ഗാന്ധിജി മുതൽ ചെഗുവേര വരെ; AIയിൽ സെൽഫികൾ സൃഷ്ടിച്ച് കലാകാരൻ

മനുഷ്യരാശിയെ തന്നെ മാറ്റിമറിക്കുന്ന ആർട്ടിഫിഷ്യല്‍ ഇന്റലിജൻസിൻ‌റെ വരവോടെ അതിനെ എത്രത്തോളം പ്രായോജനികമാക്കുകയെന്നതാണ് ഇന്ന് നാം ചിന്തിച്ചുകൊണ്ടിരിക്കരിക്കുന്നത്.

ഇപ്പോഴിതാ എഐ ഉപയോഗിച്ച് നിര്‍മ്മിച്ച സെൽഫികളാണ് സമൂഹമാധ്യമങ്ങളിൽ ശ്രദ്ധേയമാവുന്നത്.

ചില്ലറ ആളുകളല്ല എഐ സെൽഫിയിൽ ഇടം പിടിച്ചിരിക്കുന്നത്. മഹാത്മ ഗാന്ധിജി മുതൽ‌ ജവഹർലാൽ‌ നെഹ്റു, മദർ തെരേസ, സുഭാഷ് ചന്ദ്രബോസ്, അംബേദ്കർ, സ്റ്റാലിൻ, ചെഗുവേര, മാർട്ടിന്‍ ലൂഥർ, ആൽബർട്ട് ഐൻസ്റ്റീൻ, വിൽസൺ ചർച്ചിൽ തുടങ്ങിയ ലോകനേതാക്കളെയാണ് എഐ സെൽഫികളിൽ ചാലിച്ചിരിക്കുന്നത്.

jyo_john_mulloor എന്നയാളാണ് തന്റെ ഇന്‍സ്റ്റാഗ്രാം അക്കൗണ്ടില്‍ എഐ നിര്‍മിത ചിത്രങ്ങള്‍ പങ്കുവെച്ചത്.

അവര്‍ ജീവിച്ചിരുന്ന കാലത്ത് ഇന്നുള്ളത് പോലെ സെല്‍ഫി അന്നുണ്ടായിരുന്നുവെങ്കില്‍ എന്നതാണ് ഈ എ.ഐ സെൽഫികൾകൊണ്ട് ഉദ്ദേശിക്കുന്നത്.

തന്റെ പഴയ ഹാര്‍ഡ് ഡ്രൈവ് പരിശോധിച്ചപ്പോള്‍ ഭൂതകാലത്തില്‍ നിന്നുള്ള ചില സുഹൃത്തുക്കള്‍ അയച്ചു തന്ന ചില മൂല്യവത്തായ സെല്‍ഫികള്‍ കണ്ടെത്തിയെന്ന അടിക്കുറിപ്പോടെയാണ് ചിത്രങ്ങൾ പങ്കുവെച്ചിരിക്കുന്നത്.

മിഡ്‌ജേണി എഐ സാങ്കേതിക വിദ്യയും ഫോട്ടോഷോപ്പും ഉപയോഗിച്ചാണ് ഈ ചിത്രങ്ങള്‍ തയ്യാറാക്കിയിരിക്കുന്നത്.

നമ്മള്‍ നല്‍കുന്ന നിര്‍ദേശങ്ങള്‍ക്ക് അനുസരിച്ച് ചിത്രങ്ങള്‍ നിര്‍മിക്കാനാകുന്ന നിര്‍മിതബുദ്ധിയാണ് മിഡ്‌ജേണി.

ഗാന്ധിയുടെയും നെഹ്രുവിന്റേയും അടക്കം പഴയകാല നേതാക്കളുടെ ഈ ജീവന്‍തുടിക്കുന്ന സെല്‍ഫി ചിത്രങ്ങള്‍ നിര്‍മിക്കാന്‍ എന്തെല്ലാം കീവേഡുകളാണ് ഉപയോഗിച്ചേക്കുന്നതെന്നാണ് സോഷ്യൽ മീഡിയ പരതുന്നത്.

സോഷ്യല്‍ മീഡിയാ പ്ലാറ്റ്‌ഫോമായ ഡിസ്‌കോര്‍ഡില്‍ (Discord) മിഡ് ജേണി ബോട്ട് വഴി ഇത്തരം എഐ ചിത്രങ്ങള്‍ നിര്‍മിക്കാനാവും.