'ഒരു ദിവസം പത്ത് തവണ വിളിക്കും, ജാക്വിലിനെ ഉപേക്ഷിക്കണമെന്നായിരുന്നു ആവശ്യം'; നോറ ഫത്തേഹിക്കെതിരെ സുകേഷ് ചന്ദ്രശേഖർ

രണ്ട് ദിവസം മുമ്പാണ് സാമ്പത്തിക തട്ടിപ്പ് കേസിൽ ജയിലിൽ കഴിയുന്ന സുകേഷ് ചന്ദ്രശേഖറിനെതിരെ ബോളിവുഡ് നടി നോറ ഫത്തേഹി ഗുരുതരമായ വെളിപ്പെടുത്തൽ നടത്തിയത്. സുകേഷ് ചന്ദ്രശേഖർ തന്നെ കാമുകിയാക്കാൻ ആഗ്രഹിച്ചിരുന്നുവെന്നും ഇതിനു വേണ്ടി ദൂതയെ അയച്ചു എന്നുമായിരുന്നു നോറയുടെ വെളിപ്പെടുത്തൽ.

ഇപ്പോൾ നോറയ്ക്കെതിരെ രംഗത്തെത്തിയിരിക്കുകയാണ് സുകേഷ്. അഭിഭാഷകർ മുഖേന അയച്ച പത്രക്കുറിപ്പിലാണ് സുകേഷ് ഇക്കാര്യങ്ങൾ വെളിപ്പെടുത്തിയത്. താൻ ജാക്വിലിൻ ഫർണാണ്ടസുമായി പ്രണയത്തിലായിരുന്നുവെന്നും നോറയ്ക്ക് ജാക്വിലിനോട് അസൂയയാണെന്നുമാണ് കുറിപ്പിൽ പറയുന്നത്.

ജാക്വിലിനുമായി താൻ പ്രണയത്തിലായിരുന്ന സമയത്ത് നോറ തന്നെ നിരന്തരം ഫോൺ ചെയ്തിരുന്നതായും ഒരു ദിവസം പത്ത് തവണ വരെ വിളിച്ചിരുന്നുവെന്നുമാണ് സുകേഷ് അവകാശപ്പെടുന്നത്. ജാക്വിലിനെ ഉപേക്ഷിച്ച് തന്നെ ഡേറ്റ് ചെയ്യണമെന്നായിരുന്നു നോറയുടെ ആവശ്യം. ഇതിനായി ജാക്വിലിനെതിരെ തന്നോട് നിരന്തരം പറഞ്ഞുകൊണ്ടിരുന്നു.

തന്റെ ബന്ധുവിന് വേണ്ടി ഒരു സംഗീത നിർമ്മാണ കമ്പനി സ്ഥാപിക്കാൻ സുകേഷിന്റെ സഹായം അഭ്യർത്ഥിച്ചു. തനിക്ക് ആവശ്യമുള്ള വിലകൂടിയ ബാഗുകളുടേയും ആഭരണങ്ങളുടേയും ഫോട്ടോകൾ അയക്കുമായിരുന്നു. ഈ ബാഗുകളാണ് നോറ ഇപ്പോഴും ഉപയോഗിക്കുന്നതെന്നും സുകേഷ് തന്റെ കത്തിൽ അവകാശപ്പെടുന്നു.

നോറ ഉപയോഗിക്കുന്ന ആഢംബര ഹെർമിസ് ബാഗിന്റെ ബില്ല് ആവശ്യപ്പെട്ടു നോക്കൂ, ഒരു ബില്ല് പോലും അവരുടെ പക്കൽ ഉണ്ടാകില്ലെന്നുമാണ് കത്തിൽ സുകേഷ് പറയുന്നത്. താനാണ് ആ ബാഗ് സമ്മാനിച്ചതെന്നാണ് സുകേഷിന്റെ വാദം. ഈ ബാഗിന് 2 കോടിക്ക് മുകളിലാണ് ഈ ബാഗിന്റെ വിലയെന്നും പറയുന്നുണ്ട്.

താൻ സ്ത്രീകളെ ബഹുമാനിക്കുന്നയാളാണ്. അവരെ തേജോവധം ചെയ്യാൻ വേണ്ടി ചാറ്റുകളുടെ സ്ക്രീൻഷോട്ടുകൾ സൂക്ഷിച്ചു വെക്കാറില്ല. ജാക്വിലിനെതിരെ നോറയുടെ ആരോപണങ്ങൾ വ്യാജമാണെന്നും സുകേഷ്.

കഴിഞ്ഞ വെള്ളിയാഴ്ച്ചയാണ് നോറ സുകേഷ് ചന്ദ്രശേഖറിനെതിരെ മൊഴി നൽകിയത്. ഡൽഹി പാട്യാല കോടതിയിലെത്തിയാണ് നടി സുകേഷിനെതിരെ മൊഴി നൽകിയത്. കേസിൽ സാക്ഷിയാണ് നോറ.

സുകേഷ് ചന്ദ്രശേഖർ തന്നോട് കാമുകിയാകണമെന്ന് ആവശ്യപ്പെട്ട് ദൂതയെ അയച്ചിരുന്നതായി നടിയുടെ മൊഴിയിൽ പറയുന്നു. കാമുകിയായാൽ തന്നേയും കുടുംബത്തേയും സാമ്പത്തികമായി സംരക്ഷിച്ചു കൊള്ളാമെന്നായിരുന്നു സുകേഷിന്റെ വാഗ്ദാനമെന്നാണ് നടിയുടെ മൊഴിയിൽ വ്യക്തമാക്കുന്നത്. കൂടാതെ, ജാക്വിലിൻ ഫർണാണ്ടസ് താത്പര്യമറിയിച്ച് രംഗത്തുണ്ടെന്നും പക്ഷേ, സുകേഷിന് നോറയോടാണ് താത്പര്യമെന്നും പറഞ്ഞതായും മൊഴിയിൽ പറയുന്നു.