ഭൂട്ടാനിൽ അവധി ആഘോഷിച്ച് ദീപിക പദുകോൺ; താമസത്തിന് 2.25 ലക്ഷം ദിവസ വാടക

തിരക്കുകളിൽ നിന്നെല്ലാം ബ്രേക്ക് എടുത്ത് ഭൂട്ടാനിൽ അവധിയാഘോഷിക്കുകയാണ് ബോളിവുഡ് താരം ദീപിക പദുകോൺ. ഭൂട്ടാനിൽ നിന്നുള്ള നിരവധി ചിത്രങ്ങളും താരം ഇൻസ്റ്റഗ്രാമിൽ പങ്കുവെച്ചിട്ടുണ്ട്.

ഭൂട്ടാനിലെ ഏറ്റവും വില കൂടിയ ഹോട്ടലിലാണ് ബോളിവുഡിലെ താര റാണി താമസിക്കുന്നത്. ഭൂട്ടാനിലെ പാറോ എന്ന ചെറു നഗരത്തിലാണ് ദീപിക താമസിക്കുന്നത് എന്നാണ് ജിക്യൂ ഇന്ത്യ റിപ്പോർട്ടിൽ പറയുന്നത്.

കടലിൽ നിന്നും 7382 അടി ഉയരത്തിൽ സ്ഥിതി ചെയ്യുന്ന ചെറു പട്ടണമാണ് പാറോ. ഇവിടെയുള്ള ഏറ്റവും വില കൂടിയ ഹോട്ടലിലാണ് താരത്തിന്റെ താമസം.

ഈ ഹോട്ടലിൽ ഒരു രാത്രി കഴിയാൻ ഏകദേശം 2.25 ലക്ഷം രൂപയാണ് വാടക. അമൻകോറ എന്നാണ് ഈ അത്യാഢംബര ഹോട്ടലിന്റെ പേര്. മരം കൊണ്ടാണ് ഹോട്ടലിന്റെ അകത്തളങ്ങളും മുറികളും ഒരുക്കിയിരിക്കുന്നത്.

ബോളിവുഡിൽ ഏറ്റവും തിരക്കേറിയ നായികയാണ് ദീപിക പദുകോൺ. സിനിമകൾക്കു പുറമേ, ഫിഫ ലോകകപ്പ് വേദിയിലും ഓസ്കാർ വേദിയിലും ഇന്ത്യയെ പ്രതിനിധീകരിച്ച് താരം പങ്കെടുത്തിരുന്നു.

സിനിമാ തിരക്കുകളിലേക്ക് വീണ്ടും മടങ്ങുന്നതിനു മുമ്പ് ലഭിച്ച ചെറിയ ഇടവേളയ്ക്കാണ് ദീപിക ഭൂട്ടാൻ തിരഞ്ഞെടുത്തത്. വമ്പൻ പ്രൊജക്ടുകളാണ് ദീപികയുടേതായി ഇനി വരാനിരിക്കുന്നത്.

ഋത്വിക് റോഷനൊപ്പം ആക്ഷൻ ചിത്രം ഫൈറ്റർ, പ്രഭാസിനൊപ്പം പ്രൊജക്ട് കെ, രോഹിത് ഷെട്ടി സംവിധാനം ചെയ്യുന്ന സിംഗം എഗെയിൻ, ബ്രഹ്മാസ്ത്ര പാർട്ട് 2, ഷാരൂഖ് ഖാനൊപ്പം ജവാനിൽ അതിഥി വേഷം തുടങ്ങി നിരവധി ചിത്രങ്ങളിൽ ദീപിക വേഷമിടുന്നത്. 1,475 കോടിയാണ് ഈ ചിത്രങ്ങളുടെയെല്ലാം മൊത്തം ബജറ്റ്.