നീരാളിയെ ജീവനോടെ തിന്നാൻ നോക്കി; യുവതിക്ക് കിട്ടയത് എട്ടിന്റെ പണി

ബീജിങ്: ജീവികളെ ജീവനോടെ ഭക്ഷിക്കുന്നത് അത്ര സുരക്ഷിതമായ കാര്യമല്ല. അത് തെളിയിക്കുന്ന ഒരു വീഡിയോ ആണ് ഇപ്പോള്‍ പുറത്ത് വന്നിരിക്കുന്നത്. ചൈനയിലെ അറിയപ്പെടുന്ന ഒരു വീഡിയോ ബ്ലോഗര്‍ ആണ് ഇതിന്റെ ഇര. ആ വീഡിയോ വൈറല്‍ ആയിരിക്കുകയാണ്. തിന്നാൻ നോക്കിയത് ഒരു ജീവനുള്ള നീരാളിയെ ആയിരുന്നു.

ചൈനയിലെ ഷോര്‍ട്ട് വീഡിയോ പ്ലാറ്റ് ഫോം ആയ കൈ്വഷൗവില്‍ ആയിരുന്നു സംഭവം. സീസൈഡ് ഗേള്‍ ലിറ്റില്‍ സെവന്‍ എന്ന ഐഡി ഉപയോഗിക്കുന്ന വ്ളോഗര്‍ ആണ് അല്‍പം അതിക്രമം എന്ന് തോന്നിപ്പിക്കുന്ന കാര്യം ചെയ്തത്. എന്നാല്‍ ലൈവില്‍ അത് ഇത്രയും 'പണിതരും' എന്ന് യുവതി പോലും പ്രതീക്ഷിച്ചിരുന്നില്ല എന്നതാണ് യാഥാര്‍ത്ഥ്യം. ഈ വീഡിയോ ഇപ്പോള്‍ ലോകമെമ്പാടും വൈറല്‍ ആയിരിക്കുകയാണ്.

ഒരു നീരാളിയെ ജീവനോടെ തിന്നുന്നത് ലൈവ് വീഡിയോയില്‍ കാണിക്കാന്‍ ആയിരുന്നു യുവതിയുടെ ശ്രമം. പരാമവധി ആളുകളുടെ ശ്രദ്ധ ആകര്‍ഷിക്കുക എന്നതായിരുന്നു ലക്ഷ്യം. അല്‍പം പേടിക്കുകയും ചെറുതായി പരിക്കേല്‍ക്കുകയും ചെയ്‌തെങ്കിലും വീഡിയോ വൈറല്‍ ആയിക്കിട്ടിയിട്ടുണ്ട്.

അമ്പത് സെക്കന്റ് മാത്രം ദൈര്‍ഘ്യമുള്ളതാണ് വീഡിയോ. വീഡിയോയുടെ തുടക്കത്തില്‍ തീരെ പരിഭ്രാന്തിയില്ലാതെ ആണ് യുവതി പ്രത്യക്ഷപ്പെടുന്നത്. എന്നാല്‍ സെക്കന്റുകള്‍ ക്കകം കാര്യങ്ങള്‍ കൈവിട്ടുപോവുകയായിരുന്നു. ജീവന്‍ മരണ പോരാട്ടത്തില്‍ നീരാളി, കാലുകള്‍ കൊണ്ട് യുവതിയുടെ മുഖത്ത് പറ്റിപ്പിടിക്കുകയായിരുന്നു.

കൈകൊണ്ട് നീരാളിയെ പിടിച്ചുമാറ്റാനുള്ള ശ്രമമായി പിന്നീട്. അതോടെ നീരാളിപ്പിടിത്തം കുറേക്കൂടി രൂക്ഷമായി. പിന്നെ യുവതിയുടെ കരച്ചിലും വെപ്രാളവും ആണ് കാണാനാകുന്നത്. ഒരുവിധത്തില്‍ ഒടുവില്‍ നീരാളിയെ പറിച്ചെടുക്കുകയാണ് ചെയ്തത്. മുഖത്ത് ചെറിയ മുറിവുണ്ടാവുകയും ചെയ്തു.