Most expensive mangalsutras| 30 ലക്ഷം മുതൽ 50 ലക്ഷം വരെ; ബോളിവുഡ് താരങ്ങളുടെ താലിമാലയുടെ വില

താരങ്ങളുടെ സ്വകാര്യ ജീവിതങ്ങൾ എന്നും വാർത്താ തലക്കെട്ടുകളിൽ വരാറുണ്ട്. പ്രത്യേകിച്ച് ബോളിവുഡ് (Bollywood) താരങ്ങളുടേത്. താരങ്ങളുടെ വിവാഹവും വിവാഹ വസ്ത്രങ്ങളും ആഭരണങ്ങലും ആഢംബരം നിറഞ്ഞ വിവാഹങ്ങളുമെല്ലാം ആരാധകരുടെ ഇഷ്ട വിഷയങ്ങളാണ്.

ദീപിക പദുകോൺ മുതൽ പ്രിയങ്ക ചോപ്ര വരെയുള്ള മുൻനിര താരങ്ങളുടെ വിവാഹ വിശേഷങ്ങൾ ഇന്നും ആരാധകർക്ക് ഇഷ്ടവിഷയങ്ങളാണ്. പല താരങ്ങളുടേയും വിവാഹവേദി ഇന്ത്യയ്ക്ക് പുറത്തായിരുന്നു. ഇപ്പോൾ താരങ്ങളുടെ താലിമാല(mangalsutra)യുടെ വിലയാണ് വാർത്തകളിൽ ഇടംപിടിച്ചിരിക്കുന്നത്.

മുപ്പത് ലക്ഷം മുതൽ അമ്പത് ലക്ഷം രൂപവരെയാണ് പല നടിമാരുടേയും മംഗൽസൂത്രയുടെ വില. ബോളിവുഡിൽ ഏറ്റവും വില കൂടിയ മംഗൽസൂത്ര ധരിക്കുന്ന അഞ്ച് നടിമാർ ആരൊക്കെയാണെന്ന് നോക്കാം. വിലയും ഒപ്പം പുത്തൻ ഫാഷനും ഒന്നിച്ചുചേരുന്നതാണ് താരങ്ങളുടെ മംഗൽസൂത്ര.

2009 നവംബർ 22 നായിരുന്നു ശിൽപ ഷെട്ടിയും രാജ് കുന്ദ്രയും തമ്മിലുള്ള വിവാഹം. ബോളിവുഡിൽ അക്കാലത്തെ ഏറ്റവും ആഢംബരപൂർണമായ വിവാഹമായിരുന്നു ഇത്. പ്രമുഖ ഡിസൈനറായ തരുൺ തഹിലാനി ഡിസൈൻ ചെയ്ത ചുവപ്പ് സാരിയായിരുന്നു ശിൽപയുടെ വിവാഹ വേഷം.

പഞ്ചാബി-മഹാരാഷ്ട്ര പാരമ്പര്യ ലുക്കിലായിരുന്നു ശിൽപ ഷെട്ടി. മുപ്പത് ലക്ഷം രൂപയാണ് ശിൽപയുടെ മംഗൽസൂത്രയുടെ വിലയെന്നാണ് ബോളിവുഡിൽ നിന്നുള്ള റിപ്പോർട്ടുകൾ.

ബോളിവുഡിൽ അടുത്തിടെ വിവാഹിതയായ നടിയാണ് യാമി ഗൗതം. സംവിധായകൻ ആദിത്യ ധറുമായുള്ള യാമിയുടെ വിവാഹം അതിന്റെ ലാളിത്യം കൊണ്ടാണ് ചർച്ചയായത്. വിവാഹ ചടങ്ങുകളിലുള്ള ലാളിത്യം താരം അന്ന് ഉപയോഗിച്ച ആഭരണങ്ങൾക്ക് ഇല്ല. പ്രമുഖ ബ്രാൻഡായ ബുൾഗരി (Bvlgari) യുടെ മംഗൽസൂത്രയാണ് താരത്തിന്റേത്. 3,49,000 രൂപയാണ് ഇതിന്റെ വില.

ബോളിവുഡ് വാർത്തകളിൽ എന്നും ഇടംപിടിക്കുന്ന താര ദമ്പതികളാണ് ദീപിക പദുകോൺ-റൺവീർ സിംഗ്. ഇറ്റലിയിൽ വെച്ചായിരുന്നു താരങ്ങളുടെ ആഢംബര വിവാഹം. വിവാഹശേഷം മംഗൽസൂത്രയണിഞ്ഞ് ദീപിക നിരവധി വേദികളിൽ പ്രത്യക്ഷപ്പെട്ടിരുന്നു. 20 ലക്ഷം രൂപയാണത്രേ ദീപികയുടെ മംഗൽസൂത്രയുടെ വില.

2018 ലായിരുന്നു ഇന്ത്യൻ ക്രിക്കറ്റ് ടീം ക്യാപ്റ്റൻ വിരാട് കോഹ്ലിയും ബോളിവുഡ് താരം അനുഷ്ക ശർമയും തമ്മിലുള്ള വിവാഹം. വജ്രം പതിപ്പിച്ച മംഗൽസൂത്രയാണ് അനുഷ്കയുടേത്. 52 ലക്ഷം രൂപയാണ് ഇതിന്റെ വിലയെന്നാണ് റിപ്പോർട്ടുകൾ.

തൊണ്ണൂറുകളിൽ ബോളിവുഡിലെ പ്രിയ നായികയായിരുന്ന സോണാലി ബാന്ദ്രേ വിവാഹിതയായി പത്തൊമ്പത് വർഷങ്ങൾ കഴിഞ്ഞെങ്കിലും വില കൂടിയ മംഗൽസൂത്ര അണിയുന്ന താരങ്ങളിലൊരാളാണ്. ഫാഷനിലും ഇന്നത്തെ താരങ്ങളെക്കാൾ ഒരുപടി മുന്നിലാണ് താരം. യാമി ഗൗതം ധരിക്കുന്ന അതേ മംഗൽസൂത്ര തന്നെയാണ് സോണാലിയുടേതും.