ഐശ്വര്യ റായ് അല്ല മക്കളേ, ആലിയ ഭട്ട്; മെറ്റ് ഗാലയിൽ ആലിയ ഭട്ടിനെ തിരിച്ചറിയാതെ മാധ്യമപ്രവർത്തകർ

മെറ്റ് ഗാലയിൽ തന്റെ ആദ്യ പ്രവേശനം തന്നെ അവിസ്മരണീയമാക്കിയാണ് ബോളിവുഡ് താരം ആലിയ ഭട്ട് തിരിച്ച് ഇന്ത്യയിലെത്തിയത്.

ഹോളിവുഡിൽ ആദ്യ സിനിമ പുറത്തിറങ്ങാനിരിക്കേയാണ് പാശ്ചാത്യ ഫാഷൻ ലോകത്ത് ആലിയ തന്റെ സാന്നിധ്യം അറിയിച്ചത്.

ന്യൂയോർക്ക് സിറ്റിയിലെ മെട്രോപൊളിറ്റൻ മ്യൂസിയം ഓഫ് ആർട്ട്സ് കോസ്റ്റ്യൂം ഇൻസ്റ്റിറ്റ്യൂട്ടിന്റെ ധനസമാഹരണത്തിനായി നടത്തുന്ന ഗാലയാണ് മെറ്റ് ഗാല.

ലോകത്തിലെ തന്നെ ഏറ്റവും വലിയ ഫാഷൻ ഇവന്റ് കൂടിയാണിത്. മെയ് മാസത്തിലെ ആദ്യ ശനിയാഴ്ച്ചയാണ് മെറ്റ് ഗാല നടക്കുക.

ലോകത്തിലെ തിരഞ്ഞെടുക്കപ്പെടുന്ന പ്രശസ്ത വ്യക്തിത്വങ്ങൾക്കാണ് "ഫാഷന്റെ ഏറ്റവും വലിയ രാത്രി"യിലേക്ക് ക്ഷണം ലഭിക്കുക. ഇന്ത്യയിൽ നിന്നും ഐശ്വര്യ റായ്, പ്രിയങ്ക ചോപ്ര, ദീപിക പദുകോൺ തുടങ്ങിയ താരങ്ങൾ ഇതിനു മുമ്പ് മെറ്റ് ഗാലയിൽ പങ്കെടുത്തിട്ടുണ്ട്. ആലിയയുടെ ആദ്യ മെറ്റ് ഗാലയാണിത്.

എന്നാൽ മെറ്റ് ഗാലയിൽ ആലിയയെ മാധ്യമപ്രവർത്തകർ ഐശ്വര്യ റായ് എന്ന് തെറ്റി വിളിച്ചതിനെ കുറിച്ചാണ് ഇപ്പോൾ സോഷ്യൽമീഡിയയിൽ ചർച്ച.

മാധ്യമങ്ങൾക്ക് മുന്നിൽ ഫോട്ടോ എടുക്കാനായി നിൽക്കുമ്പോഴായിരുന്നു ആലിയ ഭട്ടിനെ ഐശ്വര്യ റായ് എന്ന് അഭിസംബോധന ചെയ്തത്.

സോഷ്യൽമീഡിയയിൽ ഇതിന്റെ വീഡിയോ ഇപ്പോൾ വൈറലാണ്. മുത്തുകൾ പതിച്ച തൂവെള്ള ഗൗൺ ആണ് ആലിയ ഭട്ട് അണിഞ്ഞിരുന്നത്.

പ്രബൽ ഗുരുംഗാണ് ആലിയയുടെ ഗൗൺ ഡിസൈൻ ചെയ്തത്. ഒരു ലക്ഷം മുത്തുകൾ പതിച്ചാണ് ഈ ഗൗൺ നിർമിച്ചത്.