വധുവിന്റെ സാരി അത്ര പോര; വിവാഹത്തിൽ നിന്നും പിന്മാറി വരൻ

ബെംഗളൂരു: വിവാഹത്തിന് മുൻപ് നടത്തിയ ചടങ്ങിൽ വധു ധരിച്ച സാരിയെച്ചൊല്ലിയുണ്ടായ തർക്കത്തിനൊടുവിൽ വരന്റെ വീട്ടുകാർ വിവാഹത്തിൽ നിന്നും പിൻമാറിയെന്നു പരാതി. കർണാടകത്തിലെ ഹസൻ ടൗണിലാണ് കൗതുകകരമായ സംഭവം അരങ്ങേറിയത്.

ഹസന്‍ ടൗണ്‍ സ്വദേശിയായ രഘുകുമാറും കുടുംബവുമാണ് കല്യാണത്തില്‍ നിന്നും പിൻമാറിയത്. ഇതേത്തുടർന്ന് വധുവിന്റെ ബന്ധുക്കൾ പൊലീസിൽ പരാതി നൽകി.

ഒരു വർഷത്തോളംനീണ്ട പ്രണയത്തിനൊടുവിലാണ് ബിഎൻ രഘുകുമാറും ബിആർ സം​ഗീതയും വിവാഹിതരാകാൻ തീരുമാനിച്ചത്. ബന്ധുക്കൾ ഇടപെട്ട വിവാഹം ഉറപ്പിക്കുകയായിരുന്നു.

ബുധനാഴ്ചയായിരുന്നു രഘുകുമാറും സം​ഗീതയും തമ്മിലുള്ള വിവാഹത്തിന് മുന്നോടിയായുള്ള ചടങ്ങുകൾ നടന്നത്. ഇതിനിടെ ​ഗുണനിലവാരം കുറഞ്ഞ സാരി അണിഞ്ഞാണ് സം​ഗീത എത്തിയതെന്ന് രഘുകുമാറിന്റെ കുടുംബം ആരോപിച്ചു.

നല്ല സാരിയുടുത്ത് വരാൻ രഘുവിന്റെ മാതാപിതാക്കൾ സംഗീതയോട് ആവശ്യപ്പെട്ടു. ഇതേത്തുടർന്ന് സം​ഗീതയുടെയും രഘുകുമാറിന്റെയും കുടുംബങ്ങൾ തമ്മിൽ തർക്കം ഉടലെടുത്തു. ഇത് കൈയ്യാങ്കളിയുടെ വക്കിലെത്തിയതിനു പിന്നാലെ രഘുകുമാറിന്റെ മാതാപിതാക്കൾ വിവാഹത്തിൽനിന്ന് പിൻമാറുകയാണെന്ന് വധുവിന്റെ ബന്ധുക്കളെ അറിയിച്ചു.

വ്യാഴാഴ്ചയായിരുന്നു രഘുകുമാറും സം​ഗീതയും തമ്മിലുള്ള വിവാഹം നിശ്ചയിച്ചിരുന്നത്. ഇതേത്തുടർന്നാണ് വധുവിന്റെ മാതാപിതാക്കൾ മകളോട് രഘുകുമാർ വിശ്വാസവഞ്ചന കാട്ടിയതിന് കേസ് നൽകിയത്.

എന്നാൽ സംഭവത്തിന് പിന്നാലെ രഘുകുമാർ ഒളിവിൽ‌ പോയെന്നാണ് പൊലീസ് വ്യക്തമാക്കുന്നത്.