ട്രംപിന്റെ റോൾസ് റോയസ് ഫാന്റം സ്വന്തമാക്കാൻ ബോബി ചെമ്മണ്ണൂർ

സ്ഥാനമൊഴിയുന്ന അമേരിക്കൻ പ്രസിഡന്റ് ഡൊണൾഡ് ട്രംപ് നേരത്തെ ഉപയോഗിച്ചിരുന്ന റോൾസ് റോയസ് ഫാന്റം സ്വന്തമാക്കാനൊരുങ്ങി ബോബി ചെമ്മണ്ണൂർ. പ്രസിഡന്റായി ചുമതലയേൽക്കും വരെ ട്രംപ് ഉപയോഗിച്ചിരുന്ന 2010 മോഡൽ ഫാന്റമാണ് ബോബി ചെമ്മണ്ണൂർ സ്വന്തമാക്കാനൊരുങ്ങുന്നത്.

ഇതിനായി ലേലത്തിൽ പങ്കെടുക്കുമെന്ന് ബോബി ചെമ്മണ്ണൂർ വ്യക്തമാക്കി. ട്രംപിൻന്റെ റോൾസ് റോയസ് മെകം ഓക്ഷൻസ് എന്ന വെബ്സൈറ്റിലാണു ലേലത്തിൽ വച്ചിരിക്കുന്നത്.

ഈ ഫാന്റത്തിന് മൂന്നു മുതൽ നാലു ലക്ഷം ഡോളർ ( 2.20 മുതൽ 2.90 കോടി രൂപ) വരെയാണ് വില പ്രതീക്ഷിക്കുന്നത്. കാർ ഉപയോഗിച്ചിരുന്നെങ്കിലും നിലവിൽ ഈ കാറിന്റെ ഉടമസ്ഥൻ ട്രംപ് അല്ല.

ആഡംബരത്തിന്റെ അവസാനവാക്കായ ഈ കാർ 91,249 കിലോമീറ്റർ ഓടിയിട്ടുണ്ട്. തിയേറ്റർ, സ്റ്റാർ ലൈറ്റ് ഹെഡ്ലൈനർ, ഇലക്ട്രോണിക് കർട്ടൻ എന്നിവയാണ് കാറിൽ സജ്ജീകരിച്ചിരിക്കുന്നത്. 2010 ൽ റോൾസ് റോയസ് 537 ഫാന്റം കാറുകളാണ് ആകെ നിർമ്മിച്ചിട്ടുള്ളത്.

റോൾസ് റോയ്സ് നൽകിയ ഓണേഴ്സ് മാനുവലിൽ ട്രംപിന്റെ ഓട്ടോഗ്രാഫുണ്ട്. "I loved this car, it is great! Best of luck" എന്നാണ് അതിൽ കുറിച്ചിരിക്കുന്നത്.

6.75 ലിറ്റർ എൻജിനാണ് കാറിനു കരുത്തേകുന്നത്. ആറു സ്പീഡ് ഓട്ടമാറ്റിക് ട്രാൻസ്മിഷൻ മോഡാണ് വാഹനത്തിന്.