അനാഥരായ ഹിന്ദു സഹോദരിമാരെ ദത്തെടുത്ത് ഹിന്ദുമതാചാരപ്രകാരം വിവാഹവും നടത്തി; മുസ്ലീം യുവാവിന് അഭിനന്ദന പ്രവാഹം

ഹിന്ദു വിവാഹ വേഷം ധരിച്ച യുവതികൾക്കൊപ്പം നിൽക്കുന്ന മുസ്ലിം യുവാവിന്റെ ചിത്രം സമൂഹമാധ്യമങ്ങളിൽ വൈറലായിരിക്കുകയാണ്. ബാബഭായ് പത്താൻ എന്ന യുവാവാണിത്. മതത്തിന്റെ പേരിൽ എത്രയൊക്കെ ഭിന്നിപ്പിക്കാൻ ശ്രമിച്ചാലും മാനവികതയുടെയും ദയയുടെയും ഉദാഹരണങ്ങൾ ചില മനുഷ്യരിലൂടെ എന്നും നിലനിൽക്കും എന്നതിന്റെ ഉദാഹരണമാണ് ഇദ്ദേഹം .

മഹാരാഷ്ട്രയിലെ അഹമ്മദ് നഗർ സ്വദേശിയായ ബാബഭായ് പത്താൻറെ മാതൃകാപരമായ പ്രവൃത്തിയാണ് ഇപ്പോൾ അഭിനന്ദനം ഏറ്റുവാങ്ങിക്കൊണ്ടിരിക്കുന്നത്. അനാഥരായ രണ്ട് ഹിന്ദുപെൺകുട്ടികളെ സഹോദരിമാരായി പത്താൻ ദത്തെടുത്തിരുന്നു.

അവരെ സംരക്ഷിക്കുകയും തന്റെ സ്വന്തം ചെലവിൽ അവരുടെ വിവാഹം നടത്തുകയും ചെയ്തു. മുസൽമാനായിരുന്നിട്ടും പെൺകുട്ടികളുടെ വിവാഹം അവരുടെ മതാചാര പ്രകാരം തന്നെ അദ്ദേഹം നടത്തി.

ബാബഭായ് പത്താന്റെ മനുഷ്യത്വവും മറ്റൊരു മതത്തിന്റെ വിശ്വാസങ്ങളെ ബഹുമാനിക്കാനുള്ള അദ്ദേഹത്തിന്റെ വലിയ മനസുമാണ് കൈയ്യടി നേടിയിരിക്കുന്നത്.

നിരവധി പേരാണ് അദ്ദേഹത്തെ അഭിനന്ദിച്ച് എത്തിയിരിക്കുന്നത്. ശരിക്കുള്ള ഇന്ത്യക്കാരൻ ഇതാണെന്നും ഇതാണ് ഇന്ത്യൻ സംസ്കാരം ജനങ്ങളെ പഠിപ്പിക്കുന്നതെന്നും ഒരാൾ കുറിച്ചിരിക്കുന്നു. യഥാർഥ നായകൻ എന്നാണ് ബാബഭായ് പത്താനെ ഒരാൾ വിശേഷിപ്പിച്ചിരിക്കുന്നത്.