'നഷ്ടമായതെല്ലാം നൂറ് മടങ്ങാക്കി തിരിച്ചു തരും'; ജാക്വിലിന് ജയിലിൽ നിന്ന് പ്രണയലേഖനമെഴുതി സുകേഷ് ചന്ദ്രശേഖർ

ബോളിവുഡ് നടി ജാക്വിലിൻ ഫെർണാണ്ടസിന് ജയിലിൽ നിന്ന് കത്തെഴുതി സാമ്പത്തിക തട്ടിപ്പു കേസിൽ ജയിലിൽ കഴിയുന്ന സുകേഷ് ചന്ദ്രശേഖർ. ജാക്വിലിന് ഹോളി ആശംസിച്ചു കൊണ്ടാണ് സുകേഷിന്റെ കത്ത്.

കഴിഞ്ഞ മാസം ജാക്വിലിന് വാലന്റൈൻസ് ഡേ ആശംസകളും സുകേഷ് അറിയിച്ചിരുന്നു. കോടതിയിൽ ഹാജരാക്കുന്ന വേളയിൽ മാധ്യമങ്ങളിലൂടെയാണ് സുകേഷ് നടിക്ക് പ്രണയദിനാശംസകൾ അറിയിച്ചത്.

ഇരുന്നൂറു കോടി സാമ്പത്തിക തട്ടിപ്പ് കേസിലാണ് സുകേഷ് ചന്ദ്രശേഖർ അറസ്റ്റിലായത്. കേസിൽ ജാക്വിലിനും ആരോപണവിധേയയാണ്. സുകേഷിന്റെ ക്രിമിനൽ പശ്ചാത്തലം അറിഞ്ഞിട്ടും അയാളുമായുള്ള ബന്ധം തുടർന്നുവെന്നും ഉപഹാരങ്ങൾ സ്വീകരിച്ചുവെന്നുമാണ് താരത്തിനെതിരെയുള്ള ഇഡിയുടെ കുറ്റപത്രത്തിൽ പറയുന്നത്. 

ഹോളി ആശംസിച്ചു കൊണ്ട് ജാക്വിലിന് അയച്ച കത്തിൽ സുകേഷ് പറയുന്നത് ഇങ്ങനെ, എക്കാലത്തേയും സുന്ദരിയും അതിമനോഹരമായ മനുഷ്യനുമായ ജാക്വിലിന് ഹോളി ആശംസകൾ എന്നാണ് കത്തിൽ പറയുന്നത്. കൂടാതെ, നിറങ്ങളുടെ ഉത്സവമായ ഇന്ന് ജീവിതത്തിൽ നിന്ന് മങ്ങുകയും നഷ്ടമാകുകയും ചെയ്ത നിറങ്ങളെല്ലാം നൂറു മടങ്ങാക്കി തിരിച്ചു തരുമെന്ന് ഉറപ്പ് തരുന്നുവെന്നും സുകേഷ്.

ജാക്വിലിനെ ഒരുപാട് സ്നേഹിക്കുന്നുവെന്നും അവർക്കു വേണ്ടി ഏതറ്റം വരെ പോകുമെന്നുമാണ് കത്തിൽ സുകേഷ് പറയുന്നത്. നടിയോട് അവർ തനിക്ക് എത്രമാത്രം പ്രിയപ്പെട്ടതാണെന്ന് അറിയാമല്ലോ എന്നും സുകേഷ് ചോദിക്കുന്നു.

എന്നാൽ സുകേഷുമായി അടുപ്പമുണ്ടായിരുന്നെങ്കിലും അയാളുടെ കുറ്റകൃത്യങ്ങളെ കുറിച്ച് അറിയില്ലെന്നും തന്നെ ഉപയോഗിക്കുകയായിരുന്നുവെന്നുമാണ് ജാക്വിലിൻ നൽകിയ മൊഴി.

സുകേഷിന്റെ തട്ടിപ്പ് രീതിയുടെ ഇരയാണ് താനെന്നായിരുന്നു ജാക്വിലിന്റെ പ്രതികരണം. തനിക്കെതിരെയുള്ള കേസ് വസ്തുതാ വിരുദ്ധമാണെന്നും നടി വ്യക്തമാക്കിയിരുന്നു

സുകേഷ് ചന്ദ്രശേഖറിൽ നിന്നും വില കൂട‌ിയ സമ്മാനങ്ങൾ ലഭിച്ചിരുന്നതായി ജാക്വിലിൻ നേരത്തേ മൊഴി നൽകിയിട്ടുണ്ട്. ലക്ഷ്വറി ഫാഷൻ ബ്രാൻഡുകളായ ഗുച്ചി, ഷനേൽ എന്നിവയുടെ ഡിസൈനർ ബാഗുകൾ, ഗുച്ചിയുടെ ജിം വെയർ ഔട്ട് ഫിറ്റ്, ലൂയി വിട്ടോണിന്റെ ചെരുപ്പ്, ഒരു ജോഡി വജ്ര കമ്മലുകൾ, മൾട്ടി കളേർഡ് സ്റ്റോൺ ബ്രേസ്ലെറ്റ് തുടങ്ങിയവയാണ് സുകേഷ് നൽകിയ സമ്മാനങ്ങളിൽ ചിലത്.