Amitabh Bachchan| മാതാപിതാക്കൾ താമസിച്ച ബംഗ്ലാവ് കോടികൾക്ക് വിറ്റ് അമിതാഭ് ബച്ചൻ; കെട്ടിടം പൊളിക്കാനൊരുങ്ങി പുതിയ ഉടമ

സൗത്ത് ഡൽഹിയിലുള്ള ബച്ചൻ കുടുംബത്തിന്റെ ആദ്യ വീട് വിറ്റ് അമിതാഭ് ബച്ചൻ. അമിതാഭ് ബച്ചന്റെ പിതാവും കവിയുമായ ഹരിവംശറായ് ബച്ചനും അമ്മ തേജി ബച്ചനും താമസിച്ചിരുന്ന സോപാൻ എന്ന വീടാണ് അമിതാഭ് ബച്ചൻ വിറ്റത്.

അമിതാഭ് ബച്ചന്റെ അമ്മ തേജി ബച്ചന്റെ പേരിലാണ് വീട് രജിസ്റ്റർ ചെയ്തിരുന്നത്. സൗത്ത് ഡൽഹിയിലെ ഗുൽമോഹർ പാർക്കിൽ സ്ഥിതി ചെയ്യുന്ന വീട് ബച്ചൻ കുടുംബത്തിന്റെ ആദ്യ വീടുകളിലൊന്നാണ്.

23 കോടി രൂപയ്ക്കാണ് അമിതാഭ് ബച്ചൻ ബംഗ്ലാവ് വിറ്റിരിക്കുന്നതെന്നാണ് റിപ്പോർട്ടുകൾ. നെസോൺ ഗ്രൂപ്പ് ഓഫ് കമ്പനീസ് സിഇഒ ആയ ആവ്നി ബദേർ ആണ് വീട് വാങ്ങിയതെന്നാണ് ഇക്കണോമിക്സ് ടൈംസ് റിപ്പോർട്ടിൽ പറയുന്നത്.

ബച്ചൻ കുടുംബവുമായി 35 വർഷത്തെ ബന്ധമുള്ള വ്യക്തിയാണ് ആവ്നി. ഇപ്പോൾ വിലയ്ക്ക് വാങ്ങിയിരിക്കുന്ന വീടിന് അടുത്താണ് ആവ്നിയുടെ ബംഗ്ലാവും സ്ഥിതി ചെയ്യുന്നത്.

ഡിസംബർ 7 നാണ് വിൽപന നടന്നതെന്നാണ് റിപ്പോർട്ടുകൾ. 418.05 സ്ക്വയർ മീറ്ററിലാണ് വീടുള്ളത്. പുറത്തു വരുന്ന വാർത്തകൾ പ്രകാരം പുതിയ ഉടമ കെട്ടിടം പൊളിച്ച് പുതിയത് പണിയും.

കെട്ടിടത്തിന് കാലപ്പഴക്കമുണ്ടെന്നും ഇത് പൊളിച്ച് തങ്ങളുടെ ആവശ്യത്തിന് അനുസരിച്ച് പുതിയത് പണിയാനാണ് പദ്ധതിയെന്നും ആവ്നി വ്യക്തമാക്കുന്നു. വർഷങ്ങളായി ഈ സ്ഥലത്താണ് തങ്ങൾ താമസിക്കുന്നത്. വീടിനോട് ചേർന്ന് കൂടുതൽ സ്ഥലം വാങ്ങാൻ നേരത്തേ പദ്ധതിയുണ്ടായിരുന്നതായും ആവ്നി പറയുന്നു.

അമിതാഭ് ബച്ചൻ ഈ വീട് വിൽക്കുന്നുവെന്ന അറിയിച്ച ഉടനെ വാങ്ങിക്കാനുള്ള സന്നദ്ധത അറിയിക്കുകയായിരുന്നു.

അമിതാഭ് ബച്ചന്റെ മാതാപിതാക്കൾ ആദ്യം താമസിച്ചിരുന്ന വീടാണിത്. പിന്നീട് താരം മുംബൈയിൽ പുതിയ വീട് വെച്ചപ്പോൾ ഇരുവരും അങ്ങോട്ടേക്ക് താമസം മാറി. ഇതിനുശേഷം ഈ ബംഗ്ലാവ് അടച്ചിട്ടിരിക്കുകയാണ്.