത്. വൈറസിനും 2018നും ശേഷം ഇനി അരികൊമ്പൻ സിനിമയിലും ടോവിനോയെ പ്രതീക്ഷിക്കാമോ എന്നായിരുന്നു യൂട്യൂബറുടെ ചോദ്യം.

ഈ ചോദ്യത്തിന് ടോവിനോ നൽകുന്ന മറുപടിയാണ് ഇപ്പോൾ സോഷ്യൽമീഡിയ ഏറ്റെടുത്തിരിക്കുന്നത്. 'അതെ, അതിനുവേണ്ടി ഞാൻ ഇപ്പോൾ കൊമ്പ് നീട്ടി വളർത്തിക്കൊണ്ടിരിക്കുകയാണ്'. എന്നായിരുന്നു ടോവിനോയുടെ തമാശകലർന്ന മറുപടി.

മൾട്ടി സ്റ്റാർ കാസ്റ്റുള്ള ചിത്രത്തിൽ കുഞ്ചാക്കോ ബോബൻ, ടൊവിനോ തോമസ്, ആസിഫ് അലി, അപർണ ബാലമുരളി തുടങ്ങി ഒരു നീണ്ട താരനിര തന്നെയുണ്ട്.

അഖിൽ പി. ധർമജനും ജൂഡ് ആന്റണിയും ചേർന്നാണ് സിനിമയുടെ തിരക്കഥ ഒരുക്കിയത്. ഈ സിനിമ പ്രഖ്യാപിച്ചത് മുതൽ സംവിധായകൻ നേരിട്ട വെല്ലുവിളികൾ ഒട്ടേറെയുണ്ട്.