'ബാക്കി എനിക്ക് രാത്രി കഴിക്കാമോ'? ഭക്ഷണം കളയാതിരിക്കാന്‍ കോഹ്ലിയുടെ കരുതല്‍; വൈറലായി പോസ്റ്റ്

ഇന്ത്യൻ ടീമിന്റെ ബാറ്റിംഗ് കരുത്തനാണ് വിരാട് കോഹ്ലി. താരത്തിന്റെ എല്ലാ വാർത്തകളും ഏറെ ആകാംഷയോടെയാണ് പ്രേക്ഷകർ ഏറ്റെടുക്കാറുളളത്. ഇപ്പോഴിതാ കേരളത്തില്‍ ക്രിക്കറ്റ് കളിക്കാനെത്തിയ സമയത്ത് കോഹ്ലിക്ക് തനി നാടന്‍ സദ്യ വിളമ്പിയ അനുഭവം പങ്കുവെയ്ക്കുകയാണ് പാചക വിദഗ്ദ്ധന്‍ സുരേഷ് പിള്ള.

2018-ല്‍ തിരുവനന്തപുരത്ത് നടന്ന ഇന്ത്യ-വെസ്റ്റിന്‍ഡീസ് ഏകദിനം കളിക്കാനെത്തിയതായിരുന്നു ഇന്ത്യന്‍ ടീം. തിരുവനന്തപുരത്തെ സ്വകാര്യ ഹോട്ടലില്‍ താമസിച്ച ഇന്ത്യന്‍ ടീമിന് ഭക്ഷണം ഒരുക്കാനുള്ള ഭാഗ്യം ലഭിച്ചത് സുരേഷ് പിള്ളക്കായിരുന്നു. അന്നത്തെ അനുഭവമാണ് അദ്ദേഹം ഫെയ്‌സ്ബുക്കില്‍ പങ്കുവെച്ചത്. ഒപ്പം കോഹ്ലിക്കൊപ്പമുള്ള ചിത്രവും പോസ്റ്റ് ചെയ്തിട്ടുണ്ട്.

മറ്റു ക്രിക്കറ്റ് താരങ്ങള്‍ക്ക് വിവിധ മത്സ്യവിഭവങ്ങള്‍ ഒരുക്കിയപ്പോള്‍ കോഹ്ലിക്ക് 24 കൂട്ടുള്ള സദ്യയാണ് ഉണ്ടാക്കിയത്. അന്ന് ഉച്ചയ്ക്ക് കോലി അത് കഴിച്ചെന്നും ബാക്കിയുള്ള ഭക്ഷണം കളയാതെ രാത്രിയും വിളമ്പണമെന്ന് വാശി പിടിച്ചെന്നും സുരേഷ് പിള്ള പോസ്റ്റില്‍ പറയുന്നു.

തയ്യാറാക്കിയ ഭക്ഷണം കളയരുതെന്ന ഉറച്ച നിലപാടിലായിരുന്നു കോഹ്ലി. ബാക്കി സദ്യ രാത്രി തരണമെന്ന് അദ്ദേഹം ആവശ്യപ്പെട്ടു. ഒടുവില്‍ ഞങ്ങള്‍ക്ക് അത് വഴങ്ങേണ്ടി വന്നുവെന്നും സുരേഷ് പിള്ള പോസ്റ്റില്‍ പറയുന്നു.

അതൊന്നും ക്യാമറയ്ക്ക് വേണ്ടിയുള്ള കളിയല്ലായിരുന്നു. അതാണ് പച്ചയായ വിരാട് കോലി.' ഫെയ്‌സ്ബുക്കില്‍ പോസ്റ്റ് ചെയ്ത അനുഭവക്കുറിപ്പില്‍ സുരേഷ് പിള്ള പങ്കുവെയ്ക്കുന്നു.