സൈബർ സഖാവിനെന്ത് പോളിറ്റ് ബ്യൂറോ? 'പാർട്ടി വിരുദ്ധ പോസ്റ്റ് ഇടുന്ന' നടൻ്റെ സിനിമയുടെ പോസ്റ്റർ ഷെയർ ചെയ്ത PB അംഗം എയറിൽ

തിരുവനന്തപുരം: ഹരീഷ് പേരടി നായകനാകുന്ന സിനിമയുടെ പോസ്റ്റർ സമൂഹ മാധ്യമത്തിൽ ഷെയർ ചെയ്തതിന് സിപിഎം പോളിറ്റ് ബ്യൂറോ അംഗം എം എ ബേബിക്ക് സൈബർ സഖാക്കളുടെ രൂക്ഷ വിമർശനം. അഖിൽ കാവുങ്ങൽ സംവിധാനം ചെയ്ത 'ദാസേട്ടന്റെ സൈക്കിൾ' എന്ന സിനിമയുടെ പോസ്റ്ററാണ് എം.എ ബേബി പങ്കുവെച്ചത്.

ഇതേ പോസ്റ്റർ പ്രതിപക്ഷ നേതാവ് വി ഡി സതീശനും ബി ജെ പി സംസ്ഥാന അധ്യക്ഷൻ കെ സുരേന്ദ്രനും ഉൾപ്പെടെയുള്ള വിവിധ രാഷ്ട്രീയ നേതാക്കള്‍ ഫേസ്ബുക്കിൽ ഷെയർ ചെയ്തിരുന്നു. പലപ്പോഴും സിപിഎമ്മിനെ രൂക്ഷമായി വിമർശിക്കുന്ന ഹരീഷ് പേരടിയുടെ സിനിമയുടെ പോസ്റ്റർ ഷെയർ ചെയ്യുന്നത് മഹാ അപരാധമാണെന്നാണ് പലരും കമന്റിൽ പറയുന്നു.

'ബേബി സഖാവൊക്കെ രാഷ്ട്രീയ വിദ്യാഭ്യാസം നേടിയ ആൾക്കാരാണ്.. അതുകൊണ്ട് ഇങ്ങനൊക്കെ ചെയ്തു കളയും... അവർക്ക് പാർട്ടിയെ പറഞ്ഞാൽ വേദന കുറവാണ്.. നമുക്ക് ആ വിദ്യാഭ്യാസം ഇല്ലാത്തത് കൊണ്ട് നമ്മൾ പാർട്ടിക്കെതിരെ ആരെന്തു പറഞ്ഞാലും നമുക്ക് വേദനിക്കും നമ്മൾ പ്രതിരോധം തീർക്കും'- ഒരു കമന്റ് ഇങ്ങനെ.

മറ്റൊരു കമന്റ്- 'ലോക്‌സഭാ ഇലക്ഷനിൽ തോറ്റപ്പോൾ നിയമസഭയിൽ വരാതെ പിണങ്ങിയിരുന്നപ്പോൾ മനസ്സിലായതാണ് സഖാവിന്റെ അപക്വത. തുടരൂ'

'എന്റെ അച്ഛനെ പോലെയുള്ള രക്തസാക്ഷികളുടെ ജീവനും ജീവിതവും ആണ് പാർട്ടിയുടെ മുന്നോട്ടുപോക്കിനുള്ള ഊർജ്ജം എന്നൊക്കെ നാഴികക്ക് നാല്പതുവട്ടം പറയുന്നതൊക്കെ വെറും വാക്കാണോ സഖാവേ ,പാർട്ടിയുടെ പരമോന്നത പദവിയിൽ ഇരിക്കുന്ന സഖാവിനെ പോലുള്ളവർ തന്നെ എന്തിന്റെ പേരിലായാലും ഇതുപോലുള്ള പാർട്ടി വിരുദ്ധന്മാരെ സപ്പോർട്ട് ചെയ്യുമ്പോൾ അവരുടെ രക്തസാക്ഷിത്വം ഒക്കെ വെറുതെ ആയിപോയോ എന്ന് ചിന്തിക്കേണ്ടിവരും രക്തസാക്ഷികൾ ആയവരുടെ മക്കളായ നമ്മളെ പോലുള്ളവർക്ക്'- മറ്റൊരാൾ കമന്റ് ചെയ്തു.

'ഇനി ആ ജോയ് മാത്യുവിന്റെ ഒരു പോസ്റ്റ് ഉണ്ട് പുതിയത്.. അതൂടെ ഒന്ന് ഷെയർ ചെയ്താൽ തികയും... ഞങ്ങൾക്കൊന്നും അക്കാദമിക് രാഷ്ട്രീയ വിദ്യാഭ്യാസം ഇല്ലാത്തോണ്ട് പാർട്ടിക്കെതിരെ കുരയ്ക്കുന്ന പേരാടിയെയും ജോയിയെയും പോലുള്ള നാറികളെ താങ്ങി നടക്കുന്നില്ല..'- വേറൊരാൾ കുറിച്ചു.

'ജയശങ്കറും, ജോയ്മാത്യുവും കൂടെ ഉണ്ടായിരുന്നങ്കിൽ സമ്പൂർണ്ണമായേനെ. അറിയാൻ വയ്യാഞ്ഞിട്ട് ചോദിക്കുവാ സഖാവ് ഈ ലോകത്തൊന്നുമല്ലേ?'

ന്നാൽ വിമര്‍ശനങ്ങൾക്ക് മറുപടിയുമായി ബേബി രംഗത്തെത്തി- ''എനിക്കും എന്റെ പാർട്ടിക്കും യോജിക്കാൻ കഴിയാത്തകാര്യങ്ങൾ ഹരീഷ് പറഞ്ഞിട്ടുണ്ടെങ്കിൽ ; അദ്ദേഹം സംവിധാനം ചെയ്യുന്ന സിനിമയുടെ പോസ്റ്റർ എന്റെ ഫേസ്ബുക്കിൽവന്നതോടെ, അത്തരം നിലപാടുകൾക്ക് ഞാൻ അംഗീകാരം കൊടുത്തു എന്ന് വ്യാഖ്യാനിക്കേണ്ടതില്ല. രാഷ്ട്രീയാതീതമായി കലാസാഹിത്യമേഖലകളിൽ വിമർശനപരമായസഹകരണം സാദ്ധ്യമാവണം എന്നതാണ് കാലഘട്ടം ആവശ്യപ്പെടുന്ന നിലപാട്''- അദ്ദേഹം കുറിച്ചു.