Educational qualification of actress| അഭിനയത്തിൽ മാത്രമല്ല, പഠനത്തിലും മുന്നിലാണ്; തെന്നിന്ത്യൻ താരറാണിമാരുടെ വിദ്യാഭ്യാസ യോഗ്യത

കോടികൾ പ്രതിഫലം വാങ്ങുന്നവരും നിരവധി ആരാധകരമുള്ള നടിമാരാണെങ്കിലും പലരും വിദ്യാഭ്യാസ യോഗ്യതയുടെ പേരിൽ പരിഹാസങ്ങൾക്കും ട്രോളുകൾക്കും ഇരകളാകാറുണ്ട്, എന്നാൽ സിനിമാ കരിയറിൽ മാത്രമല്ല, വിദ്യാഭ്യാസത്തിലും മുന്നിട്ടു നിൽക്കുന്ന നടിമാരും കുറവല്ല.

തെന്നിന്ത്യൻ സിനിമയിലെ അഞ്ച് താരറാണിമാരുടെ വിദ്യാഭ്യാസ യോഗ്യത എന്തൊക്കെയാണെന്ന് നോക്കാം.

പ്രേമം എന്ന സിനിമയിലൂടെ മലരായി വന്ന് മലയാളികളുടെ മുഴുവൻ മനം കവർന്ന നടിയാണ് സായ് പല്ലവി. അവതരിപ്പിക്കുന്ന കഥാപാത്രങ്ങൾ കൊണ്ട് വിസ്മയിപ്പിക്കുന്ന സായ് പല്ലവി ഒരു ഡോക്ടറാണെന്ന് ആരാധകർക്കെല്ലാം അറിയാം.

2015 ലാണ് പ്രേമത്തിലൂടെയാണ് സായ് പല്ലവിയുടെ നായികയായുള്ള അരങ്ങേറ്റം. ആദ്യ ചിത്രത്തിനു ശേഷമാണ് സായ് പല്ലവി ജോർജിയയിൽ നിന്നും മെഡിസിൻ ബിരുദം നേടി തിരിച്ചെത്തുന്നത്. പഠിച്ചത് ആതുരസേവനമാണെങ്കിലും അഭിനയമാണ് പല്ലവി തന്റെ കരിയറായി തിരഞ്ഞെടുത്തത്.

തെന്നിന്ത്യയിൽ ഏറ്റവും കൂടുതൽ പ്രതിഫലം വാങ്ങുന്ന നടിമാരിൽ ഒരാളാണ് സാമന്ത. നയൻതാര മാത്രമാണ് പ്രതിഫലത്തിൽ സാമിന്റെ മുന്നിലുള്ളത്. കഠിനമായ പരിശ്രമം കൊണ്ടാണ് സാമന്ത കരിയറിൽ ഏറ്റവും ഉയരങ്ങളിൽ എത്തിയിരിക്കുന്നതെന്ന് ആരാധകർക്കെല്ലാം അറിവുള്ളതാണ്.

കരിയറിൽ മാത്രമല്ല, പഠനത്തിലും മുൻപന്തിയിൽ തന്നെയായിരുന്നു സാം. ചെന്നൈയിലെ സെന്റ്. സ്റ്റീഫൻസ് മെട്രിക്കുലേഷൻ സ്കൂളിലായിരുന്നു സാമന്തയുടെ പത്താം ക്ലാസ് വരെയുള്ള വിദ്യാഭ്യാസം. ഇതിനു ശേഷം ഹോളി ഏഞ്ചൽസ് ആംഗ്ലോ ഇന്ത്യൻ സ്കൂളിൽ 11,12 ക്ലാസുകൾ പൂർത്തിയാക്കി. ഏറ്റവും മികച്ച മാർക്കോടെയാണ് സാമന്ത തന്റെ സ്കൂൾ വിദ്യാഭ്യാസം പൂർത്തിയാക്കിയത്. കൊമേഴ്സിൽ ഡിസ്റ്റിംഗ്ഷൻ നേടിയ വിദ്യാർത്ഥിയാണ് സാമന്ത.

തെന്നിന്ത്യയിലെ ലേഡി സൂപ്പർ സ്റ്റാർ എന്നാണ് ആരാധകർ നയൻതാരയെ വിശേഷിപ്പിക്കുന്നത്. മലയാളികളുടെ അഭിമാന താരമായ നയൻതാര തിരുവല്ല മാർത്തോമാ കോളേജിൽ നിന്ന് ഇംഗ്ലീഷ് സാഹിത്യത്തിൽ ബിരുദം നേടിയ ശേഷമാണ് അഭിനയ ലോകത്ത് സജീവമാകുന്നത്.

തെന്നിന്ത്യയിൽ നിന്ന് ബോളിവുഡ് വരെ കുറഞ്ഞകാലത്തിനുള്ളിൽ ആരാധകരെ സ്വന്തമാക്കിയ നടിയാണ് രശ്മിക മന്ദാന. ജേണലിസം, സൈക്കോളജി, ഇംഗ്ലീഷ് സാഹിത്യം എന്നിവയിൽ ബിരുദധാരിയാണ് രശ്മിക. 2016 ൽ പുറത്തിറങ്ങിയ കിറിക്ക് പാർട്ടിയിലൂടെയാണ് രശ്മിക സിനിമാ ലോകത്ത് എത്തുന്നത്.

ചെറിയ പ്രായത്തിൽ തന്നെ നായികയായി സിനിമാ ലോകത്ത് എത്തിയതാണെങ്കിലും പഠനം നിർത്താൻ തമന്നയ്ക്ക് അതൊരു കാരണമായിരുന്നില്ല. സിനിമയിൽ സജീവമായിരിക്കുമ്പോഴാണ് തമന്ന ആർട്സിൽ ബിരുദം നേടുന്നത്.