Mohanlal | മോഹൻലാലും രജനികാന്തും കുടുംബാംഗങ്ങൾ എന്നറിയുമോ? 'ജെയ്ലർ' സിനിമയ്ക്കായി അവർ ഒന്നിക്കുമ്പോൾ

രണ്ടു വർഷങ്ങൾക്ക് ശേഷം സൂപ്പർസ്റ്റാർ രജനികാന്ത് (Rajinikanth) ബിഗ് സ്‌ക്രീനിൽ നിറഞ്ഞാടാൻ പോകുന്ന 'ജെയ്ലർ' (Jailer movie) പുറത്തിറങ്ങുന്നതും കാത്തുള്ള ഇരിപ്പാണ് ആരാധകർ. മലയാളികളുടെയും സന്തോഷത്തിന് അതിരുകളില്ല. കാരണം പ്രിയനടൻ മോഹൻലാൽ (Mohanlal) ഈ സിനിമയുടെ ഭാഗമാണെന്നുള്ള വാർത്തകൾ വന്നുകഴിഞ്ഞു. താരത്തിന്റെ ഫസ്റ്റ് ലുക്കും പുറത്തിറങ്ങി

ഇത്രയും നാൾ നീണ്ട സിനിമാ ജീവിതത്തിൽ ആദ്യമായാണ് മലയാളം, തമിഴ് ഭാഷകളിലായി ഇത്രയേറെ ആരാധകരുള്ള താരങ്ങൾ ബിഗ് സ്‌ക്രീനിൽ കൈകോർക്കുന്നത്. മോഹൻലാൽ ചെന്നൈയിൽ രണ്ടുദിവസത്തെ ഷൂട്ടിങ്ങിനായി പോയി എന്നും വിവരമുണ്ട്. എന്നാൽ സ്‌ക്രീനിൽ ആദ്യമായി ഒന്നിക്കുന്ന താരങ്ങൾ തമ്മിൽ കുടുംബബന്ധമുണ്ട് എന്ന് അറിയുമോ? (തുടർന്ന് വായിക്കുക)

മലയാളത്തിന്റെ പ്രിയ താരമാണ് ലാലേട്ടൻ എങ്കിലും, അദ്ദേഹത്തിന്റെ ഭാര്യ സുചിത്രാ മോഹൻലാൽ തമിഴ് സിനിമയുടെ പുത്രിയാണ്. തമിഴ് നിർമാതാവ് ബാലാജിയുടെ മകളാണ് സുചിത്ര

2020ൽ 'ഇന്ത്യ ഗ്ലിറ്റ്‌സ്' റിപ്പോർട്ടിൽ തമിഴിന്റെയും മലയാളത്തിന്റെയും പ്രിയ താരങ്ങൾ തമ്മിലെ ബന്ധം വിശദീകരിച്ചിട്ടുണ്ട്. ലാലും രജനിയുമായി രക്തബന്ധമല്ല എങ്കിലും പറഞ്ഞുവരുമ്പോൾ ഇവർ ബന്ധുക്കൾ തന്നെയാണ്

കെ. ബാലാജിയുടെ മകൾ സുചിത്രയെയാണ് മോഹൻലാൽ വിവാഹം കഴിച്ചത്. നാടകകൃത്തും ഹാസ്യനടനുമായ വൈ.ജി. മഹേന്ദ്ര , ബാലാജിയുടെ സഹോദരി രാജേശ്വരി പാർത്ഥസാരഥിയുടെ മകനാണ്. സൂപ്പർസ്റ്റാർ രജനികാന്തിന്റെ ഭാര്യ ലത വൈജിഎമ്മിന്റെ ഭാര്യ സുധ മഹേന്ദ്രയുടെ സഹോദരിയും. സുചിത്രയുടെ കുടുംബത്തിൽ രജനി ബന്ധുവാകുന്നത് ഇങ്ങനെയാണ്

നെൽസൺ ദിലീപ്കുമാർ രചനയും സംവിധാനവും നിർവ്വഹിച്ച 'ജെയ്‌ലർ' രജനികാന്തിന്റെ 169-ാമത്തെ ചിത്രമാണ്. ശിവ രാജ്കുമാർ, രമ്യാ കൃഷ്ണൻ, യോഗി ബാബു, വസന്ത് രവി, വിനായകൻ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു

മോഹൻലാലും വേഷമിടുന്ന ആക്ഷൻ എന്റർടെയ്‌നറിന്റെ ചിത്രീകരണം ചെന്നൈയിൽ അതിവേഗം പുരോഗമിക്കുകയാണ്. രജനികാന്തിന്റെ ആരാധകർക്കുള്ള തമിഴ് പുതുവത്സര സമ്മാനമായി 2023 ഏപ്രിൽ 14ന് 'ജെയ്‌ലർ' റിലീസ് ചെയ്യും